|
Ediṭha Aan
Indy Rolung hi ICBC a chuahka ti awk in aa thok ve
rua. 2006 kum in kum khat chung a zohkhenh rian ibawmh cio a si. Fial
cio zong kan si.
Kum khat chung cu thla fate aa chuah kho. Kum cu a
liam i committee hlun caan cu a dong cang. Atu ri hin cun committee
thar kut ah a um cang lai. Cuhlan nak ṭha deuh i chuak kho ding in
committee thar nih hma a laak ṭheu lai ti zong in ruahchannak a um.
Caan thar ah cun Nunphung le Zatlang lawng si ti lo
in, Mino bu he zong ibawm in chuah ah a ṭha kho men ko. Ediṭha thar le
a tawlreltu thar zong kawl le fial an hau men lai. Hruaitu rianngei
nih kan bupi ca ah a ṭha bik an ti ning in khaan awk a si lai.
2006 kum chung i a chuak mi ah khan mi lungtlinglo
zong a um ko lai, a ṭha mi zong a um lai. Tlin lo bu i tuah mi a si
nak zong aa hngal ko lai. A rel tu dihlak i ruahthiam nak nih tlinter
ko seh.
Hmailei i a chuak ding mi zong, kanmah bu ta,
kanmah ta cio a si ti hngal in, thazaang pek le a zawn ruah cio a hau
ding a si.
---------
Be generous, be delicate, and always pursue the prize.—Henry James
Look like a girl, act like a lady, think like a man and work like a
dog.—Caroline K. Simon
-----------
THO USI LAW SA USIH!
Building fundraising commitee nih ICBC website ah tar ding in kan i
thim mi bible cacang cu Nehemiah 2:18 hi a si. A rawk dih cang mi
Jerulaslem kulhnak vanpang kha remh than awk ah Profet Nehemiah nih
jerusalem khua mi hna kha a chimh tik hna ah lung rual te in "tho usi
law sa usi" an ti i, rian tha tuan ding ah an kut an i thawn ter.cu ti
cun rian domh ding ah ttuan vo an phawt cio hna.
Si hmanh seh law rian an vun tuan tak tak tik ah an
pawng kam i, an ral hna sanballat,tobiah ...etc hna nih khan hna hnawh
nak le har nak tam pi an pek hna.Jerusalem khua mi hna cu rian tuan
pah, ral ven pah in an khua kluh nak van pang cu an remh thluahmah ve
i zeimaw zat cu an lim ve.Hi thil cu zei tin dah a si khawh ti ah cun
mi nih khan rian tuan duh nak lung thin an ngeih caaah a si tiah
profet Nehemiah ka chung in a chim (Nehemiah 4:6 ). Zei ban tuk in har
nak tong k0 hmanh hna seh law a herh hrim hrim tiah an theih caah an
Pathian bo chan bu le lung rual te in rian an tuan ti caah an i timh
mi Jerusalem vanpang cu an remh khawh.
Kan nih ICBC krifa bu zong nih kan herh bik mi Biak
Inn pi ngeih khawh nak ding caah Jerusalem khua mi hna nih lung rual
te in" tho u si law sa u sih " tiah hmun khat te ah rian an tuan ti
ban tuk in lung khat thin khat te in kan bawi pa bo chan bu in rian
kan tuan ti a si ah cun a rauh hlan ah kan i timh mi kan Biak inn pi
cu kan sak/cawk khawh ve ko lai tiah zumh nak he.....Building Fund
Raising Committee
---------
BIAKIN I THILZUAR
ICBC cu biakin i thilzuar kan hmang lo. ICBC mino tuah mi luchin hmanh
inn cio ah an kan zawrh. Mah cu a ṭha. Biakin ah thil zuar aphung a si
lo tiah ruah ding a si. ICBC min i zuar mi a si ah cun aa khan rih; bu
dang le pumpak thil cu biakin i zuarpiak awk in aho ta hmanh cohlan
ding a si lo.
Krismas le Kumthar Kha
• Krismas a nuamh set lo nak kha nikhua a chiat tuk
ruang ah a si bik rua. Ruah a sur tuk i mi lungthin aa hlerhlau kho
deuh lo.
• Cun lungthawhter nak (motivation) a tlawm deuh.
Thawngthanh zong a tlawm deuh. Krismas committee an ihlerhlau tuk ve
rua lo.
• Krifa upa si hna seh, nutung si hna seh, ngakchia
si hna seh, Krismas ah thazaang an chuah cio dih nain mino tu program
an ngei set lo. An hruaitu hal tik ah, “Zei poh krifa upa nih an tlaih
dih i mino cu chance an kan pe theng lo. Zan nuamh tal ah khan cun tar
bikbik church chairman le vice chairman nuamh hruaitu i thiah lo in
mino kan rinh hna seh law mino ca’h cawlcangh nak a um deuh hnga” a ti.
• Kumthar kha cu ruahnak nakin a sunglawi deuh.
Biakin khat i Kumthar hngah hrimhrim a sunglawi tuk. Upa i caan an ser
ning zong a ttha.
• Terual deuh kan si ah cun laksawng ithlen chung
tehna, Baibal caang zuh rel chung tehna, hruaitu thim tehna nih hin
caan sau laak a hauh lai ca ah, kan tuah tawn ning thlen pah an hau te
men lai; kum 15 tang lawng laksawng thlenter tbt in.
• Kan sin i Krismas a hmang mi khual kan duale kha
aho tal nih laksawng chuah kan hngal hna maw hngal lo he tiah an kal
hnu ah kan ruat.
• Kumvoi cu ahote nih dek Krismas kan donpiak cang
hna seh law a nuam men hnga.
---------
Rolung Baibal Caang Thim
Jeim 1:2 Ka u le ka nau hna, nan cungah hneksaknak a phunphun a tlun
tikah vanṭha ah i rel u, 3zeicahtiah cu bantuk hneksaknak cu nan
zumhnak in nan tei tikah in khawhnak nan ngei. 12Hneksaknak a in tikah
fek tein a ummi cu a lung aa lawm, zeicahtiah cu bantuk hneksaknak kha
a tei khawh caah Pathian nih amah a dawtu hna a kamhmi nunnak kha
laksawng ah a hmuh lai.
Kumthar Thawte I Sersiam Ning
Kum khat ser nak i a um mi thla 12 kha,
A thla hleihnih ning khan la hna.
Thianh cikcek hmasa—huatnak, nahchuahnak le lungfahnak tehna um lo
lakin. Buar kaiter hlah.
Athar khawhchung thar siter hna.
Thla thla khat cio kha ni sawm thum, ni kul le ni riat, ni sawm thum
le ni khat ti in ṭhen hna. Thla khat cio a dang in chia hna.
Voi khat ah ni khat lengmang hmang law,
Ni khat cio kha atang i thil hi cawh in ser hna.
Ni khat poh ah khan zumhnak tlawmpal, lungsau tlawmpal, ralṭhat
tlawmpal le rian tlawmpal cawh hna.
Mah hlei ah, ni khat lengmang ah khan,
Ruahchannak, zumh awk tlak nak, siannak le velngeihnak cawh rih hna.
Mah vial a thlumalter tu ah thlacamnak;
Pathian bia ruah ciammam nak le thilṭha tuah nak peikuar khat cio in
chap hna.
Kham nuahmah in um seh tiah,
Lungput ṭha pei khat, le lungnuam hum khat le ipanh nak lentecelh sum
khat le capo bianuam hrai khat lengmang toih chap.
Mah vialte na cawh dih mi cu abung in,
Dawtnak kheng nganpi chung ah bur hna law,
Lawmhnak mei lum le ceunak nihmerh le daite i nunnak le mi zawn
ruahnak le lawmhthiamnak he hmin lak in chuang.
Cu cang ah cun na kum thar cu a thaw ko lai.
[Mi ṭial cia kan leh chom mi a si. A ṭial tu min an chim lo.]
|
HLASAKNING
Dawt Hlei Hniang
Biahmaiṭhi
Laimi dihlak huap in hla lei ah kan pa a si mi Pu G. Biak Nawl nih
hiti hin a chim: “Mizei poh nih aw kan ngeih dih i cu cu Pathian laksawng a si. Pumpak
cio kan aw hi guitar bantuk a si i kan thluak hi guitar hri a tlaitu
le a hmettu kut bantuk a si ca ah hman thiam a her hi cu cu kan
ipekchanh nak cung ah aa hngat. Cuca ah guitar tum ti mi cu a kaa hman
a thiam mi an si ko ca ah kan aw kha kan thluak (psycho) in hman thiam
a herh ve.” Lai mino tampi nih kei cu hlasak ka thiam lo, ka aw a chia, ka aw a
lai kan tit awn. Mah kha kan itheih kha a ṭha tuk. Zeica’h tiah fapa
tlaupa nih a chambaunak le a tlau nak aa theih tik ah ṭhut sawhsawh
loin a pe lei kir aa thawh i a pa sin zong ah phanh taktak bantuk in
kan chambaunak ah ṭhut sawhsawh lo in tlamtlinnak lei kan panh i kan
cawn a herh. Hlasak phun tampi a um mi chung ah solo sakning te hi vun
chim ka duh mi a si. Dotkhatnak: Thlacam
Hlasak kan itimh tik poh ah ahmasa bik ah Pathian sin ah ap le thla
cam hmasa a herh. Mi tampi nih Pathian hla lawng ah thla cam in zuun
hla (love song) ah cun thla cam lo ding tiah an ti mi hi a palh bak
tiah ka ruah. Zuun hla kan sak tik bel ah kan sakmi hla le sak hnawh
mi kan duhmi hna nakin Pathian kha biapitter deuh a herh. Cu cu
thlacam cu kei ka tuah tawn mi a si. Dothnihnak: Hla thim
Pathian sin thla kan cam dih in kan nun i a duh mi le kan aw he aa
tlak mi, kan ca ah a taw mi hle te ithim ding a si. Nun i hla kan sak
tik ah a nung ve.
Dotthumnak: Mai te in
Zei hla kan sak poh ah abia he a aw he maite in thiam hmasa a herh.
Ngaih nuam ding in keyboard a um lo ah guitar, guitar a um lo hmanh ah
vuak asilo ah, timing a kan chim tu paran asilo ah fung zong hman i
cawn ding a si. Cipte le maite i kan thiam i mi hna ah a thlum cang
lai kan ti hnu lawng ah sak itimh ding a si. Kanmah hmanh i kan thiam
theng lo mi mi hmai i sak itimh cu a sual tuk.
Dotlinak: Mi hmai chuah
Kha, hla kan thiam cang. Sak ding kan si tik ah mi hmai chuah a hau
cang. Kan thiam tuk mi zong kan lau tik ah kan philh ṭheu. Kei zong
lau ka rak hmang ve. Cuca ah mi zei ve rel lo nak ah si lo in kan
tlamtlinnak ding ah midang hi thing le lung bantuk ah ruah i atu ka
sak ding mi hla ah cun keimah tluk thiam an um lo ti ruahnak ngeih a
herh. Cun mipi kan zoh tuk hna tik ah kan mitheih le kan saza kan
hawile kan hmuh hna i kan lau ṭheu. Cuca ah mit khuazaza zoh lo in a
ṭhu mi minung lu in acung khap khat hrawng ah mit chiah a ṭha bik. A
ral a chia deuh rih mi ca ah mu! Kal um zong iralrin a herh.
Dotnganak: Mithmai chiahning
Hla kan sak tik ah mithmai chiah ning hi a biapi tuk. Micheu cu
restling i aa ṭhua lai bang hing ṭemṭuam in um an hmang Micheu nih nu
le pa thih bang a ngaihchia tuk mi le a tap mi kan lo. Cuca ah kan
mithmai ah kan sakmi hla bia cuang kho ding in izuam a herh.
Dotruknak: Dirning
Kan dir tik ah teu ṭelṭul i kan um ah cun kan aw a chuak kho ti lo.
Cuca ah tha idorh deuh in pum siaremte in chiah a herh. Ke hnih dorh
cu dir aa dawh lo ca ah zoh chia tuk lo te in orhlei ke dor deuh, cun
pakhatnak le a nolhnak a dih hrawng ah kehlei ke ah vun thlen ve ti
bantuk ah a ṭha.
DotsarihnaK Kut chiahning
Kut chiah ning phun tampi a um ko nain kei nih cun hnuleite ah chiah i
a herh ah cun mahte in kan hla zong vaih pah ah a ṭha ka ti.
Dotriatnak: Thaw tlamtlingte in, a bia fiangte in
Thaw dawp le thaw chuah hi a biapi ngaingai. Kan sak mi hla vaih
tlingte in kan thluai khawh nakding ah cawn lio ah ṭhate in icinchiah
a herh. Cun a bia fiangte in chuah izuam ding. Aw lawng ṭhat i a bia
fian lo hi a poi tuk. Cun a dih nak ah a vaih tlingte in a dongh tiang
thluaipiak a herh.
Dotkuanak: Ṭumkai ning
Pulpit asilo ah hlasaknak hmun cung kan kai kan ṭum tikah tlik lo in
zohdawhte le upat awk tlakte in ṭumkai a herh ngai fawn.
Dothranak: Aw remh ning
Aw remh ning hi phun tampi a um i caan a um lo ca ah a herh bik mi aw
sannak hi chim ka duh. Hla kan sak tik ah or tha lawng kan hman i paw
tha kan hman lo tik ah aw fir kan chuah. Cun aniam asang kan phaan kho
lo. Cuca ah hla sak tik ah paw tha hman a herh tuk. Hla sang phak nak
ca ah cawn le tuah lengmang a herh. Kawlram hlasakthiam tampi khi an
cawng in an cinh leen ve. Zingka thawhka ah ti din i cu dih cun paw
tha in au a herh. Na thaw na dawp na chuah i na paw a hah bantuk tiang
khi na paw tha in au lengmang law na aw a sang deuh lai i na aw aa
samh deuh ko lai.
Biadonghnak
Awchia awṭha kan um ko lai nain asakning cung ah aa hngat deuh. Aw
chia tuk hmanh nih ngaih nuam ngai in sak khawh a si ko. Cuca ah kan
tlamtlinlonak cio ihngal in tlamtlinnak lei ah fapa tlau bang kal cio
usi. Mino vialte hlasak thiam si cio usi.
(Mah hi 2005 February HBA CE Teachers Training, Farrawn, Zarhpini
zanlei Sing Song Service i s/m Dawt Hlei Hniang biacah mi chung ta
laak mi a si.)
------------
CAAN THAR CA I SADUHTHAH 1. Nu pawl hi sabuti chuan ngol hna seh law ca rel cang hna seh.
Computer le e-mail zong tawng deuh cang hna seh.
2. Mino hruaitule nih metting hlan zarh khat tal ah lai an rel ding mi
poh upa theihter in ruahnak hal lengmang cang hna seh. Mi ruahnak an
laak lo ah cun lungdong an si lai.
3. Krifa upa poh mi inn i pumh tuah nak pohpoh ah laakhruak zong i
caan tlai kho ding le biachim thlacam kho ding in iring cia hna seh.
4. Krifa hruaitu nih zei poh anmah rian i iruah retheih dih lo in
midang zong fial pah hna seh.
5. Sunday School ngakchia cawn awk hi pasator nih maw aho nih dek
planning ngei in suaipiak cia hna seh.
6. Kan church chairman hi Nunphung le Zatlang dirh hram a thok tu a si.
Cuca ah Nunphung le Zatlang nih ruahnak hal lengmang ding a si lai.
7. Bu chung mi aho poh, fial tik poh i tho kho ding in an thinlung
itim cia hna seh.
AN TI #“2006 chung member thar cazin ah ka min aa tel ve hnga maw tiah kum
dongh secretary report ka zoh dih i a um lo. Member i kan min aa tel
le tel lo hi zeitin dah kan hngalh khawh lai” an ti.
#Halkha hrawng i krifa upa hlei hnih thim hmanh ah chunni an tla i mui
lengmang ah an ṭin si kaw, kannih ICBC church council minung 58 thim i
suimilam 3 ṭha hmanh kan rauh lo kha cu bu chung mi an ṭhat ruang le
‘nan kan namchan tuk’ ti i bia an tam lo ruang ah a si ko tiah thimnak
hruaitute nih an ti.
#Meṭing a uk kho lo mi, bu chaak a tlai kho lo mi, i church chairman
an ṭuan ah hin bu aa tuai ṭheu. ICBC cu chairman rinhchanh tlak
Pathian nih a kan pek tiah kan iruah.
CAPO Pakhatpa: “Pathian, aziah dah nu hi idawh lakin na ser hna?”
Pathian: “Pa i nan duh khawh hna nakding ah.”
Pa: “Aziah dah molh nawn
in na ser kun hna?” Pathian: “Pa zei huaha lo zong an in uar khawh hna
nakding ah.”
|
