Indy Rolung
Indiana Chin Baptist Church,
U.S.A. |
|
Ediṭha Aan
Lamhbak aa cih mi hleihlak khi lamhbak aa varh mi
hleihlak tluk in hmunsang a phaan kho ve. Aa varh mi cu zawh a sau ah
tha a ba. Aa cih mi cu sau zawh a fawi i lam sau phanh khawh deuh nak
a si. Thil hmetete hi an ṭhahnem ngaingai. Oikhat i hme tete, tlawm tete tuah cu lung zong nih a ngamh i, lung i a ngamh mi cu tuah deuh zong a si ca ah tlawm tete i ngiar nih hin rian hma a kalter i khuasau ah cun thil pipa tlamtlinh nak a si ṭheu. Ni khat minit nga kan chap tik ah, thla khat ah cun suimilam 2 le acheu aa chap; i kum khat ah cun suimilam 30 aa chap. Mah nikhat minit nga te cu nangmah iremh nak le thil hme tete chap nak i na hman ah cun kum khat a dih tik ah cun thil pipa a chuahcanh mi na si ko lai. Nifatin te tlawmtete in zawnruah le zaangfah hi kan nun ah chap lengmang usi law kum khat chung i kan chap mi hi hmuh tlak pi a ti hnga; i, kan chanchung i kan chap mi chinchin cu lau nak tlakpi a si ko hnga. Tlawm tete i na nunchung chap lengmang awk ah zei
dah naa thim lai? Ithim law chap hmanh. Zarh khat ah a tam lai, thla
khat ah a tam chin lai, kum khat ah a tam chinchin lai—na nunchung ah
cun tahkawhlopi na chap khawh lai, tlawm tete in. -----------
--------
1 Tim 4:8 Pum in thiam lakin cawnmi kha santlaihnak a ngei, asinain cu
bantuk santlaihnak cu donghnak a ngei; biaknak ṭhathnemnak tu cu
donghnak a ngei lo, zeicahtiah cu biaknak chungah cun Pathian nih atu
kan nunnak ca he hmailei kan nunnak ca he bia a kan kamh. Thongthlak cu hrenkhumh in duhmi tuahter khawh lo khi a si. Cucaah imprison hi physical lock up le spirit lock up tiah ṭhen khawh a si. Physical lock up cu tawngh khawhmi le hmuh khawhmi a si bantuk in hrial khawh a si hnga, nain spirit lock up cu tawngh khawh le hmuh khawh a si lo bantuk in feeling lawng in theih awk a ṭha mi a si caah ‘imprison’ ka si sual maw ti i check a hau ngai ko lai. Adang in chim ahcun mah le mah aa hreng mi ka si maw ti hi a si ko. America ram kan luh cangka in free land ka phan cang tiah hna a ngam colh. Asi nain hmuh khawh lo mi spirit or soul “lock up” ah a lut mi kan si kho men. Kan uar ngai mi freedom, freedom kan ti lengmang mi hi “freedom in the mind” a si lo ahcun freedom tling a si lai lo. Cucaah rak i theih lo kar ah ‘imprison’ si hi ṭih a nung ngai mi a si. Lairam Laimi hna nih America ah khuasak ning hi fiang tein vun hmu kho hna sehlaw “Phaisa cah” hi an thling a kik lai dah ti ka ruat tawn. Amerika ram kan phan cu Leiba chamnak ram phak he aa lo. Bill cu Lai holh cun leiba cawhnak catlap ti khawh a si. Leiba cawhnak catlap hi thla hnih/thum char loin um sehlaw mailbox ah aa tlum ti lai lo i vulei ah an tla viar lai. Apon in aa pong ko lai. Zeitluk in dah leiba nih mi a nenh khawh! Fact zoh hna usih! Mawtaw thar cawk ahcun thong 25-35 a hau [Canada tangka in—ediṭha]. Insurance ca’h $150 in 250 kar a hau. Parking man a um rih. Gas loin mawtaw a ril kho fawn lo. Mawtaw cu a baa in cawk a si i thla chiar te % in pek ahcun $250 in 350 kar cu pek a hau i insurance le gas, parking he fonh ahcun $400 in $600 kar cu mawtaw man ah thla chiar a kal kho. Inn cawk duh ahcun ting 2 in 4 kar cawk a hau. Aba thiam thiam in cawk asi fawn. Thla khat ah $800 or 1000 cham in kum 30 chung cham ding in cawk ding a si hnga. House insurance a hau i vulei man cozah sinah pek a hau fawn. Inn hmun kau deuh ngeih hna hi duh ding asi lo. Gas, hydro, le water tbk man he fonh tikah monthly in $1500 in $2000 kar deng cu inn man ah a kal i pakhat thlahlawh nih a zo bak ti lo. Khattalei in life insurance, pension plan, credit card tbk nih hna an hnawh tuk fawn tikah pacang cu nikhat rian off hmanh a duh ti lo. “Imprison” si hnu ahcun Tlaang thawhbur ah thazaang chuah khawh a si ti lo. Mirang nih hawi sinah a chuak lang lo mi cu “idiot” an ti hna i duh zong duh lo zongah hruh an co cang. *Imprison* in zeitin dah kan luat lai ti hi ruah a hau ngai mi a si. America ah cun mawtaw thar a caw mi le inn lian pi a caw dingmi cu millionaire an si lai an ti. Cun, 1st buyer nih thil thar cawk phung a si lo tbk deng in unwritten law an ngei. Cucaah Laimi nih izuam phun in mawṭaw ṭha, mawṭaw thar, inn lianpi, inn ṭhapi cawk hi America mit in zoh ahcun millionaire le kan si fawn lo tikah mah tein “imprison” ah a kalmi kan si ko rua ti hi hmuh khawh ngai a si. Mawṭaw ṭha a caw mi nih zingka in rian a kal i parking ah a mawṭaw cu ni a emter, ruah a sur ter, snow a tlakter hnu ah zanlei ṭinnak ah a hman. Inn lianpi a caw mi nih zingka tein rian a kal i zanlei mui ah inn a phan. Inn ṭha, inn lian cu zan ihnak lawngah a hman. Parking i pho awk le zan ihnak lawng i hman ding cu man fakpi, a ṭha pi a hau hnga maw ti hi ruah phu ngai cu a si ko. Sining zoh thiam lo in midang zuam phunphai tbk hi mah le mah “imprison” ah i thlak bantuk a si ko. Catialtu nih cun mah le sining rup tein a nung thiam mi hi mi vanṭha bik an si tiah a ruah.♣ ------------ Indianapolis phaan thar ICBC mi tal hi aho poh i leenkai khawh awk in
an umnak inn cio hngal kho usi law saduhthah a si. Nan chungkhat a
phaan thar le inn dang chuakka an um ah cun ICBC Nunphung le Zatlang
lutlai Pu Rual Bik sin ah an umnak inn address le ṭelifawn nambar
thanh kho u law a ṭha hnga. pawrual@yahoo.com kon 881-6339 kon ah
thanh khawh a si lai. Inn pawrpok (khazianchinti) Oatmeal |
Fund Kawl Tik Ah
1. Fund kawl nak ca i thil kan zuar tik ah, a si khawh ah cun, kan zuar mi thil hi aho poh i rak duh/herh cio mi si kho seh law a ṭha hnga. Nifatin hman kan herh mi eidin, thilpuan le inchung thil tehna hi aho poh i herh mi an si. Kan herh lengmang mi an si lo hmanh ah kan duh cio mi an si ah cun a ṭha hnga. Biana ah, T-shirt tehna hi ca aa ṭial lo mi khualeng hruk awk tlak cu aho poh nih duh cio a si. Phone card tehna zong hi kan herh lengmang mi an si. Kan hman theng lo mi an kan zuarh ah cun, bawmhnak ca hmanh si ko seh law, tangka heu ah a cang deuh. Luchin tehna hi aho poh i herh mi an si theng lo. 2. Bu leng ah: Bu ca fund kawl tik i mah bu chung ṭhiamṭhiam i kawl cu tangka khawlh sawhsawh bantuk nawn a si; fund kawl ti awk a tlak tuk lo. ICBC bu ca fund kawl tik ah ICBC chung mi lila sin lawng thil zuar a si ah cun, rethei men a si. Atangkasa i khawlh lawlaw hmanh ah tha a dam deuh men hnga. Mah bu chung lawng si lo in, bu dang le zatlang khuaza mi sin i bawmh hal khawh khi fund kawl ti awk taktak cu a si. 3. Retheih laak hmasa ding: Fund kawl tik ah, a kawl tu nih zeimawzat retheih laak hmasa a hau. Zei koko hmanh tuah lo i zatlang mi sin tlawm hal sawhsawh bantuk, lucky ticket zuar bantuk, a si ah cun hmai a hngal lai lo. A pe tu zong lung thawh lo a fawi, mi bu fund ca sawhsawh a si ah cun. 4. Zei ti nak ah dah mah fund cu kan herh ti hi chim ah a ṭha. Fund ngeih lo bia sawhsawh, tangka duh sawhsawh a sii i zei thil ṭha tuah nak set a si lo ah cun thapek ning zong aa dang deuh kho. Fund hman nakding zoh in a pe tu zong nih biapit le biapit lo theidan deuh a hau. Upat awk a tlak mi pakhat cu, kanhnulei CYO i fund an kawlning kha a si. Heh tiah ruahnak an chuah, khuahriang ah caw an va cawk, hmundang ah an thiar, an thah, an can, an fun. Inn kip ah an zuar. Upat awk a tlak nak cu, mah fund kawl nak ah khan, biatakte’n caan an pek, tha an chuah, rian an ṭuan, an re a thei. Kan duh cio mi thil an kan zuarh. Cun fund an herh nak a ruang le a chan an chim. Mah bantuk cu a si awk a si. Thil biapi ca fund kawl nak ah zaanghlei cawi in kan duhherh mi te an kan tuahpiak/zuarh ah cun iruatnawl lote’n tangka chuah deuh a si ko. Biana ah, salvation camping tuah nak ah mino bu nih mi mawṭaw ṭawl in tangka hlawh itim hna seh law, kan mawṭaw a thian pah ko zong ah kan ṭawlter cio men ko hna hnga. Dawr kalpiak tehna, mi coka thianhpiak tehna, mi hau chung ram riam tehna, mi inn pawng thing hnah ro thianh tehna zong tangka hlawh khawh nak an si. Mah an tuah bu hmanh i tangka an izat lo zong ah, ‘aw, an iṭuan seek ko i a tlin fam lo cuta’ ti in an retheih thabaat hmaizah i thawh chap zong a fawi deuh hnga. Tangka phar khat hi zeitluk fawi in dah ka hmuh khawh lai ti nakin, tangka phar khat hmuh nakca ah zeitluk har dah ka iin khawh lai ti tu ruah ding a si e tiah Pu Henry Ford nih (a si ko rua) a rak ti.♣ --------- A’n daw tu i ruahnak a’n pek mi cu icinchiah, atu i na herh rih lo hmanh ah. —Mirang Phungthluk --------
#Halkha i Bethel Baptist Church nih 2008 kum ca
nithlarelnak an chuah i ICBC Nubu nih an zuar te lai. Rak caw cio te
u. $5 a si lai.
Pathian fanu Dawt Ṭha Hlei Par nih Indy Rolung chuah
nak ca ah $50 a kan hlut i kan ilawm. Pathian nih a hlawh saanter chin
lengmang ko seh. Kan Sunday School ngakchia pawl hi zei an cawn le
zei an thiam khom hngalh set a si lo i upa nih voi khat voi khat cun
kum dongh lai ah an test te men hna lai. Test ding cu:
Atu hi kan rampi uknak ṭhalo do in phungki thong tampi lam hrawng in lungtlinlonak an langhter. An thok nak a sau pah cang i atu cu zatlang mi zong nih an telpi cang hna. Pi Suh Ci zong an va ton i bia an va ruah. A tha a tho ngaingai an ti. Khua lairel kan or ko. Kawlram ah nihin zei thil a cang ti hi Salai Lairamthang nih zanfatin Rungcin biaruahphu ah a ṭial. Rungcin i luh a duh mi nih Indy Rolung ediṭha chawnh khawh a si, 881-2526 ah.
Kanhnulei zarh zarhte zan ah khan khualetlei sml 3:00 hrawng ah Sycamores Apt. laifang khin Lai hla bakte isak in tlangval pa hnih/thum an leng i, zanpi ah cun kaa hlau i ka lung a leen ning cu. Lai khuate a ka ngaihter taktak. Phundang te a si. –Ediṭha
#Bu dang i pumh a hmang mi krifa upa cu solo thiah,
mahte tum si cang seh law a ṭha menlai an ti.
#Pakhatpa a ngal hrawng aa bengh pah in a zai len
ko, Noah a mawhchiat i. An hal: “Aziah he Noah cu na zaih lengmang i”
an ti. “Fikfa nuva a nunh hin hna tiah henta” a ti hna. ----------- Indy Rolung indyrolung@yahoo.com ah thawng thanh awk le chimrel duh
nan ngeih mi rak kua cio u. Thla khat i zarh thumnak lengmang ah chuah
kan izuam. E-mail i nan kan kuat khawh lo zong ah catlap te zong in
kan pe ko u. Pu Rual Bik sin zong, keimah sin zong ah pek
khawh a si. Cabia a si ah cun biafang fang 500 lonh hlah seh law an
duh. --Ediṭha Ceu Hlun |