Hlam Tu

Ceu Hlun

Krismas caan hi mi-riangvai hlam caan a si. Bawi Zisuh vawlei i a ṭum hnawhchan zong mah cu a si.

Indianapolis hrawng i Laimi pa nga/ruk te kan rak si lio ah hin, Krismas caan ko ah lung a rak leng. Aho panh awk um lo ah kanmah rual te kan rak inuam. 1998 kum kha cu Ft. Wayne ah Ma Hlawn nu le pa kan hong fuuk hna. Hna a ngam. Ahnu cun Laimi hong tam deuh a si. Krismas a chuah ah hin telifawn in an rak ka kawh ṭheu i Illinois in ka rak ra tawn. A nuam in a sunglawi hin. Riangvai hnga ding riangvai lo in ka um. Dawtnak i an ka hlam ca’h a si.

Laimi um set lo nak khua i apikpak i a um mi hi Krismas caan ko ah hin hlam le kawh an hau. Siangcacawng an si ah, sushi a tuah i mah lawng a thang mi an si ah, rian dang ṭuan i mah chungkhar lawng a um mi an si ah, Krismas i hawi sin tel cu siaherh cio a si. Hlamtu le kotu an ngeih lo ah cun khuazei ah dah ka vaih lai, aho te dah ka hrawn hna lai ti in khua aa zoh ko lai. Micheu cu aho panh ngam set lo zong in an um lai. Cu lio i kan va hlam hna ah cun dawtnak kan langhter hrimhrim lai ti zumhnak a um.

ICBC cu nu le pa lungput a ngei ding kan si. Kan pawngkam khua siseh, khua hlat deuh ah siseh, apikpak i a um mi hna sawm le hlam zong hi kan mission rian te ah a telh kho ding kan si.

Krismas i hrawngtu kan ngeih ah hin intek zong kan ihlerhlau deuh. Kan khual i nuamhnak an kan tuahpi taktak lo hmanh ah, kanmah kan isersiam deuh i mah nih cun kan Krismas tuah a sunter. A nuamhter. Hrawngtu tam deuh kan ngeih poh ah kan krismas tuah a hlunghlai lai. A sungsa lai. A nuam lai.

Krismas sunsatter le nuamhter khawh hi krifabu thazaang a langh nak zong a si. Krifabu bu khat san a tlaih le tlaih lo micheu i an tah ning ah hin, Krismas kan sunh khawh ning zong hi aa tel ve. Khua cheukhat hawihna ah cun, bu aa er mi an um tik ah, ahote dah a ṭhawng deuh ti hi krismas an sunsatter ning in an tah ṭheu. Sunpar izuamcawh tu cu a ṭha mi a si lo; nain Bawipa sunparter le mah krifabu nuamhter izuam cu a ṭha mi a si.

Kan krifabu nuam seh ti kan duh ah cun Krismas zong sungsa le hlunghlei te in tuah izuam ding a si. Krismas kawmiṭi zong nih ciammamte’n khaan ding a si. Mi sawm zong ṭan ding a si. Hruaitute i hlam le kawh awk an hngalh lo sual mi zong pumpak khuahngal aho poh nih hlam le sawm ding an si. Ṭhut-um nak zong ruahpiak ding an si.

Dawtnak i mi hlam cu rian thiang a si.

------------

Bethlehem Arfi

Bethlehem arfi ceu dawhte,
Leicung khuamui ah a rung ceu,
Lamtlaumi hna lam a hmuhsak tu ah;
Mah fimnak rinh i khualtlawng mi,
Zisuh sin ah a hruai hna lai,
Bethlehem arfi iangngei ceu cin law.

Bethlehem arfi iangngei aw,
Fingrei cah tiang kan cung ah rung tlaang law,
Lamtlaumi vialte ceu kan pe,
Zing khuaceu ṭha kan hmuh tiang in,
Bethlehem arfi iangngei ceu cin law.

Nun ruahchannak petu arfi,
Zan khuamaw khualtlawng a hruai tu,
Zaang baang mi cu fingrei cah tiang hruai hna;
Zingnu khua ah dong ti lo in,
Zohcimlo iangceu in tlaang law,
Bethlehem arfi iangngei ceu cin law.

Ruahchannak pe tu arfi te,
Thluachuah mi le tlanh cia mi hna,
Suiluchin sung kan co tiang rung ceu law;
Pathian arfi Zisuh nang hi,
Liangngan chin in cer zungzal cang,
Bethlehem arfi iangngei ceu cin law.

[cer = ceu tuk]

-----------

Krismas tuanbia i a um lo mi thim
1. tukhaal
2. kalauk (camel)
3. khuachia
4. khacer (laa)
5. Santa Clause
6. mura zihmui
7. thlapa
8. siangpahrang
9. sazuk
10. laksawng

Indy Rolung sin cakuat:

Pu Rolung
Atu tan Indy Rolung capar pawl cu, rel a nuam ngai. Khrismas thla cu si kaw, a capar hrim ah khan, khrismas inn ṭamh nak kong tete nan vung ṭial i kan inn cio kan ṭamh dih cang ko lai dah? U Hlun chim bang, inn chung ṭhut hrim khi dahkaw a nuam tuk cu! Pakhat te hal duh mi cu.ram uknak le biaknak kan cawh lai lo, cun Cozah zong biaknak ah ithlak hlah seh, ti mi zawn te ah khan, sau deuh in le, tling deuh in ka fiang kho u law ti ka duh ko. Ziah tiah cun, mitam pi nih mahkong hi kan i fiang hna lo caah hal duh ngai mi cu a si.kei mah ka hmuh ning ah cun cozah cu biaknak ah i thlak a herh bak ka ti i, ka theih lo zong a si kho men, cucaah keimah ca hrim ah a hlei in kan hal duh!..kaa lawm.—Pa Tthum

Rolung: Cozah zong biaknak ah ithlak hlah seh ti kong ah, hlanlio ah hin ramuktu nih biaknak zong an rak tlaih ṭheu. Chim cang bang, U Nu cozah zong nih rampi biaknak tlaihkhip an rak duh. Mah bantuk cu um hlah seh tinak si dawh a si. Cozah nih biaknak hi thlah keukeu in thlah seh tinak tu cu si dawh a si lo. Cozah cu rampi zohkhenhtu a si bantuk in, biaknak kong ah ithlak a hauh nak a um ko lai. Biaknak pa khat pa khat buai a um tik zong ah cozah nih tlang a tlak hna a hau. Cun, minung i raithawi tehna hi zei biaknak phung hmanh si seh law cozah nih a onh hlei lai lo.

USA ah hin, nangmah bang in, cozah hi biaknak ah ithlak seh, Christianity hi rampi biaknak ah cozah nih khiak in ser seh ti a duh mi an tampi an ti. Pentecostal pawl ko nih an duh an ti.
 

An Kan Kawh

Krismas ra kan hawng u law tiah CACC nih an kan kawh i http://cacc.info ah kal cio ding a si. Cabia 3 le hla tampi a um.

Rolung Baibal Caang Thim

Ater in Bia cu a um cia. Cu Bia cu Pathian sin ah a um i, Pathian a si. …Bia cu minung ah aa ser i kan sin ah khua a sa. Johan 1:1,14.

Fanaule Zohpi Awk
1. The Nativity Story—Bawi Zisuh chuah nak  muvi.
2. Rocky Balboa—thongh muvi.

Vawlei Ah Remnak Leeng Seh Ti In
Rual Bik

Pathian nih Pi Eve le Pu Adam cu Eden dum zohkhenh awk le ven awk ah a chiah hna. Cuticun phungbia pakhat a serpiak hna. Mipa cu a thawh i, “Dum chung i a um mi thingkung vialte hi an thei na ei dih ko hna lai. Sihmanhsehlaw a ṭha le a ṭhalo hngalhnak pe khotu thinkung a tlai bel hi na ei lai lo. Na ei ahcun, na thi lai” tiah a ti.(Genesi 2.16,17)

Caan a hun rau deuh tlawmpal ah anak ruh a simi Nu sin ah rul nih a hei hlen i, Pathian phungbia an hrawh caah annih cu Dum chung um ngam ti loin, hauleng mi ah an icang. Cu thawk cun Van le Vawlei pehtlaihnak cu a cat. Cu ruangah Pathian nih Van le Vawlei kar lakah remhnak serh ding in biathli a kan chimh. Cu a biathli cu a fapa Zisuh Khrih a si. Cuticun Pathian nih Vawlei hi a dawt hringhran caah a fapa ngeihchunte kha a pek (Johan 3.16). Cu fapa thawng cun van le vawlei kar longah si loin, vawlei ah remnak hram aa thawk.

Remhnak Bawi hi zeitindah hmunhma kan pek lai.? Ichek tuah usi. Midang cungah nahchuahnak kan ngei maw? Mi le mi karah buainak a chuah tertu maw kan si , remhnak a tuahtu dah kan si? Midang sinah leiba tthing kan ngei sual maw? Chungkhar ah buainak kan ngei sual maw? Mi-huat kan ngei sual maw? Cucaah, Pathian nih a vancung sunparnak kha kaltak in a nautaa bik caw rawl einak kuang aa thim hi a si. Cun, Bawi Zisuh Vawlei a nun lio i a hnuzulhtu pawl hna ke a ṭawl hna kha sullam tampi a um. Na mihuat cungah ngaihthiamnak na tuah duh lo zongah remhnak tal tuah kan izuam awk a si. Cu ti kan tuah cu kan ngaihthiam tluk a si. Kan ral a si mi kha kan va dawt khawh lo hmanh ah leh-rul cham loin hrial ah a ttha. Cuticun Pathian nih ka fa tiah a kan kawh ve hnga. Cu nunning cu kan ca i remnak a rak tuah hnawhchan hi a si.

Pathian nih Van le Vawlei karlak longah remhnak tuah aa timh lo; vawlei cung mi vialte karlak zongah remhnak tlung seh tiah aa timh hi a si ve. Mi he remhnak kan tuah khawh ṭung lo ahcun Eden hauleng ah kan um rih tinak a si hnga. Mi zeirelo in um zong khi hauleng mi chung ah kan um rih tinak a si ve. Cenghngia le vate nih umnak kha an ngei cio, sihmanseh Vanbawi fa lu chiahnak hmunhma kan pek ṭung lo ahcun nang le kei caah Remnak Bawi a si kho hnga lo i, Krismas sullam zong a ngei hnga lo.

Khrihfa kan caah ni sunglawi bik kan ngeihmi hna: Silver Jubilee, Golden Jubilee, Diamond Jubilee le Centenary Jubilee hna nakin hi Bawi Zisuh chuah camtuak lawmhnak Jubilee hi kan sunlawih ter deuh awk a si. Hi Khrismas Jubilee ah hin Pathian nih a kan duh piakmi zeital kan tuah ve lo ahcun Pathian he kan inrem rihlo tinak a si hnga i, Pathian thinhunnak kan cungah a tlung sual lai ti hi phanh a um ngai. Vawilei ah remhnak um seh tiin, ram lian pawl an itlerkhawng hna nain, remhnnak taktak a ho tal nih an chuahpi kho hlei lo. Remhnak tuah aa timh mi tu nih buainak an chuahpi deuh. Cucu America in theih khawh a si. Vawilei ah remnak taktak a um kho lo; Pathian sin dah ti loh!“ Vawlei ah Remhnak Leeng seh tiin, Vanmi Aw a Leeng Cang”

Upat Pek Langhter nak -11

Upat pek langhter nak caah a tanglei in theih khawh a si.
01. Chiat/ṭhat ni ah Pangpar kual pek le tar piak.(Krismas caan ah tar ve)
02. Chiat/ṭhat ni ah thil nak ihruk piak
03. Chiat/ṭhat ni le pumh lio ah dir piak
04. Zaapi hmai biachim tikah dir piak
05. Chuahlanghnak ah dawhte i ithuamh
06. Sawmnak pek le rian fial tik i an inn te i fuh
07. Herh mi minung cu anmah va fuh
08. Mahnak upa deuh ṭihzah nak i auh thiam
09. A mahle a caan tein umtu zia thiam
10. Mi bia ngaih lio i an hmurka zoh
11. Thilri asi loah thilthuam ṭamh/iṭamh
Midang na upat ahcun an in upat ve lai.

Jesus

J-oy. Christmas is a time of joy and celebration. The Savior is born.
E-mmanuel has come. The most miraculous thing that transpired on Christmas day is that God is now with us.
S-avior. God saw our greatest need, forgiveness. This is why He sent the Savior.
U-s The Good News is given to us, individuals and as part of the human race.
S-uffering. The glorious news of the birth of Christ must not overshadow the purpose of Jesus: to die on the Cross for our sins.

Laksawng chuah awk:
1. cauk
2. hmaithuh
3. suimilam
4. towel
5. video game
6. phone card
7. movie tickets
8. vitamin
9. CD
10. wallet
11. gift card
12. hmawmkhai
13. angki
14. zihmui
15. necktie
16. camera (single use)
17. toy
18. hmawca
19. wine
20. ngaknu cakuat

*Krismas i laksawng ser hi, nichuah siangpahrang pa thum i Zisuh laksawng an chuah khan a chuak.

AN TI
**Biakin i video a thla tuk mi cu laisen hal ding, a ngei lo mi cu thlacam thiah ding an si an ti.

**Biakin leng i nau a zi mi le aa choklet mi nan tam tuk ahcun intual ah kan ipum cang lai an ti.

**Zanpum ah hla cauk iken si cang seh an ti.

CAPO

#Krismas ah pakhatpa phung a chim i, Bawi Zisuh chuah nak kong cu ruah setsai lo in a chim i, “Bawi Zisuh cu Mary le Joseph nih khacer in zan ah an zaampi i Bethlehem ah an va hrin” a ti.

#Biakin i thlacam an tuah lio ah an hmai ah Sehtan khuachia in a rung ilangh. An ṭih tuk i an zaam. Patar te bel cu a zei a poi lo. A ṭhu ko. Sehtan nih cun, “Ziah nang na zaam ve lo, na ka ṭih lo maw?” a ti. Patar nih cun, “Ṭih hlah” a ti. “Na ka ṭih taktak lo maw?” tiah Sehtan nih cun a von deel. Ṭih naisai hlah e, na rualchan pei maw ka si cu e tiah patar nih cun a von ti. Khuachia cu a khuaruah a har i, “Zeitin dah rualchan cu kan si?” a ti. Patarpa te nih cun, “Ka nupi cu nangmah far henpei a si cu!” a ti an ti.