Ediṭha Aan

Kawl vawlei ah maw inn ṭhaṭha kan sak lai, Lai vawlei ah dah ti hi ram a daw mi i ruah mi a si; i, ruak suan nak inn sak nak ah maw kan tangka sunghar kan hman lai, Bawipa biakin ca ah dah ti hi krifami i kan ruah ding mi a si.

ICBC cu Lai Ram vawlei i caruuk inn sak le ICBC biakin sak kan rian. Mah pahnih cu kan hmai kum tam nawn chung a rian ding kan si. Rianh khawh nak thazaang zong Pathian nih a kan pek lio ti a lang.

Kanhnulei zarh ah, Upper Myanmar Baptist Association lutlai nih Mandalay khua i ruak suan chung nak inn Laimi i kan ngeih lo a fah ning chim in ruaksuan inn sak nak ah bawmh a kan hal cio. Mi thinlung a suk i tangka tampi pek le biakam a si. ICBC lawng hmanh in $12200 tluk a chuak rua. ICBC member i biakin dang an ipumh nak in a rak thawh ve i mah relchih hawihna cun $12500 aa kam khan ah kan cang hnga. Tangka mah zat cu a tlawmte hrimhrim lo.

Mi krifabu chung i fund ikawl le mi pulpit ihman riangmang i cabawm phawt le namchan biakamter cu aa dawhcah maw ti le “How can the Church Council allow that?” ti zong a um hnihkhat rua. Hmailei ah mah bantuk kha kan krifabu ah a um kho rih lai maw ti zong ruahcaih a hau te ṭheu lai.

Krifami i kan ruah zungzal ding cu kan Bawipa bia lengmang a si. Bawipa nih cun, hmuh lei nakin pek lei ah lawmhnak a tam deuh e a ti. ICBC chung krifami zong, a hal tu si lo i a pe tu kan si hi kan ilawmh nakding a si.

--------

Mithar hngalh awk ah

1. ICBC cu nu hnivenh kan upat. Nu, ngakchia ti lo, nih cun biakin ah hni an ivenh lai tiah ruah a si. Hla a remh mi le caan a ngei mi hrimhrim nih cun hni te he kan chuahpiak hna seh ti kan duh.
2. Biakin pumh ah video le hmaan thlak um hlah seh kan ti, a herh nak zawn tete lo ah cun. Mithar nan hawile zong chim cio hna u.
3. ICBC biakin i thilzuar hi kan khap ti awk a si. Aho hmanh nih biakin chung le ttumbut ah thil zuar awk iken lo ding a si.
4. Pumh pah i khaicek khai hi zohchia ah kan chiah. Kan duh lo.
5. Biakin chung luh cang hnu i pawng mi chawnh le biaruah hi zohchia le hnahnok le Sehtan rian bawmh bantuk nawn ah ruah a si.

Hngalh cio ding

#Hlahruai kutvaih khi aho poh nih zoh ding. Rang deuh i a vaih ah rang deuh in sak/tum ding, nuar deuh i a vaih ah nuar deuh in. Mah duhpasazel in sak/tum ding a si lo. Chenglawi tum tu hrimhrim hlahruai kut zoh nan hngal tawn lo.
#Biakin chung kutbengh hi tuah lo ding hmanh a si na’n, kan tuah i, sau tuk bengh belte a hau lo. Voi 7 bengh a za.
#Mi inn pumh ah, innka hram le mi luh nak lam i nan ṭhut colh tawn hi cu an in ca ngam cio hna lo i a si ko.
 

Ruah chung awk

1. Biakin saknak ca i thla khat voi khat campaign tuah hi a hau ti maw?
2. Mithar theihternak kan tuah tawn i a ṭha. Mithar nih tah mihlun an kan hngal ve hnga maw?
3. Thawngthanh awk a tam le a sau ah hin kan lung a ttevai deuh maw?
4. Bulletin hi mahte i ilaak cio awk in chiah si seh, midong tu tu nih cun hmurka in kan dong hna seh, ṭhutnak tu kan chim hna seh (ushers ṭuan hna seh) law a ṭha lo maw? Ṭhutdan acheu an lawng ṭung, a ting lo an um ṭung.
5. Bu Hlaremh khi pinlei tuk ah nan va remh lo maw?
6. Biakinpi pumh ah hla-au a um awk a si lai maw?

---------

Bupi Thil Cu

Ceu Hlun

ICBC i kan thilri kan ngeih mi man faak bik cu mawṭaw hi a si lai dah. U le pa an ṭha i pumpak ca’h hman khawh in lai an rel. Asina’n, manlo i pumpak ca i duhtawk i kan hman lengmang hi cu ruah a hau cang.

Cuhlan i kan hman ning zoh tik ah a herh setsai lo pipi ah hman a tam. Biana ah, lawngbual i mi va don i, arualpi i kal khi a herh i a herh lo mi a si. Mah i bu mawṭaw hman cu a herh lo nak i hman ah a tla. ṭhit-um puai zawh nak ca i hman zong a zawnkhan a si hnga lo.

Bupi thilri pumpak ca i hman ah cun a hlaan man laak phung a si. Biana ah, electronic thilri tehna zong a hlaan man te liam lengmang a si. Mawṭaw zong tangka tampi man a si ve.

Mawṭaw i a herh mi hi gas lawng a si lo. Mawtaw cu mongh deuh poh ah a ṭet deuh. A ke an rak tlum. A brake a tlum. A hliahcaang an rak ilok. Donglo in hramh lengmang a hau. Maintenence ca ah kum khat ah tangka tampi a dih. A mawṭaw cawknak man he, a hramhkhiat nak man he, a gas man he, insurance he, a dih mi azeizong te cozahpi nih a tuak tik ah 2006 kum thil man ning in meng khat ah 44.3 cents a dih ti a si. Mah cu cozah bia a si. Kum khat hnu kum khat a kai chin lengmang ve. Mi mawṭaw kan icit ah hin gas man lawng liam ah a za lo; a mawṭaw man he meng 2 ah fang khat deng a dih tiah ruah khawh a si. Mah cu, mawṭaw man hrimhrim a si.

Meng khat ah 45 cents i tuak tik ah, lawngbual kal nak ah hin (meng 17 hrawng a si i) a monghpiak man he cun $20 a hau khan a si. Mah zatzat laak a hau lo kan ti hmanh ah acheuchum tal cu mawṭaw a hmang tu nih liam ve ah a ṭha hnga. Mah bantuk in, herh dang ca i hman duh tik zong ah, meng khat ah cuzat ti in a hman mankhan tuak khawh ding a si. Manlo lawngte i hman ah cun Pathian ram kauh nak ca i pek mi cheu-hra-cheu-khat tangka tampi hi Pathian ram kauh nak ca i kal lo in mawṭaw ca ṭukṭak a kal dih lai i, a-e le cirik nih a hrawh khawh ko lai.

------------

Veng min

Indianapolis khua i Laimi kan umnak veng hi Lai min kan sak hna.

Exodus Veng: Rocung te atu an um nak veng, Bradford Lake Apartments, Stop 10 le Stop 11 kar.
Sikkamawr: ICBC mawttaw a dir nak veng, Saikamawr rak ti tawn mi, khi.
Khuanglo Veng: Madison Ave. kam, atu Marsh (ahlan Lobill) incar hrawng apartments, Pu Rual Bik te an um nak hrawng khi.
Laikhen Ruun: Pu Lian Cin te inn.
Phairawn: ICBC biakin hmun thar.
Remhhlun: Rhoda te inn in Bawi Tling te inn tiang. Biak Sang te inn le Sui Cer Chin te inn zong.
Remhthar: Rev. Thawngling Mualhlun te an um nak hrawng khi.
Thingṭha Veng: Pu Ngun Ceu Thang te inn hrawng.
Vengdai: Biak Lian Thang te inn hrawng.
Leenmawi Veng: Sangpui te umnak Westminster apartments.
Zohmun: Pu Rikhum te umnak hrawng.
Ngaihhlun Veng: Greenbriar apartments, Pu Van Ceu Uk te, Pu Cung Hnin te an um nak hrawng.
Venghlun: Country Club apartments
Damṭha Veng: Pu Za Bik te an um nak veng, Meridian St. kam khi.
Khuangbo Veng: Salai Thla Hei te um nak.

----------

"I'd rather be strongly wrong than weakly right." --Tallulah Bankhead

----------

RIAN

Rual Bik

Rian timi hi a ttuantu umlo ahcun rian ti khawh a si lo i, anmahle an min cio in auh asi tawn. Minung nih maw, saram nih maw asi loah seh nih dah a ttuna hnu long ah rian ti khawh asi. Rian timi hi a tawinak in chim ahcun phaisa hmuhnak lam ti khawh asi. Cu nak a tawi deuh in chim ahcun rian cu phaisa asi i, phaisa zong rian ti khawh asi ve. Rian le phaisa cu tthen awk an ttha lo.

Rian hi phun tampi a um ko nain a rian ah hin upat si loin a ttuantu ngeih in asi deuh. Chim duhmi cu micheu nih zei ah kan rel lomi rian khi teimak tein a ttuanmi caah cun hlawknak asi kho ko. Tahchunhnak ah Mizo nih bel chia, cangphio chia, plastik chia hna an hlawnh sawhsawh ko nain, Kala (Vai) pawl nih an hei char tthan tikah phaisa ah an chuah tthan. Cun changreu a phunphun inn kip ah an vahpi, Mizo tlangval nih nehsawh ngai in an hei capo pah hna. Cucu anmah Mizo nih cun belchia pu, chang pu an ti lio hna ah, a thli tein an ram ah ttaih inn saknak ah an hman. Cucu rian dang an ttuan pah in, Mizo an tawh hlanah, cheu khat hna mang an manh lio ah over time an ttuan mi rian asi. Kan tawh hlanah, mang kan manh lio ah Vai pawl nih Rs.50/- an hmuh diam cang an ti tawn.

Hlan ah India Prime Minister hlun, Indra Gandhi cu Japan a va tlawng i, Company i rianttuan tu(A-loh-tamaa) pawl an rian ttuanning a va zoh hna i, rianttuantu hna nih an zoh lem lo ti asi. A chimmi cu Prime Minister pakhat ka si ve i, zei caah dah an ka zoh duh hnga lo tiin. Nain an zoh lohnak a phi a chuah tthan mi cu kan rian kan tlawlh sual lai ti an phan caah asi ti kha, amah le amah aa fiang tthan.

Chim duhmi cu, mi ramdang kan um tikah mahle duhmi rian ah luh khawh asi lo tikah zei rian paoh kan va ttuan ko hnga, nain kan rian kan upat i kan ttuan ve hrat ahcun ram ngeitu hmanh tei khawh kan si. Kan tei mi hna nih an kan hngar zongah ram ngeitu Cozah nih a kan duh piak mi asi ko ahcun hmai ah kal chin thluahmah ding asi ko. Kan ram i catang sang le niam hna rianttuantti asi tikah a rian zoh incun zei rian paoh ttuan asi ko lai nain, a minung zoh in upat si loin, mahle rian ah teimak tein a ttuanmi tu kha upat an si deuh ko lai. Rian cu phaisa asi kan ti bantuk in kanmah duhning in ttuan loin rian nih a duhning in ttuan kha a biapi deuh ti duhnak asi. A ttuantu nih rian kha cawisang hmasat hnu long ah rian nih a kan cawisang ve lai. Cu ah cun hlawknak le upatnak cu a um.

WELCOME CBMC!
Hmaizarh cu Washington DC i Chin Baptist Mission Church (CBMC) kan hawile gospel team in an kan tlawng lai. Kan ingaih ko. Mahhna krifabu hi USA Lai krifabu dang lak ah hla a ti kho bik pawl an si; an mino zong an inge i kan izohthla mi an si. An rat tik i aa puum lo mi cu an kal hnu ah an sia a herh ngaingai te ding a si. Cuca’h nan hawile rak phok cio hna u. Atam khawhchung in ipuum usi. Zarhte zan ah pumhnak, zanriah le nuamh, zarhpini ah pumhpi a si lai khah.
---------

2006 Mino Hnianghrawm zoh ṭhannak

Ni kum Mino Hnianghrawm kal cu aa ngaichihmi an um lo; a ngaichihmi cu a kal lomi long an si an ti. Ni kum a nuam khunnak cu a kan hruaitu pawl an fit hleiah vawidang tuah bal lomi longte an kan tuahpi mi hrim nih a nuamter khun an ti. Micheu nih minung hrim pei kan tam cu, nuam lo awk kan ttha lo a ti mi an um ve.(Minung 64) Micheu nih luri-hnahnawh kan umlo caah a nuam khun a timi zong an um. Cun, hmunhma a kan kawl piaktu A-kii le a hawi thawng in a si a timi zong an um. Micheu nih Nga sionak i-put cio usilaw Group Ngasio kan izuam hnga i, a timi zong an um. Cucaah, Tu kum cu Nga sionak kan iken/put cang hna lai an ti duhnak a si rua. Kan Mino hruaitu pawl hrim “an mak bak ko” ti a si cio!!!

Group cio zuamhnak ah first a hngah mi cu: Val Siangpaw te Group No.1 an si. Group lakah a lung a fak bik cu Group 4 an si an ti. Zeicatiah, first ngah ding an si ko nain Val Kapte a cawl tuk lo caah a si an ti. Group 3 nih Val Thawng Bik tuan ah phanh sehlaw cu an ti ve. King le Queen kha laksawng pek ding an si ko nain hmailei ah caan tamtuk an ngeih rih i….,

Nikum i Hnianghrawm ah angki le phaisa a kan hluttu: Val Anki (T.shirt) zun 44, Val Hniar-a le Val Kapte nih si hna seh, Val Cunga nih $.100/- le Val Thawng Bik nih $.50/- an kan hlut mi cungah lawmhnak chimh cawklo kan ngei i, Pathian nih nupi ttha pee hram ko hna seh tiah mino thlacamnak a si. A teima bik cu Aa Cuai le A Silei te nuva an si i; an nu/va in holh lo tein fungvei le hot dog rawh ah ttuanvo a kan lak piak mi hrim kan thangtthat an ti. Cun, kan Pastor Lal Cung Awi nih a kan zulh hlei ah a kan nuampi ve caah kan upat hlei ah a cungah lomhnak tampi kan ngei. Kir lei ah rawl chuan kan huam ti lai lo tiah kan ti lio ah khat leiin kan Pastor Tluang Thang te nuva nih Sabuti in an rak kan dawng hawi i an cungah lawmhnak tampi kan ngei fawn an ti.

Mino le nuamnak timi hi Pathian zong nih a duhmi asi. Hi bantuk kan inuamnak thawng in pakhat le pakhat itlaihchanhnak a fehter i, dawtnak a karh tertu zong asi fawn. Kan inuam cu kan ilawm tinak a si. Vawlei cung le Vanram ah a sang bikmi cu lawmhnak hi a si. Dawtnak kan timi zong hi a donghnak ah lawmhnak a um lo ahcun dawtnak tling a si kho lo. Van ram ahcun ngaihchiat/mithli ttah-aihramnak a um ti lai lo, lawmhnak in kan khat cang lai ti a si. Cucaah Lawmhnak nakin a sang deuhmi a um lo tinak a si. No lio ah hin nuamhnak le lawmhnak hi ihmang cio hna usi. Minung kan chan ah a sunglawibik caan cu no lio le nuamhnak hi asi. Nuamhnak tling cu i-ngaichih lomi nuamnak hi asi. Cucu Pa Pathian zong nih a kan duh piakmi nuamhnak le lawmhnak a si awk a si. Tu kum ah zeitindah kan i-nuam tthan lai ti hngah cio bu-in..……2007 ?? (Vaal No)

Innchung thil nan zalh ah

Inchung thil second hand a thar ngai rih ṭung mi an zuar nak a um i, hngalh a duh mi nih Rolung Ediṭha hal te u (881-2526 ah). Ihphah, ihkhun, ṭhutdan, cabuai, keu le hrai tehna. Ihphah le ṭhutdan cu athar lawlaw zalh ṭung lo ah cun mahka ta cu an ṭha bik.

Internet (YouTube) tehna i a chuak mi video khi TV in zoh khawh a si. A tuah man $70 hrawng a si rua. Tuah a duh mi nih Sangpui (888-3032) chimh khawh a si.

Tlangau hi

Chin Community mi nih Tlangau thawngca hi biakin inka hram ah chiah i aduh nih ilaak a si i, acheu nih biakin chung ah iluhpi a si. Phungchim lio zong ah an rel i Pathian biak hna a hnawh tawn. Atu cun, Tlangau a rak pu tu nih ICBC Nunphung le Zatlang lutlai Pu Rual Bik pe cang u tiah kan in nawl hna.

AN TI

#Indianapolis hi Refugee Miuhdaw an ti.
#Malaysia a phantharmi pawl nih Vancung ram kan ti mi hi zei a rak si lem lo hi taa an ti ee an ti. Nain, Vancung ram ahcun Tu le Meheh, Cawtum le Cakei, Minak le Mirang, Vun rang le Vun ngo, Catang niam le Sang thleidan loin tlawngleng tti an si lai, an ti belte hi cu a hman tak ko an ti tthan.

CAPO

#Nu pa khat cu damnak spa ah a kal i exercise class a la colh. A tuah dih cun, front desk ah a kal i, ka min ka phiat u law, kaa ngol colh e a ti hna. Aziah dah maw an ti. “Nan ṭuang a niam tuk, ka kedong kaa phaan lo” a ti hna.

#Biacaihbawi: “Inn dot thum thlalangawng in na nupi nu na thlak ca’h taza kan in cuai.”
Sualphawtpa: “Ruah hmasa loin ka tuah sual e.”
Biacaihbawi: “Na ruah hmasa awk a si; a tang ah mi rak um hna seh law a tlak hna lai si!”