Ediṭha Aan

Ka ram nih zei dah a ka tuahpiak khawh lai ti lo in, ka ram ca ah zei dah ka tuah khawh mi a um ti tu hi ruah ding a si e tiah Pu John F. Kennedy nih a rak ti. Mah bia cu 1st class citizen nih an ruah i ram ca’h heh tiah an ṭang. Santlailo nih cun an ruat phaan lo. Vo tu an bawh.

Krifabu chung kan um tik zong ah, krifabu ca ah zei san dah ka tlaih lai ti a ruat mi cu, krifabu mah ta i a ruat mi an si ṭheu. Mah bantuk bumi nih cun krifabu cu a chiat ah a ṭhat ah a zawn an ruah zungzal.

Krifabu tu aa bochan mi nih cun bu nih zei dah a ka tuahpiak lai ti an bawh lai. Bu i a bawmhchanh khawh hna ah an lung a si lai. An lung a tlinh hna lo ah cun an phunzai lai. Thil hmete zong nih an hnak a doh hna lai. Zei ual lo ah bu an uh lai, zei setsai lo ah pasatorte an unh hna lai. Lungtlinh an har lai.

Indy ah hin aho te bu poh nih bumi zohkhenh cu an izuam cio ko. Tlinh dih khawh tu cu a si lai lo. Cu tik ah, bu i zohkhenh aa bochan tuk mi zeiruaramlo cu khoika bu hmanh ah an lung a tling lai lo. Khualeng an cuan lengmang ko lai.

ICBC zong hi zei dah a ka tuahpiak khawh ti kan bawh ah cun lungtling a si hin lai lo. ICBC nih a ka herh i a ca ah ka tuah khawh mi zei dah a um ti kan ruah lawng ah, lungtlinlonak a zor lai, lawmhnak a tam lai i Bawipa sunparnak a lang lai.

--------

ZOHCHUNH TLAK

CBMC gospel team an kan tlawn ah khan zohchunh an tlak nak an um pah:
• Biakin pumh ah nu nih hni lawngte an ivenh. Ngaknu no tete zong tawhrolh he biakin an lut lo.
• Lai hla lawngte an sa, solo le duet ah.
• Bawipa ca’h kut hler an hngal.
• An idaw.
• Mino hruaitule kha pasatorte he rian an ibawm. Anmah nawl lawng in thil an tuah lo. Thil an ti hlan ah upa ruahnak an la hmasa.

Hlaphel

Sung Tin Par le Dawt Hlei Hniang Pathian hla an ikhumhṭi i an zuar lio a si, audio CD. A ting lo mi nih 881-2526 ah hal ding. A man $9 fai.

Mino Live Show kha

ICBC mino live show cu a nuam bak an ti ko khah. Zakia Band ko an min a thang. Cun rang la hremka bang kawlkal i a kal tauhmauh mi hna zong kha zoh an hlawh ngaite an ti.

Luh Ding

Indianapolis khua i um ṭung ah cun hawi theih theih ve a hau. A thei lo cu hruh aa co kho. Indy Laimi thawngpang le thawngthanh nan theih khawh nakding ah IndyChins yahoo group ah khin rak lut cio u. Luh a duh mi nih IndyChins-owner@yahoogroups.com ah sok nak kuat ding.

--------

Rolung Baibal Caang Thim

Zefaniah 1:7 Bawipa ni cu a nai caah Bawipa hmaiah dai tein um u! Bawipa nih raithawinak kha a timh cang i a sawmmi hna cu a thianter cang hna.

---------

Zeitluk Vantthat Dah Kan Si

Rual Bik

1. Mizaw maw a phaisa dih deuh hnga, dam tertu dah?

Zawt hi phun tampi a um. Zei bantuk zawtnak ti si loin, dam duh ah damh kan herh ning deuh a si lai. Kan zawt lio i kan lungre theih ning, dam duh ah damtertu kan herh ning. Zeitluk damlo kan si ko hmanh ah a sau bik kum khat hrawng ikuah a si. Nain damtertu Bawi, Doctor nih cun mizaw damter nak ding caah tiah, tang cheu a kai in timhlannak a rak ngei diam cang. Kum zeizat, caan zeizat, phaisa zeizat, zeitluk lung retheih le mitkuh cim loin, hawi dang nuamhnak zongah inuamh kho lo le ei le din tiang isum in a tlawm bik kum 20 chung caan lak in a rak itimh chung cang. Mi vanṭhat caah cun suimilam pakhat hmanh rau loin dam colh a si. Nain damtertu cu zeitluk a thiam zongah a tlawm bik kum 20 chung caan pek in phaisa zeimaw zat a dih.
Cu ve bantuk in, sual muinak hawr chung kan um lioah, sualnak hma he kan iciah lio ah Khrih Zisuh nih na dam cang tiah, Vailam tahnak in a thisen in a kan tlanh. Kan Bawipa hi a chuah hlan in misualmi hna kan caah thih ding in ready in a rak um diam cang. Minung pakhat cu chimlo, vawleimi vialte nih hin Khrih dawtnak hi cham itimh usilaw 1/100 hmanh cham khawh ding a si lo. Kan sualnak nakin a dawtnak hi a let in a tam deuh.

2. A cawng liomi maw, fimchimtu dah a dih heu deuh hnga?
Tang cheu kan kai hlan in kan Saza, Pastor te le Cawnpiaktu hna cu kum 20 hrawng an kan cawnpiak hnga ding a rak itimh diam cang. Mitkuh cimlo le rawl zong ṭhaṭhi ei loin ca an zoh. Hawidang lentecelh le nuamhnak vialte hrial in, mihrut bantuk in caan zeimawzat an thlau. Hawile nih komh awk zongah ruah an si ti lo kha an hngalh. Fim chimtu le Cawnpaiktu hna i caan zeimaw zat dih in minit 30 hna an kan cawnpiak hi kan van a ṭha tuk ti hlei chimh awk dang a um hrim lo. Mi zeipaoh cawnpiak nak a ngai duh lomi cu mihrut long an si.

3. Hringtu nu maw, fa dah a ba deuh hnga?
Fale kan chuah hlan in thlan hripi le lung retheih in thla 10 chung a kan pawi. Ka fa maw rawk sual lai kaw tiin lam kal le ṭhut dir zong aa ralrin. Ka fa maw a thisen tling loin um sual lai kaw tiin ei le din a phunphun hna a kan ei piak. Kan nu paw chung in kan chuah hlan in hruk ding phunphun a kan zalh piak cia. Kan nu paw chung in kan vun chuah cangka in a ṭang ah a kan pawm i hnuk thlum a kan dinh. Leng a kan chuahtak zongah ka fa maw tihal rawlṭam in um sual lai tiin a kan hramh tawn. Cuticun, hawi lo ve seh tiin a ngeichun tein sianginn ah a kan chiah. Kan vun ngan deuh hnu, biachim le holh kan vun thiam hnu hna ah hechet tiah kan nule cu kan cah ṭhan hna. A duhmi thil tuah nakin an duhlomi thil tuah kan duh deuh. Kha lio caan ah khan hringtu nu nih a kan dawtnak kha ruat hmanh. Zeitluk Dr. Ph D. tiang hmanh va phanh ko hna silaw kan nule an kan dawtnak hi chamh khawh an si lo. Ruat hnik hmanh!!!

4. Bawmhmi maw, Bawmhtu dah lungre theih deuh hnga?
Mi thar um a si bantukin mi hlun um a si ve. Mithar nih zeitluk thil kan theih kan ti len zongah mihlun ṭhiam hal an si twn. Zei he aa lawh ti ahcun ngakchia nakin upa an upa deuh ti tluk a si. Mi hlun ti hi mithar ti a um caah a si ve. Chun le zan a um bantuk kan si. Mawṭaw kan icit tikah parsenzar kan lau deuh paoh ah a let khat in a mawnghtu(daraiva) a thin a phang deuh zungzal lai. Ka tlam a tling lo ee kan ti lio ah, kan ca i tlam a tlin tertu ding a lung re a thei deuh zungzal. Cu caah mi hlun si nakin mithar si a nuam deuh. Kan hlan i mi hmasa hna cu mithar caah sunparnak kan hmuh hnga ding i kan leiba an si. Cu leiba cu zumhtu a si paoh cu khamhtu Khrih nih a cham piak hna lai.

Kan tlangtar ah kir ṭhan usilaw, kan damlo lio i a kan zohkhenhtu Doctor te si hna seh, a kan hringtu kan nule si hna seh, a kan cawnpiaktu kan saza le pastorte le kan hlan i mi hmasa hna cu zeitik hmanh in chamh khawh ding kan silo zia hi, zeitluk vanṭhat kan va si dah! Vanṭhat timi cu mah tuahsernak aa tel lomi khi a si.

---------

Biakin Dangh Hi
Ceu Hlun

Krifabu hi ei le din a tam ah a nuam. A tam tuk tik le a sun lo tik belte ah cun eidin tuah hi rethei le hnahnok ah a cang.

ICBC ah hin vel a ngei nih tangka tampi dih in nan kan dangh ṭheu i a sunglawi ko. Micheu nih rawl theng theng nan kan siaherh. A sunglawi chin. Lawmh kan chim cawk lo.

Asinain atu cu mi zong kan terual chin lengmang i rawl idangh zong hi a har chin lengmang cang lai. Cun khuasau ah cun hnahnok zong a si chin lengmang kho. Atu hmanh ah hin rawl idangh a um tik ah a ṭuan tu ca ah re a thei ngaingai. A ei tu ca ah cun rawl cu a sung tuk ko; nain, chuncaw kan eika nawn a si tik ah, rawl ei nolh zong cu chunlai zanriah ei ah a cang tawn ve.

Atu hnu cun biakin i nau lawmh rawldangh tuah le camtuak lawmh rawldangh tuah tehna hi ruah deuh a hau te men lai. A ruang cu:
1. Hna a hnok.
2. Biakin a thur.
3. Re a thei.
4. Chunlai zanriah ei cu kan irinh taktak lo.
5. Chaw le caan a heu.
6. Nau lawmh rawldangh kan tuah tuk ah cun rawl idangh cu a zen i kan Bawipa chuah lawmh rawldum a sunglawi ti lo. Krismas a nuamh lo phah.

A ruam hrimhrim ah bupi tonnak biakin le biakin tehna cu pumpak puai tuah nak an si lo.

Cuca ah, hmailei ah cun nau lawmh a duh mi aa si ah, ca-awn lawmh a duh mi aa si ah, mah le inn te tu ah chungkhat siaherh mi he sunglawite in lawmh a hau te men lai. ♣

---------

Isarel maw, Amerikan dah?

Kannih Laimi le Mizo nih Isarel Miphun si long kan duh nain, Isarel ram tu ah kal duh deuh loin Amerika tu ah kal kan duh deuh. Cu caah cun Isarel ee ti lengmang nak cun Amerika kong tu hi kan chim deuh awk a si cang. Pathian nih Isarel Miphun cu a dawt hna kan ti i, Amerikan hi tah a daw ve hnga lo maw? Pathian dah tilo, Vawlei cung khamhtu le tlanhtu cu hi kan umnak ram hi pei a si cu. Cu caah cun pei khamh duh ah kan rat a si cu tiah Upa pakhat nih a ka chimh. A vun peh rih mi cu, Kannih Laimi caah cun Van Zerusalem kan ti len nak hmanh in Van Amerikan hmanh kan ti deuh awk a si tiah, a dang a chim mi cu ka philh dih cang. ( Min lo)

Baibal Theitlei

# Pathian thinlung put a ngei mi:
Vawlei cungah Pathian thinlung put a ngeimi cu David long a si. Cucaah Pathian nih David cu keimah lungput a ngeimi a si tiah a ti.
# Vawlei cungah lungnem bik:
Moses cu vawlei cung mi vialte lakah lung nem bik a si. (Number 12:3)

Vawlei lei Theihtlei

01. Tuluk ram cu seh lei thiamnak ngeimi caah a ṭha bik.
02. Holland: Zawnruahnak le caan ṭha sersiam piaknak ah a ṭha bik.
03. Vietnam: Chaw lei thlennak le remhnk tuahtu.
04. Pakistan: Inn le lo a tliktakmi pawl an idornak.
05. Turkey: Seino caah a ṭha bik.
06. Argentena: Lungdonghmi caah a ṭha bik.
07. Poland: Nu caah cawlhcanghnak ah a ṭha bik.
08. Finland: Saza le singngakchia upat, ṭihzah lei ah a ṭha bik.
09. India: Ramdang phaisa hram bunhnak ah a ṭha bik.
10. USA: Rum a duhmi caah a ṭha bik.
USA cu rum a duhmi caah a tha bik si kaw, kan rum cio te lai tinak a si ko rua hih!

Norway

Kan hawile Laimi cheukhat umnak ram Norway cu vawlei cungah Daihnak(peace) a umnak ram pakhat a si tiin, Global Peace Index nih survey a tuah. A ruang,
1. Ram chungah buainak a um lo,
2. Ramleng buainak ah daihnak a siam,
3. A innpa Scandinavia ram pawl he nunphung, holh le ca zohkhenhnak ah an ihrawm kho,
4. Nordic ram pawl Scandinivia, Finland le Ice Land pawl he hmunkhatte ah rian an ṭuannak ah Norway Foreign Policy cu zohkhenh awktlak a si i, Human Rights faakpi in upat a pek.

Mifim Bia

# Hawikom timi cu pumhnih lungkhat a si. (Aristotle)
# Hawikom si cu lungthin i ṭhitumh a si. (Voltaire)
# Hawikom hlun pakhat ngeihnak ding caah saupi a rau. (John Leonard)
# Hawikom tha na ngei rihlo ahcun mi ltinglo khan ah na tinak a si. (RB)

Ngaihchiatnak

Lai Ram Tipil krifabu chung i kan pa taktak a si mi Rev. Ci Lian (kum 71) nih August 30 ah khan vancung a pa sin ah a kan dinhtak cang ti kan theih i kan ngaih a chia. A khua Leitak ah an vui.

Theihternak le Nawlnak

Indy Laimi phone nambar catlap kha Indy Rolung chuahnak ah tiin $1 in kan zuar nain a la kip nih a man nan pe ti lo. $1 cu ihal a phu lo. A ting rih lomi nan um ahcun le Phone No. palh sual le hrelh sual mi nan um ahcun Nunphung le Zatlang Chairman sinah hal le theihter ding a si lai.

Sawm Lo Ding

Biakin chung i tawhrolh sau hrolh a hmang mi cu, ngaknu an si ah, nutung an si ah, rak sawm theng hna hlah u law tiah Nunphung le Zatlang nih an thanh deng tawn an ti.
 

An Ti

Anti hi a tam pah nain, hnarcheu long kan ti rih lai. US phanh ingaih thluk in phanh hnu ah aa ngaichih mi an tam deuh an ti. Aruang, holh thiam hlanah $9 cung rian ah luh cawlh an duh caah a si an ti. Cun, Phanh lecang kaain Motaw tha ngeih cawlh an duh an ti rih. Cun, Food Stamp kong ah zei hngal loin a buaimi an tam an ti fawn. A hlei in, rian tuan tlai hi zeiah an rel lem lo an ti hawi rua. Malaysia a nuam deuh a timi an tam deuh i, mahhna cu Green Card ngah hnu ah Malaysia Buk tang ah va kir than te ding an si an ti.

Capo

#Nau ṭhennak room in an pa a ra chuak cukmak i, “Faphir kan ngei, faphir!” a ti. “Aho dah an lawh?” tiah an hei hal i, “Each other” a ti hna.
#USA ah cun ekseksai tuah lo cu ningzak a si ti hna kaw, Lai pa pakhat cu ekseksai tuah nak ah a kal ve. Lu le liang le khuk le ke tehna an tuahpi hna. A dih in a zai i, “Ka tangka ka kherh u; nan ṭuang a niam tuk i ka kedong ka phaan lo” a ti hna an ti.
#Pu No Ceu an timi pa hi US a phan ve i, ID a va sawk ti a si. Zung rianṭuantu nih na First Name chim a ti i, No a ti. First Name na ngeilo maw a ti i, ka ngei a ti ṭhan. Chim tuah a ti i, No a ti ṭhan hawi. First Name ka ngei na ti kan hal i, No na ti ṭhan tiin sau lak te an i al an ti.

Kan ngaithiam u

Indy Rolung hi kanhnulei zarh ah khan chuah cang ding a si nain atu zarh ceo ah kan chuah i ngaihthiam kan iham. Duhherh le siaherh chim awk a ngei mi nih indyrolung@yahoo.com ah chim te u.--Ediṭha Ceu Hlun