Kan Tuanbia

ICBC cu bu aa ṭhen mi Lai krifa chung in ihmunkhah a duh mi vial ifon in a dir mi krifabu a si.

Indianapolis ah hin 1996 kum in Laimi ciikpaak an rak phaan cang i 2000 kum ah upa 8 khuakhaan nak in Indiana Chin Community Church (ICCC) a rak dir. Kum khat a um ah phunghram le hruaitu thar ser in a min cu Chin Evangelical Baptist Church (CEBC) tiah thlen a si. Hruaitu hlun le bu chung mi acheu ibu in 2002 kum ah krifabu dang Chin Christian Community Church a dir. Khuakhat Laimi iṭhen cu ruat kho lo in CCCC le CEBC fonh a duh mi mibu rak um a si. CEBC i an ṭuanvo laak mi zong hlawt a herh ning in an hlawt i ifonh nak khua cu rak khaan leen a si. Sihmanhsehlaw, cu khuakhaan nak cu dawntu tampi a ngei i a tluang kho lo. A har.

Fonh a duh mi mibu nih hmunkhat te ah thla cam lengmang a hau ti in Pu Siang Herh te um-inn i mi phu khat itonnak ah rak caihkhaan a si. Thlacam cu zarhpini lengmang ah mi inn ah tuah a hung si. Mah thlacam mibu cu midang nih “A Lai Bu” tiah rak auh a si. Mah “a lai bu” cu le bu um cia bu hnih ifonh nak khua cu khaan lengmang a si i, Indiana Chin Baptist Church (ICBC) ti in bu khat ah ifon dih usi ti zong in fonhduh bu thum minung kutthlir in hnatlak nak a rak um. Sihmanhsehlaw CEBC min a siang ti lo mi nih ifonh zong duh lo, fonh nak ca ah biakin zong sian ti lo a rak si ṭhan. Lungdongh in “a lai bu” cu Pu Thawng Cung Lian te inn cawk thar ah pumhnak rak tuah le thawhlawm zong rak khawlh a si, 2003 October 12 in. A min ah Indiana Chin Christian Fellowship (ICCF) rak ti a si. ICCF cu krifabu a si i ihmunkhah a duh mi poh he ihmunkhah khawh nak inka hung in biakin pa khat ah Pathian a bia..

Thla thumli a rauh ah, ICCF le CCCC tal ifonh khawh ah a ṭha ti in Kawlram in a ra kan tlawng ta mi Rev. E. Za Bik le Rev. John Mang nih athar in thazaang an chuah i 2004 February 8 ah fonh a duh mi vialte cu Woodland Baptist Church ah ifonh le pumhnak thawk a si. A min hi ICCF si ti lo in Indiana Chin Baptist Church ti a si cang. Mahti cun ICBC cu aa ser.

ICBC a dir thla ruk ah phunghram le hruaitu thar ngei in St. John United Church of Christ biakin ah ipumh a si. Kum khat fai a rauh hnu 2005 April 10 ah in Indiana Christian Fellowship biakin ah pumhnak iṭhial a si. Asinain, CCCC mi ṭhing mibu bu khat cu ICBC zulh duh lo in an rung taang i Chin Christian Church an ron dirh colh. An hal ning bantuk in ICBC nih bu tangka zong thilri zong lungtluangte in a pek hna (thilri tu cu an la ṭhan lo). Cuca ah, ICBC cu 2005 April 10 hnu i hram aa domh mi bu ah a cang.

Cu lio ah kilhtu pasator Rev. Dr. Hre Kio nih hmunṭhu in a kan umpi khawh rih lo ca ah, 2005 kum tanṭim in Salai Pu Lal Cung Awi le Salai Pu Tluang Thang pasator ah fial an si i atu tiang zong an kan zuampiak rih. Pathian nih unau tampi a kan pek i mi kan karh ngaite i kan ipumh nak biakin ah kan itlum ti lo ca ah 2007 kum dong khan Indianapolis Baptist Temple ah kan iṭhial. Atu tiang mahka ah cun kan ipum.

ICBC a dirh tu le a ngei tu hi Bawi Zisuh a si i, thluachuah a pe tu le a hruai tu zong Amah a si.