Ediṭha Aan

Hnulei ileh i nehhnu rian liam cia von thlir khi di a riam i, hmailei rian ca zongah tha a tlunter an ti. Bawipa rian kan ṭuan nak zong ah mah cu a si lai.

Bawi Kri le krifabu ca ah hin mah zawn cio in rak cawlcangh a si. Bawipa lo rian cu lim a um lo nain, kum caang chuak ah hmaa khat lengmang cu a liam ve. Mah kan hmazawn cio cu kum dongh caan kan phanh i kum thar aa thok lai ah hin hei thlir a nuam in a ṭhahnem ding a si.

Krifa upa nih kan hmazawn kan chuah maw, mino nih kan rian kan tlinh maw, ramthar rian kan ṭuan mi a hma a kal maw, ti tehna thlir i, kum thar ca’h hma laak awk zoh nak caan ṭha a si.

Pulpit committee nih si seh, EC nih si seh, cuhlan an khuakhaan ning a ṭhat nak zong, lungtonglo a si khawh nak zong, felfai deuh i zoh khawh nakding caan a si. Bu chung mitam sin in feedback hal le mitam hmuhning le ruahnak laak a ṭhat lio caan te zong a si.

Ngakchia hruaitu zong nih kan fanaule an ṭhancho ding ning tluk in kan ṭhanchoter kho hna maw, kan chimh hna mi hi saduhthah a tling maw, ti in, mah nih si seh, educational evaluation a thiam mi zong ruaih in si seh tah ve khawh nak caan a si.

Pasatorte zong nih, tukum chung ah zei bik dah kan ṭuan i, zei dah ka hluhchuah, zei bia dah kan chim, ka thawngṭha chim mi nih mi nun a tawng maw, leenkai hau lungrethei le miharsa ka hrelh mi an um hnga maw ti zong ruah ṭhan khawh ve nak caan a si. ■

ICBC Website

icbcsite.org
 

Tuchan ah pumpak hmanh nih website ngeih cio a si cang i, bu chinchin cu bu hme tete hmanh nih website an ngei cio cang. Angei lo mi cu ningzak aa si cang. Cu lio i USA Lai krifabu ngan pa khat i maivan-inn ngeih ve lo ding cu kan ṭaw tuk lai tiah peidek; kan krifabu hi maivan-inn ngei ve usi tiah EC meṭing ah rak caih a si i, Pu Ngun Cung Lian zuam nak in rak tuah a si cang nain ṭuanvo a la tu Mino bu nih tangka a liam khawh ti lo ca ah a thi. Kum hnih chung a thih hnu ah, kan krifabu santlaih lo zong ah a cang lai tiah nunter izuam a si i atu cu a nung ṭhan cang. Kan krifabu kong chimh nan duh mi nan theihhngalh an um ah cun chimh ding an si lai.

A URL cu http://icbcsite.org a si i, http:// telh lo zong in, icbcsite.org lawng address bar ah ṭial i Enter key hmeh ah cun a chuak ko. Mi chimh tik zong ah icbcsite.org ti vial chimh ah cun a za ko. Kan ram chung mi zong chim ve hna u.

Aa lim rih lo belte i, kan itinh ning nemmam a chuak rih lo. Hmanthlak zong taar leen te ding a si, “Zukthla” zawn ah khin. Atu belte cu kan taar rih lo. Nan fale an nak tuk i upa zong non-toih-lo nan lo ai kan ti ca’h si lo in , nu pawl tawhrolh baan sau he pumh nan hmang tuk ai kan ti ca zong ah si lo in, computer kan chamhbau ca’h a si. Hmailei i taar te awk ah siaherh mi nan ngeih ah cun webmaster kuat te ding a si lai. A quality a ṭha mi lawng taar awk ah ruah a si belte [kan “kharedit” a tla sual lai tiah. Kan krifabu teihkha ṭumter ding cu editor nih a duh lo].

Nubu, Mino le buṭhen dang le pasatorte zong nih nan cawlcangh le rian kong taar te ding a si lai i mah zong cu editor sin kuat ding a si te lai. Atu cu computer hman awk a um ti rih lo i kuat santlai a si rih lai lo. Aa taar cia vial khi a si rih lai.

---------

ICBC X’mas cu laksawng pek le ngakchia zoh vial a si tawn i, fa-ngei ca’h cun mah fale zoh cu a nuam ko lai na’n, fa-ngei-lo ca’h cun zei a um tuk lo i; mah nuamh nak ikawl cia a hau. December 3 le 16 ah zan hrawng ah na duhmi ihunh in http://cacc.info ah kal law nangmah lawng zan tlai ah hla ngai, ca rel. “Puai Kawh Nak” zong khi rel. Sunglawi in caan hmang.

--------

Aho Inn Ṭamh Dah…

Krismas thla a thar cun inn ṭamh cio a si lai i, aho inn ṭamh dah upat awk a tlak bik, aho te chung nih dah Bawipa an sunhlawih bik, ti zoh a si lai. December thla chung khi a chektu an vaak lai i khualeng in Laimi inn kip an zoh lai. Inchung zong an zoh lai. Hmah pek ding ning cu:

Icycles (atlawmtam zoh in) 50
Nativity (cawrawlkuang le a pawng mi) 60
Zisuh le a nu lawng 40
Tuu 30
Bethlehem par 5
Bethlehem arfi 20
Vanmi 30
Mifim pa thum 20
Tukhaal ṭiangṭhunh 0-10
Krismas thingkung 30
Krismas card thlai ah 20
Puphawng thlai ah 10
Krismas Pathian hla 30
Sawmpalak bu 30 [pang vel i nan benh ah cun sawmpalakbu a si ti lo. Sur bantuk in zam ding.]

Baibal chung Krismas tuanbia i a um mi le aa tlaak rua ti i kan thim mi an si i hmah pek awk an ṭha.

Baibal i a um lo mi, Bawi Zisuh sunpar nak a chut mi pawl cu Krifa mi nih kan hman awk a si lo ca ah a hmang mi cu hmah pek lo in zuh leilei ding a si lai. Zuh ding zat cu;
Santa Claus -40
Sazuk -30
Luchin sen -20
Holly nge -10
Ṭiangṭhunh ṭial 0 [Santa ta si dawh a lawh ah cun]
Holiday Greeting card -20
Krismas love song -20
Sweet December ni i inn a ṭamh cang mi ko mifel ah ruah an si lai. A hnu deuh poh fel lo chin.

Nikum kha Lg. Cer Chin Par (Parkuk) nih Krismas inn ṭamh nak ah $200 a hman i Sweet December ni bak in Bawipa chuah sunglawi tuk in an don. Tukum aho dek. ICBC inn pohpoh ah Bawipa sunglawi seh.
[icycles cu meiceu tete khi]

Lawmh Bia

A ka hring tu ka pa i 2008 October 30 ni i thlaankhor a kan liamtak ah krifabu le mi tampi nih kan ngaihchiat ihrawm in dawtnak nan langhter i, hlaphantu i, “Kannih nih vanchiatnak ah kan ruah, dawtnak a langhnak tu a si” a ti mi zong kan lung ah a chuak dih. A kan ṭhutpi mi le tangka i a kan bul mi nan dihlak cung ah lawmhnak kan chim cawk lai lo. Mirang khan ah cun Thank You card te zong in lawmhnak langhter awk a si hnga nain, Laimi cu aa theithiam lawngte fawh kan si ko tiah hi cazual te tu hin kan ilawmhnak kan langhter. --Ceu Hlun

October Rolung

Ṭial dih cia in a um na’n a phawtzam aa tlolh i mitam zaapi sin a phaan rua lo. Kan krifabu maivan inn tu ah rak zoh te u, Vol. 4, No. 5 khi.

Thanksgiving cu zei?

England ram ah biaknak lei i neek mi an rak um i, biaknak zalonnak duh ah Holland ah an pem. An fale Holland holh in an holh, Holland phung in an nung hnek. An nu le an pa an thin a phang i ram thar an kawl. Lawngpi an icit i rilipi tan in nitlaklei ah an ra i Amerika hi an phaan. Ram thar ah cun dokdok catcat in an nung i thlai cu an cing. Kum a hung voi, khuasik chung ei awk te an hun ngei. An kum ṭha voi lawm cun puai an rak tuah. Vuiar tehna tehna an raw. Thlai Thar Puai tiawk a si ko. Mah cu Thanksgiving an ti. November zarh li nak nilini lengmang khi a si. Laimi he cun apel hmanh aa pehtlai lo.

Black Friday, Thil Cawk Ni

Thanksgiving thaizing khi Black Friday an ti i mah ni ah khin thil man an ṭhumh. An ṭhumh ding mi dealtaker.com le blackfriday.info ah ah zoh cia khawh a si. Mah ni cu dawr an lunh tuk i mawṭaw toh nak belte a har ve.

Ralrin Awk

Parking lot i mawṭaw na toh mi hnulei thlalang ah catlap aa benh ah cun, va chuak in va hlip colh hlah. Mifir nih an in bawh a si kho. Na chuahkar ah vik tiah lut in na mawṭaw zong, na tangka bawm le na caherh zeizong an rak fir khawh. Na mawṭaw kha kaadang ah hei mong law mahka ah cun a cabenh cu va hlip te.

Vui-ar Rawh Ning

A sa pawng 5 nem nakding ah suimilam 24 a rau, daihkuang chung i chiah ah. Vuiar ngan cu daihkuang ah ni 5 chiah ah a nem. Room temperature ah pho lo ding. Ti i ciah ah cun ziplock phun in fun ding a si, bacteria lut hlah seh, cun a sa nih ti dawp hlah seh tiah. A sa pawng khat lengmang nemter nak ah minit 30 a rau, ti i ciah ah. Suimilam cheu dan lengmang ah ti thlen ding. Microwave i nemter duh ah cun a fun nak hlih dih a hau. Cun ca aa ṭial ning in tuah ding a si. Microwave i nemter mi cu chuan colh a hau. Microwave tu cun rawh lo ding. A cokcawdil le a hngawng khi a chung ah an sanhchih ṭheu i rawh lai ah cun chuah ah a ṭha. Vui-ar pawng 8-12 rawh nak ah sml 2¾ - 3 a hau, a chung i changfun a um mi cu sml 3 - 3½ a rau. Preheated 325 °F oven ah rawh ding a si.

Olive chiti le khachuan dip tehna cite he thuh hmasa ah cun hmui huar in a um lai.

Exodus Thawngthanh

Exodus Refugee Service i Program Manager Samantha Briggs nih hiti hin 11/6/08 ah thawng a thanh;

1. Ramdang-um mah chungkhat USA ram chung i auh kong ah hrokhrol thilti tampi USA cozah nih a hmuh ca ah, mah chungkhat auh nak kong ah phung thar a ser lio i mah chung cu chungkhat auh kong zei hmanh a tuah rih lai lo. 2009 March ah mah phung thar cu chuah aa tim. Mah phung thar ning ah cun, chungkhat kawh-auh nak ah cozah zung catlap hmai 9 le DNA test a hau cang lai. [Ramdang-um nan chungkhat i UN sin nan address an rak pek hna tik ah anmah zong nanmah zong nih ca hmai 9 minthut i an rualchan taktak nan si le si lo DNA itest a hau cang lai tinak a si.]

2. Refugee phaan thar pawl rian kawlpiak i, kawlpiak man tangka laak hi cozah phung nih a onh lo. Mahti i refugee sin i tangka laak khawh nak ah cun cozah laisen an ngeih a hau. Athlite i tangka laak cu mi eihmuar a si. Exodus i kan zohkhenh lio mi hna humzual nak ah, atu cun Exodus nih mahti i tangka a la mi cu a hlat hna lai i cozah sin ah a phuan colh lengmang cang hna lai. Mahti i zatlaang mi eihmuar cu cozah sin ah sual a si ca ah cozah nih taza cuai khawh a si. Mah bantuk nan hngalh ah cun kan chim u.

3. Mi acheu nih bawmhnak hmuh chap duh ah nan kan hlen. ‘Mahti cun chim u law bawmhnak tam deuh nan hmu lai’ tiah midang nih ruahnak an in pek hna ti zong kan theih. Mahti i a kan hleng mi cu nan bawmhnak hri kan chah colh lai i, hihnu ah zei bawmh nak hmanh kan in pe ti hna lai lo.

Samantha Briggs
317-927-0836
sbriggs@exodusrefugee.org

US Cozah Phung

US rampi phung le Indiana ramkulh phung hi na zulh an hau. Na zulh lo ah cun thong na tla kho, asilo ah, daan faak na liam kho. Sualnak hrang (crime) ruang i an in tlaih ah cun rian hmuh nak a’n dawnh khawh i green card hmuh nak zong a’n dawnh khawh. Phung biapi deuh deuh kan von taar:

1. Kum 21 tang mi zu zuarh/pek hi cozah phung he aa raal. Kum 18 tang mi kuak pek/zuarh cu cozah phung he aa raal.
2. Kum 21 tling cia lawng nih zu din khawh a si. Zatlang hmun i zu na din ah cun dan na liam kho. Zudin le mawṭaw mongh na kemh kho lo.
3. In duah cu cozah phung he aa raal.
4. Ziknawh cu US cozah phung he aa raal. Pelek si seh, cozah rianṭuan midang si hna seh, zik na nawh kho hna lo, tluanhtlamh nak na pe kho hna lo.
5. Mi inn ṭhing ah thil na la kho lo; cozah phung he aa raal.
6. Refugee aho poh an um nak an iṭhial fatin USCIS sin ripawt a pek a hau, Green Card an hmuh hlanchung poh.
7. Ngakchia kum 12 tang anmah lawng umter a ngah lo.
8. Na chungchuak fa cu kum 18 an ti tiang tangka in na bawmh hrimhrim hna lai, na sin i an um lo zong ah. Mah cu cozah phung i a hauh mi a si.
9. -Cozah sin hmahpung ṭin lo mi mawṭaw si seh, insurance tuah lo mi mawṭaw si seh, mongh cu phung buar a si.
-Riit bu in si seh, si i hmeh bu in si seh, mawṭaw mongh cu phung buar a si.
-US mawṭaw mongh nak laisen lo i mawṭaw mongh cu phungbuar a si, tlaih nak a si.
-Pum ihren lo i mawṭaw mongh si seh, icit si seh phungbuar a si.
-Nau him nak ṭhutdan lo i mawṭaw i nau phorh cu phung buar a si.
10. Riitsi zuar, cawk le hman cu phung he aa raal.
11. Bawmhnak hmuh duh in si seh, ram chung um khawh nak hmuh duh in si seh, thil dang hmuh duh in si seh, lih chim cu phung he aa raal.
12. Sualpi awk ah si seh, tangka lei i miak awk ah si seh, minung pakhatkhat US chung i luhpi/luhter cu phung he aa raal i thongtlak nak zong a si, mah ram i kirter nak zong a si.
13. Laisen iken lo in nga na siau kho lo, sa na zul kho lo.
14. Na chungkhar aho he hmanh ihṭi (sex tuah) a ngah lo (na nupi/va ti lo cu).
15. Lam a tan nak zawn lo i na tan ah cun dan na liam kho.
16. Lam pawngkam i hmunthur na hlonh ah cun dan na liam kho.
17. Indiana chung ah, kum 18 tling cia lawng nupi a ṭhi kho, va a ngei kho.
18. USA chung-um kum 18 le 25 kar pa pohpoh Selective Service ah ipek hrimhrim a hau, a herh sual tik i ralkap i laak awk ah.
19. Laisen ngei lo in si seh, midang airawl in si seh, apahnih in si seh, kaadang ah tangka na kuat ah cun dan na liam kho.
20. Lainawn cu, thah sual a si hmanh ah, phung he aa raal. Thahsual cu manslaughter ti a si.
21. Na takpum, langhter awk a si lo nak zawn, zatlang hmuh i na langhter ah cun dan na liam kho.
22. Mah nupi/va si seh, fale si hna seh, thongh, bengh, tlerh le hmuhsep cu inchung cia i sual a si. Thong na tla kho i na fale zong cu laakpiak na si kho, na hmusep hna ah cun. Na ram i kuat zong na si kho.
23. Pelek bawi cu a nawl na ngaih zungzal lai. Na ngaih lo ah cun thong na tla kho.
24. Sex i tangka phal/hlawh cu phung he aa raal.
25. Mi tlaihhreem na tuah kho lo.
26. Fir na fir kho lo.
27. Ngakchia kum 6-16 cu siangin an kai hrimhrim lai.
28. Kum 18 tang ngakchia he nu le pa sualnak tuah khawh a si lo, an duh ve hmanh ah.
29. Rianhmun i hor nak bia le umtu hman cu phung he aa raal.
30. Dawr in si seh, thilzuarnak hrawl in si seh, zuar thil a man pek lo i laak cu dawrthilfir a si. Phung he aa raal.
31. Kuak zuuk khawh a sii lo nak hmun tampi a um.
32. Zatlang hmun i zunte zun si seh, zunpi zun si seh, a phung a si lo.
33. Raithawi nak i saram thah si seh, mah zuat mi saram pamh le hramh lo si seh, ei awk i mah inn i sa thah si seh phung buar a si.
34. Mi hmun kulhchung ah nangmah si seh, na saram si seh, nan pahnih si seh kal cu mi thil sual bantuk a si.
35. Thil hrawh cu phungbuar a si, zatlang thil hrimhrim cu.

Riitsi zuar, inn duah, lainawn, ram hraan tehna bantuk sual pipa na tuah ah cun na refugee sinak si seh, zungzal um khawh nak (green card) si seh cozah nih a’n chuh ṭhan khawh.

[Mah ca hi Neighborhood Christian Legal Clinic rianṭuanmi Kari sin i kan hmuh mi a si.]
--------

Rolung

Rolung hi thla fatin chuah awk i ruah mi a si nain, computer itinzo lo ruang ah nikum kha oi 8, tukum oi 6 lawng aa chuah. December thla zong hi computer hman awk ngeih lo dawh kan si ca ah chuah lo dawh a si. Kumthar ah cun committee thar nih hma thar an laak cang lai i anmah cawlcangh ning in a kal te lai. Rolung a chuak cia vial sunhlawihte le thinfualte i a rel tu nan dihlak cung ah kan ilawm. Krismas lawmhnak nan chung ah tla-ciaimaite’n um ko seh. –Ediṭha Ceu Hlun