ICBC Rolung
Indiana Chin Baptist Church,
U.S.A. |
|
Mi upat hi mizin phung a si. Ahleihluak i upat pek belte sallungput a si. Miluat nih cun azatawk in mi upat pek a si. Laimi hi miphun zin kan si bang in, mi upat hi kan ngeih hrimhrim a si. Pule upat, nu le pa upat, sazate upat, mah nak upa upat tehna hi kan kokek nunziamawi an si. Kan theih tawk le kan hmuhtawk ah, hlanliote’n upat awk cu atawkzawn in kan upat hna, aho i nahchuah awk lo te’n. Mahti i azatawkte i mi upat cu kilkawi awk tlak kan nunziamawi a si. Mirang cozah i an kan sal hnu bel ah Mirang bawi cu ‘bawipa’ tiah rak auh an si, sallungput in. An hnu i missionary vunraang an rat tik zong ah miuk Mirang bawi kan biak hna ning in kan rak biak hna i, ‘siangbawi’ ti tehna, ‘Kharson bawipa’ ti tehna in auh an hong si. Anmah sin rian a ṭuan mi le an hnuzul vialte zong bawicoh le zohcho in, acheu cu an sining leng tiang hmanh in upat kan coh hna. Sallungput le salbiangcawi a lo kho lo. Salbiangcawi cu ralkap le cozah zung chim rih lo, kan zatlang nun hrimhrim ah zawn tampi ah a lang. Biaknak tlaangnun tiang zong ah a lang ṭheu. Krifa lei upa le hruaitu upat kan coh hna ning, cataang sang kan hleih hna ning, minhlei kan bunh hna ning, thiltikho kan zohcho hna ning, mi min tian tik hmanh i alphabetical order hman lo i biapitter mi min ṭial hmasa tehna zong hi mah a langhnak cu an si. Miluat nih cun ahleihluak i mi upat coh cu an hrial lai. Sallungput cu an hlonh lai. Zalonnak ram USA ah hin freedom le equality cu tlaihtung ah bunh an si i, ‘aho hmanh nih an kan iap awk a si lo, aho hmanh vo hlei kan serh hna ding a si lo’ ti a si. Bawi don zong a um lo. Duhdanh ngeih lo phung an itlaih ca ah aho hmanh hawi hlei i cawithlir lo an izuam. Zeitluk thiamsang zong mibu hmai i hlorh le an kong chim luaimai an tuah lo. An sining te le azatawkte tu in an upat hna, an chawnhbiak hna. Laimi zong kan kotho i kan rak ngeih tawn mi miluat lungput hi kan hlam a hau. Aho hmanh kan i-iapter hna awk a si lo. Mizei hmanh ahleihluak in upat le thangṭhat kan coh hna awk a si lo. Mah cu kan tlaangnun zakip ah a biapi i, biaknak kulhchung zong ah a biapi. Krifa tlaang (society) i kan hmuhton ṭheu mi cu, mibu hmai i mi pakhatkhat hlorh luaimai hi a si. Asilo ah, aziaphialte i biapitter. ‘Upat hrimhrim u, ṭihzah hrimhrim u’ ti nak bantuk deng a si. Mah cu mibu ṭihzah lo le upat lo a si. Mah cu kan Baibal he aa kalh. Cathiang nih cun, “Aho hmanh thangṭhat hlei hna hlah u, aho hmanh namh hlei hna hlah u” a kan ti, 1 Korin 4:6b ah. Azatawkte i mi upat kan hman lawng ah kan miphun kotho nunziamawi le chan thar vawlei i non-discrimination phung le Baibal cawnpiaknak kemh in a tling kho hnga. ---------
He ENTERS our life, SCANS our problems, EDITS our tension, DOWNLOADS the solutions, DELETES our worries and SAVES us. 6-nak
Tukum Bawipa Tho cu Vaute 23 ni ah a si hnek. A tuan taktak. Mah tluk tuanh hi cu kan chan chung ah kan tong bal lo i kan tong ti pek lai lo. A tong bal cang mi cu kum 95 tal si a hau. A tong rih ding mi cu hi hnu kum 220 tal nun rih a hau. 1913 kum ah March 23 ah cun a rak si cang i 2228 kum ah a si ṭhan te lai. Mah nak tuan cu March 22 ah a si kho i 1918 kum ah a rak si. 2285 kum ah a si ṭhan te lai, hihnu kum 277 a rauh ah. Easter hi kum khat le kum khat a ni aa khat lo. Zeitin dah a si ti ah cun, Easter cu Spring Equinox an ti mi March 20 hnu i thlapa bial hmasa bik chang zarhpi khi a si ding a si, Hebrew i an Lanhtak Puai an rel ning ah. March 20 dih bak i thlapa bial colh le zarhpi si colh cu a har ngaingai mi a si.
Good Friday lai zan khi cu nan computer hmai ah ṭhu u law http://cacc.info khi kau u law paraivet caan rak hmang cio u. Vailam ah a’n hruai hna lai. Zarhte zan ah khin cacc.info ṭhiamṭhiam ah cun va kal ṭhan u law kan Bawipa Zisuh i thih a tei nak va zoh u.
Zarh fa Pathian sin i chaw kan rak chuahpi mi zoh tik ah cheu-hra-cheu-khat cu a tam pah sawk na’n thawhlawm a tlawm ngaingai. Cheu-hra cheu-khat $5300 hlei a si lio i thawhlawm $250 hrawng lawng a si cu, Pathian hi amah ta lawng kan pek, kanmah ta kan pe siang lo tinak bantuk a si. Pek lo awk ṭha lo lawng kan pek tinak zong a si. Mah hmanh cu micheu nih kan pe hoi lo; a pe law le a pe kel lengmang nih pek dawh a si. Pathian sin i aa lawm taktak mi nih cun cazin i min cuan nak cheu-hra cheu-khat lawng si lo in thawhlawm hrimhrim an bur. Mah nih cun zeitluk in dah Pathian sin ah an ilawmh ti a langhter.
Biakin i hla cauk ken hau ti lo in slide ṭha tuk in an kan tuahpiak i zaang a dam tuk cang. Atu cu kan rianh liopi a si rih ca ah hla bia zong, chawnghlang kan rel mi Baibal caang zong, aping apang i aa ṭial sual mi a tam pah rih—“vancung” zawn i “dancing” um tehna. A poi tuk lo zong an um nain acheu, ahlei in Baibal bia, cu remh hrimhrim an hau. Biana ah, “nawlngeihnak vialte pek ka si cang” ti ding i “nawlngaihnak vialte pek ka si cang” aa ti tik ah cun authority cu obedience ah aa chuah i Cathiang bia zong a si ti lo. Verb form a hmaan lo mi tehna zong a um pah lai. Kan krifa upate hi Lai Holh thiam thiam an si ko i ibawm in proof reading kan tuahpiak hna seh law lawmh a tam chin ko hnga. Cun Ṭ zong a tang kan deh piak hna seh law kan duh; a har mi zong a si lo, kan ca le kan holh upat zong a si i.
ICBC cu hruk-aih lei ah zoh chun awk si kan izuam hih! Nu nih hni (phun) ivenh ding. Tawhrolh sau he ipumh lo ding. A ri aa hngal tuk mi iti lo ding. Pa zong jean tawhrolh le T-shirt he ipumh lo in tawhrawlh tlem le angki baan ngei te he ipumh ding. Pulpit cung hrimhrim ah jean he kai lo ding. Music a tum mi zong tlornaal deuh te i ithuam ding in an chungkhat nih kan chimhpiak hna seh. Krifa upa zong nih leather jacket ihruk lo ding. Coat ihruk ding. Nutung hrimhrim cu hni he bak. Ngakchia zong tlavirverte in ṭamh ding.
Biakin hi chaw zuar nak hmun a si awk a si lo. Muko mekazin tehna, Bongva mekazin tehna zong mi krifabu chuah mi an si i ICBC he pehtlaih nak a ngei mi an si lo, krifa cawnpiaknak cauk zong an si theng lo ca ah krifabu chung ah cun zuarpiak ding an si ko nain biakin ngaingai ah zuar ding an si lai maw si lo ti hi biatakte’n ruah a hau. Biakin i zuar awk ah cun laak ding an si tuk rih lo.
Krifa Hlabu cawk awk a um ah cun cio ding a si. Hla cauk hi ṭhutpinak, lawmpinak, zanpumh, thlacam pumh, chungkhar pumh tehna ah iken ding a si. Hla-au irinh ding a si lo. Cauk chan tiang i hla au lengmang zong hi ningzah awk kan si cang. --------- |
Mipuum Kan Tláwm Tuk Hi Tah! Biakin kan iṭhial hnu le Kumthar hnu hrimhrim cun, ICBC hi zarhpini mipuum kan tlawm ngaingai. Aa pum mi zoh tik ah biakin hme te i kan rak ipumh lio zat ti awk ceo kan si, mi kan karh e kan ti bu ah. Zei ruang ah dah a si hnga? -Pumh-zuam-lo an tam tuk i maw Sonh awk a tam ko lai; nain zeitin ti usi law dah a
ṭhat deuh hnga ti lei tu atawinak in von caih usi law: Aho/ahote dah aa pum lo ti hi ngia kho usi, azanlei ah “nihin nan ipum lo, nan damlo dahra?’ ti hal tawn hna usi law, mahti i mihlam kan hman ah cun ‘an kan hlam ṭheu hi’ ti tal in an chuak deuh men ko hnga. Biana ah, pasator nupile le nubu nih zaanghlei cawi in ‘nang anih anih te chung’ ti in hei iphaw hna seh, aa pum lo mi chungkhar ngia hna seh, aa pum lo mi poh ṭelifawn in thawng hal hna seh law, cu ah cun pumh lo kan duh lo deuh phum ko hnga. 2. Pumh Caan: Sml 1:00 pumh hi a tuan tuk deuh tiah
ruah a um. Zarhpi zing cu ih zing a si i, zan sau ṭhut thaizing zong a
si ca ah thawh a hnu. Sml 1:00 pumh ding ah hin namchan in itimh a hau.
Mawṭaw cit awk a ngei lo mi sawm le laak caan zong a um tuk lo.
Ngakchia ngei le chungkhar rual ca ah itimh manh awk a har. ‘Kannih
chung cu kan ipum kho ti lai lo” a ti zong an um khe, 1:00 pumh a si
hnu in. Keimah pumpak zong zarhpi zing i tuah lo awk a ṭha lo mi ka ngeih lio a si rih tik ah, sml 1:00 pumh aa hrih hnu cun, anam i kaa nam bu ah, pumh hi tamlak ka ful cang. Thawngthanh zong ka thei kho ti lo. Kan krifabu ah zei a cang lio ti zong hngalh kaa harh cang. Pumh zong tha a tho setsai tawn lo. 1:00 pm pumh hi a herh maw? Indianapolis Laimi nunning le cawlcangning zoh in sml 2:00 pumh hi a za bak tiah rak ruah kha a si. Atu 1:00 pumh kan ti nak hi, hruaitute thanh ning ah, biakin hi 4:30 tiang lawng hman nak nawl kan ngeih ca ah, parawkrem sau deuh ngeih kan duhherh chel ah caan izuah cia usi ti ruah ah a si. Nain, atu tiang ah ṭhutfual nakding parawkrem cu kan ngei lem lo (biakin i chuah lawmh tehna zong a tlawm cang ca ah). Cun atu kan ipumh ning hawihna hi cu, arannak le atawinak in kan ipum i, pumh a tawi; sml 2 hmanh a rau lo. 3:00 pm ah cun kan chuak lengmang ko. I, sml 1:00 pumh hi, atu tiang ah cun, a ṭhathnem nak chim awk a um tuk lo. Mah naksa hin cun pumh caan hi sml 2:00 ah thok ṭhan usi law a ṭha deuh men hnga. Ziah tiah: • Ciammam deuh in iserh manh a si hnga. Caanngei zong pumh kal hlan ah itimh manh deuh a si hnga. • Mi thiar nak caan a lawng deuh hnga i kan bus zong nawl hnih thum aa nawl in aa let manh hnga i mawṭaw ngei lo chungkhar an ipum ve kho deuh hnga. • Pumh caan a hnut deuh nak biakin panh hau ti lo
in kanmah biakin te ah ipumh manh a si hnga. -------- Zingka rian kal caan i mi a sawm mi nih Sikkamawr
khualai in paat an tum lengmang. Mi a kan hlauh dih. Zangfahnak in tum
ti sawh hlah u. Sawmmi zong nih a’n sawm tu hna kha chim sawh hna u,
tum ti lo ding in. A si khawh ah cun, phone te tu zong in ichwn cia u
law, asilole sawm caan itiam cia u law daite’n ithawh u law a ṭha hnga.
Ngakchia hmanh school bus nih paat tumh in a sawm hna lo. An Kal Riangmang ICBC mi cheukhat hika ah rian kan hmu kho rua lai
lo e an ti i Texas ah an kan kaltak. Phu hnih an kal cang.
“Indianapolis um cu kan duh tuk ve ko nain rian hmuh dawh kan si lo.
Rian hei luh khawh hmanh ah hire a um lo mi rian an si deuh fawn lai.
Rian an kan kawlpi ning zoh tik ah le, aphaan hmasa luh hmasa ti zong
a si theng lo i zeitik i an kan luh lai nih aa hngal lo. Kan kal a hau
ko” an ti. Indiana Chung Mawṭaw Mongh Ning Lai Holh in a si. Cauk pan te a si nain a santlaih ding ning tah awk a ṭha lo. Icawk cio u. Nan siaherh mi zong cawk cemh hna u. Khaini cawk nakin san a tlai deuh. Phung pa khat buar ruang ah tangka tampi liam khawh a si, accident tong in minung le mawṭaw rawhral khawh a si. A cauk cu Chin Community nih an zuar.
>>Mawṭaw icit tuk hlah. Sualpang i a thi mi 20% hi
mawṭaw cit ruang i a thi mi an si.
Tuzarh Thla Campiak Awk Thla icampiak awk kan si zungzal ko bu ah atu lio
cu ahlei in atang i pahnih hna hi thla campiak awk ah kan hnakkar ah
an itenh i pumpak thlacam nak cio ah rak telh cio hna usi: An Ti • Vengsang kip i thlacam parawkrem tuah hi a ṭha
bak e, kan hruaitule cung ah kan ilawm tuk e an ti. Capo Pakhat hna an pasator sin ah an kal i, “Pasatorpa, inkhaan hmete i minung pa kua um cu acan in a cang lo e! Zeitin he kan tuah lai?” an va ti. Pasator nih cun, “A si ah cun, hiti hin va tuah tuah u: Maheh pa khat in caw u law nan khaan chung ah cun iumpi u, law ni kua a rauh ah ra ka tong ṭhan u” a ti hna. Maheh cu an cawk i an um nak khaan ah cun an khumh. Maheh fam nih, a haw a nam tuk. A awn tuk. Aa chok tuk i an puan vialte a lamh dih. A zun le a ek a si. An teem bak. Nikuanak ah cun pasator cu an va ton ṭhan. Pasator nih cun, “A si ah cun maheh cu va chuah cang u; law hihnu zarh khat ah ra ṭhan u” a ti hna. Maheh cu an thlah i zarh khat a rauh ah pasator cu an va ton ṭhan. Pasator nih cun, “Atu tah zeitin?” a rak ti hna. “Atu cu kanmah pa kua te lawng kan si cang i a nuam tuk cang” an ti. --------- Mi computer hlan chom lengmang in chuah a si i
Rolung hi lungduh in kan chuah lengmang kho lo. Zeitik i aa chuah nolh
khawh lai zong aa hngal lo.
|