Rolung
Indiana Chin Baptist Church,
U.S.A. |
|
Ramdang vawlei i um ah cun Lai nunphung a hau ti lo ti in Laimi acheu nih an ruah sual ṭheu. A si lo. A vawlei nih a ngeih lo; a minung nih a ngeih. ‘Zei nunphung a hmang mi mibu sin ah dah ka um’ ti tu hi zoh ding a si. USA i Laimi kan ra peem tik zong ah, Mirang sin kan um/chuahlangh nak ah cun Mirang mit he aa rem mi hrukaihning in ihrukaih a hau. Laimi sin i kan chuahlangh tik belte ah cun Laimi mit he aa rem ning i ihrukaih cu a hau ve. Laimi sin i pheibom lang taiphor ching tuk ivenh tehna, ri a langhter tuk mi tawhrolh tet tuk ihrolh tehna hi ningfim lo ah a cang deuh ko. ICBC ah hin mi kan ichap ciahmah i Malay i a hong lut thar pawl nih ICBC hi hot ngai i ipumh nakding zong ah ruah sual a fawite. A si nemmam lo. ICBC cu miningfim um nak ding a si. Nu tling i tawhrolh ṭukṭak he ipumh si seh, pa angki khawt ihruk tehna si seh, pa i jean tawhrolh le T-shirt he pulpit kai tehna si seh, krifa upa i leather jacket he ipumh si seh, mit an do deuh tawn ko. ‘Mah hi cu zei huaha a si bal lai lo’ von ti awk zong in a um i, mibu zeirello le serhsat zong a lo tawn. Laimi mibu sin i chuahlangh tik ah, Laimi mit i aa rem mi thilthuam te he nan kan chuahpiak ah cun mibu nan kan upat ah kan rel. Pathian biakin hrimhrim cu lungthin felfai te le thilthuam ningfim te he rat nakding a si. <><
Oikhat cu, phungchim pakhat nih tangka $20 ca aa
tlaih i mipuum 200 hrawng cu a hal hna. “Mah tangka phar kul hi a duh
mi nan um maw? Nan um ah cun ka’n pek hna lai” a ti hna. Mi tampi nih
an kut an thlir. Tangka cu a kut in a von hum i itom dik lakin a von
hnuai. “Khah, atu tah nan duh ti maw?” a ti hna. Kut a thlir kel nih
cun an thlir ṭhiamṭhiam. Mah cun tangka cu a thlak i a ke i von
lamhchih leen. Mah cun a von char im “Atu tah nan duh ti maw?” a von
ti ṭhan hna. “Duh” an ti i mi tampi nih cun an kut an thlir ṭhiamṭhiam.
Mah dih cun mah hi a chimh hna: Kannih hna zong kan nun zoh ah hin, kan ithim sual mi nih siseh, nun lam har nih si seh, a kan cilnaan i, achel ah kan kiak dih, achel ah kan sop dih, achel ah kan tla i kan sawn dih tawn ko. Zei tluk lo, zei santlai lo i kan iruah chel zong a tampi ko. Asinain, kan cung i zei thil a tlun hmanh ah, zei i a kan rialdip hmanh ah, Pathian mit ah kan man a ṭum lo. Kan kiah dih zong ah, kan sawn dih zong ah, ka thur dih zong ah, Anih ca’h cun kan sung tuk ṭhiamṭhiam ko” a ti hna. Kan tuah mi le kan sii mi nih kan man a khiak bik lo; aho muicuang (aho ta) kan sii tu nih kan man hi a khiah. --------- Bawipa hmaiah hin dai tein um ko law zeidah a tuah lai ti kha lungsau in hngak ko. –Salm 37:7 ----------
Atu hi sikpaar kan phaan. Sikpaar cu thla min a si lo; fur dongh hnu khuasik tlak deuh hlan caan khi a si. Fall ti zong, Autumn ti zong in an ti i thing hnah ṭilh caan a si. September 22 khan aa thok i December 21 tiang a si lai. Mah caan chung ah hin kan pawngkam thing hi an hnah an vaang lai i an idawh tuk lai. Mah cun an ṭil lai. Vaute ah an corh ṭhan te lai. Ṭhaal chung hruk mi thilthuam cu kuang ah khumh dih i khuasik thil chuah a hau cang lai. Lai Ram ah cun cangai khorh le ngata riah tik a si. Tlawmpal ah fongvoi bauh le cep tunh a cu lai i thlai thar he Pathian thluachuah lawmh a si lai.
Tukum nak hmanh in hmai kum hi kan Lai Ram ah rawl har dawh a si. Tha ilaak cia le sem irel cia kan hau. Mawṭaw ṭha le computer ṭha cawk aa tim mi zong nih man niam deuh te kan cawkpiak ko u.
Zurit bu mawṭaw mongh kong chimh nak nizan i aa tuah mi ah minung 100 leng an kai. Neighborhood Christian Legal Clinic cung ah kan ilawm. An chim mi chung in cinken awk biapi: -Pelek i thaw tah nak chemter tik ah al hrimhrim lo ding; ṭaang thaw in ṭhate’n chem ding -Pelek i bia an in hal mi poh leh dih a hau lo; ‘leh ka duh lo’ tiah ti khawh a si -Pelek i tuahter mi poh al lo in tuah dih ding -Zung chuah tik ah phungthiam ton hmasa tal lo cun, mah nawl in ‘ka palh’ tiah min thut lo ding
Rev. Dr. Hre Kio nih, Guam kan um lio ah “Mainland nan phan lai i, kan Biakmi Pathian dah tilo cun a biapi bik cu: 1) Ei, 2) Ih le 3) Rianṭuan a si” a rak kan ti. Cu kong i ka siaherh bia keimah tonmi le Bestbuy i an kan chimh mi ka chim lai. Ih hi pum caah battery rawn he aa lo ti a si. Mawṭaw gas he zong tahchunh khawh a si. Gas aa rawn lo ahcun mawṭaw mongh khawh a si lo bantuk in, battery a haumi thilri paoh battery loin rian an ṭuan kho lo. Gas asi ah, battery a si ah aza i rawn lawngah ṭha tein rian a tuan kho. Baibal le Hlabu chung zongah, ‘nupi-ṭhi rat tikah mei-in ziinan rawn cia in’ tiah, timhlamahnak a kan chimh kha theih peng in. Na ih a tlawm ahcun luhri-fah na ngei lai i, na thin a tawi lai. Tlawm tuk ih nih chan zong a tawi ter. Sibawi nih ih hi zeitluk indah san a tlaih tiin, chizawh ah an hlathlai/hneksak ti a si. Rawl loin ni kua a nung i, ih-lo incun nithum long a nung an ti. Kan ram ah rawl-ulh thlacam a lar lio hrawng ah athla rau in an um kho nain, mitlawmte long an si. Ni sarih a ul mi hi an um pah len. Ni thum hi cu keimah zong ka ulh bal. Ih-lo belte cun zan hnih ka peh kho bak lo. A thla in a dam-lo hna khi tuak ulaw, rawl ṭhaṭhi ei an um bal theng lo ti kan theih. Ih caan hi nikhat ah mah vial hi a za ti a si: Hihi minug thisa nih a herh tiah, an tuakmi a si. Lailei khi kan rawl-ei a chia ko nain, kan ih caan a tam caah kan ngan a dam tiah ka ruah. US um fanau hna hi ruah tluk in an ṭhang in, an ngan cio lo hi an ih caan a tawituk a si hnga maw tiin ka ruat tawn. Laimi nih na mitkuh a thaw maw tiin, kan ihal tawn hi na mitkuh a cim/vuai maw tinak a si. Cu biahalnak nih cun ih hi a biapitning a langhter ti khawh a si. Mitkuh a cim ahcun rawlei-kaa zong a thaw i, umtu zong a nuam i, hmai zong a panh. Mitkuh vuai lo nih thintawi, rawlka thawt lo, le cumpi tlangrai a chuahpi. America ah cun chun le zan hi mahle rianṭuannak nih a ngeih caah aho paoh kan itheihthiam a hau. Rawl hi pum caah a biapit bantuk in, ih zong pum caah ngandamnak a si ve. –Rual Bik ---------
|
Remh A Hau Lo Maw? Mipuum kan tlawm tuk i kan pumhning hi thlen deuh ah a ṭha men hnga. Chungtel kan tam rup ICBC mipuum kan tlawm kong hi 2008 March 9 chuak Rolung ah rak ṭial cang a si. Atu zong zoh tik ah zei kan ihlei rua lo. Aziah dah mipuum kan tlawm hnga? Hmuahchih in von zoh tuah usi. 1. Kan pulpit hmanning: Chanphanh kan izuam cu a si ko nain mi lungthawh nak lei kan panh deuh rua lo. Laimi cu pulpit tin cio a duh mi, tin lo ah lung a tho lo mi, ṭhial bak a duh mi aa si i, cu lio ah, caan tin cio um lei lo in pulpit zong a hmang law nih hman chin lengmang ding bantuk in a um i a si ding ning ralkah a si. Zoh hmanh usi: Pumhuk a tlau. Hramthok Baibal rel le thlacam a tlau lo nain midang nih tin ti lo ding a si cang. Mitam rak thiah tawn mi Zapi Thlacam um ti lo in, Pastoral Prayer ti in pasator lawngte nih cam ding bantuk. Phung zong pasator lawngte nih chim ding bantuk. Phungchimtu Baibal caang thim zong pasator lengmang nih rel ding bantuk. A tidin awk zong pasator nih hunh ding bantuk. Chawnghlang rel hruai le thawhlawm ca thlacam lawnglawng zapi i tin khawh ding a si cang. Sharing tuah pah nak le Pathian sin i ilawmh nak chim nak chance a pit. Pulpit a hmang lengmang ding cu pasatorte, thawngthanhtu (secretary), hlahruai, chenglawi tum pawl le hlasami lawng an si cang. Krifa upa hmanh pulpit cu alang lawng in cuanh cang dawh an si. Mah bantuk mitlawmte thilti lawng va zoh lengmang ding tluk i a boring ding a um lai lo. Mitam lung thawh nakding ah cun mitam telter an hau. Cuca’h mitam itel cio khawh nakding in kan pulpit committee nih khua kan khaan piak hna seh law a ṭha rua hnga. 2. Kan worship style zoh ve tuah usi. (a) Praise & Worship hla sak hi acheu nih kan duh. Acheu nih an iziak lo ti a si. Cuca’h, pumh thok hlan i hlasak ah hin, thla khat ah zarh hnih P&W hla sak i, adang zarh hnih cu ZBC hla sak, ithawh cio, ah kan lung a tho deuh hnga maw? (b) Pumhuktu um lo hi pumh a rocaar deuh ko. Pumhuktu hi cu um seh law a ṭha lo maw? (c) Laimi cu mi tampi phungchim ichaan khi kan duh. Kan pasatorte phungchim hi an ṭhat tuk ko bu ah phungchimtu ithlen lengmang a duh mi hi an tam ngaingai ve lai. (d) Kan pumhcaan a tuan tuk lo maw? Hnawhsare i itimh i tuante i pumh chuah, zei tuah lo i nitlak um naksa cun thadam in 2PM ah pumh thok usi law, ih a calh tawn mi zong an tho manh hnga, ngakterual chung zong an iserh manh deuh hnga. (e) Pumpak i telifawn i misawm kan daithlang maw? Bu chung mi zong hi kan duhning aa dang liangluang i, zeiti i kan ipumh zong ah lungsilo tawk cu rak um phung a si ko. Asinain zei bantuk hi dah atam nih an duh i an lung a si bik ti hi cu hruaitu nih cun hngalh hrimhrim duh awk a si. Survey zong tuah awk a si ko, Bawi Kri le Krifabu ca ah cun. --------- ------- Coka ti hi a thiang ko e an kan ti lengmang bu ah Laimi nih coka ti cu din awk ah an rel lo i dawr zuar mi ti lawng din awk ah an rel ṭheu. Ataktak ah, akhoi hi dah takpum ca'h ṭih a nung deuh? Thawl ti a zuar mi nih cun, an ti a thian ning cu zei um lo khin an chim ko. Angaite ah cun thawl ti hi coka ti nakin pum him nak a si deuh hlei lo ti hi NRDC nih kum li chung an tah hnu ah an hmuh. Nai i an hmuh thar mi ning ah cun, thawl ti hi an thian ko zong ah, palasaṭik pung in an rawn hna ca ah mah palasaṭik cun hormone i a cang kho mi BPA le phthalates aa dawp khawh. Ni linhter ko ah a zual an ti. Mah BPA le phthalates nih cun duhsah in caansau ah paang hrawng harnak an tlunter khawh i khensar an chuahter khawh ti a si. Cun thawl ti acheu hi aho i zohchek taktak lo zong in zuar khawh nak nawl a um ca ah zeitluk i an thian aa hngal lo an ti. Acheu cu coka ti an laak i an rawn mi an si ve ko ti a si. Coka ti hi cozah i a thianh cikcek cang mi, zatlang ngandamnak ca’h a ṭha a ti cang mi, a si. Coka ti ah hin minung i kan herh mi mineral phun hnih a um i mah cu kan miak mi a si. Asinain coka ti zong hi him nak a si dih ve lo. Rungrul thah nak i an paih mi chlorine (a haw a umter tu) khi caan sau ah cun pum ca ah a ṭha lo ti a si ve. Mahti i an si kun ah zei ti dah kan din kun lai ti hi hal lo awk a ṭha ti lo. A ṭha bik i an ruah mi cu coka ti i a zeet nak (filter) bunh a si. Mahti i zeet cia mi coka ti cu him dih nak a si lo hmanh ah ti dang nak cun a ṭha bik ṭhiamṭhiam an ti. ---------
Ṭhal chung ah ngasiau Laimi tam nawn an tlaih hna; siaufung fung thum nak tam an hman ruang ah, nga hme tuk an laak ruang ah, laisen an isanh lo ruang ah, sur an cheh ruang ah, mei an kau ruang ah. Acheu cu tangka liam in a dih. Acheu cu zungchuah hrimhrim a hau. Zung cu Spencer khua ah chuah a si, Indianapolis in meng 60 fai ah. Zung man, dantat le a kal nak cawhla he cun tampi a dih. Holh let an hmuh hna lo ah cun voi bil kal a hau fawn i hna a hnok taktak. Phung hngalh lo i tuah sual mi a si zong ah cozah phung buar cang hnuhnu ah cun sual phawt a si. Cuca’h hawi zong nih an tuah cio ti sawhsawh in zei poh tuah ngam ding a si lo.
October thla hin cun Rolung ediṭha aa manh deuh cang lai. Telephone chawnhpiak a herh mi nih si seh, ngasiau ruang i zung chuahpi le holh leh piak a hau mi nih si seh, Green Card sok nak form ṭialpiak a herh mi nih si seh, computer cawkpi le internet le webcam tehna bunhpi a herh mi nih si seh, ramdang um chungkhat sin e-mail i hmanthlak kuat a duh i a thiam lo mi nih si seh, restaurant i rawl eipi tu (dangh awk) a herh mi nih si seh, ṭelifawn 881-2526 kon ceuhlun@yahoo.com kon in auhkhuanh khawh a si lai, ahlankan in.
October 12 ni khi Columbus Day a si lai. Christopher Columbus i 1492 kum i Amerika a rak hmuh ni a si. Krifabu chung ah cun October zarh hnih nak cu pasatorte sunhsak zarh ah hman a si lai, Mirang krifabu tampi ah. October thla chung hi Amerikan phung in “thla puai” a si lai i thla dongh zan khi mithla vah zan a si lai. Mithla lawng lo, hnamruung, milukit, thinlang, pheiphor, khuachia, vaanghru, pinu, caangcuu le khualtu tehna zong an ithawh dih lai. Lasi belte cu tili kam ah zan thlavang hawr in maimu a khek hiarmar lai an ti, mai a tam tuk lio a si i.
# Biakin sak nak tangka khawlh zarh, bawipa zanriah hman zarh, member thar lawmhluh zarh, bawhte thlacamh tuah zarh ti i thla khat chung i voi khat cio an um ding hi a ṭha an ti. # Bu dang biakin i pumh a hmang mi hi Pathian maw an dawi hnga thlitu dah an ti. --------- Rolung chuah awk ah
cabia kan har ngaingai ko. A um lo tik ah a ṭial law nih ṭial a si i a
ṭial tu ca zong, a rel tu ca zong ah lung a si deuh lo. Herhpang nan
ngeih mi a um zong ah, lungsiaherh bia nan ngeih mi a um zong ah, rak
thawh i ceuhlun@yahoo.com ah kuat ding a si. Amah lawng i ca kip
khawmh le ṭial cun a teem. |