Bawipa Ca I Inn Ṭamh

Ceu Hlun

Nikum Krismas hrawng Laimi inn kan zoh ah afel deuh nih cun dawhte in nan ṭamh cio hna i lung a nuam in a panh. Tukum zong an ṭamh cio ṭheu lai tiah kan ruah.

Krismas lai inn kan ṭamh ah hin inn ngei tu lung zong a panh, mileng lung zong a panh. Kan Bawipa cianghaar a si. Inchung lawng kan ṭamh ah cun kan inchung a lut mi lawng nih hmuh a si. Inleng kan ṭamh ah cun michoklet sawhsawh zong nih hmuh dih a si. Cu tik ah, kan Bawipa kan sunhlawih nak cu mi tampi sin ah a lang. Mi tampi nih kan Bawipa sunparnak cu an hmuh khawh.

Meifar vaan ṭung i langhter lo phung um hlah e tiah Mathai 5 ah a kan ti. “Cu bantukin nannih nan ceunak zong cu mi hmaiah a ceu awk a si, cuticun thil ṭha nan tuahmi kha an hmuh lai i vancung khua i a ummi nan Pa kha an thangṭhat lai” a ti.

Bawipa ca i thil hmete kan tuah mi, meiceu pa khat te kan vaan mi, hmurka thlum te kan sian mi, chaw tlawmte kan thawh mi, in kan Bawipa nih sunparnak a co ah cun, a dawtmi hna nih lawmhnak an co ah cun, mah cu krifami i kan ilungsi ding mi a si.

Inka Aa Khar Deng Cang

Kum le caan hi tlaih khawh lo in an lia lengmang i kir hnawh khawh an si ti lo. Na caan ṭha (nah man lio mi caan) hi sullam ngeite in hman izuam. 2006 kum a dih dengmang cang. Inka aa khar deng cang. Hi kum chugn ah ṭuan ding mi rian ṭha na ṭuan lo ruang ah ngaihchihnak na ngeih sual nakhnga lo atu hi a dongh nak caan, sersia caan, thazaang chuah caan a si.

2006 kum chung ah ka caah thazaang a chuah mi (acheu cu zaanghlei nan cawi) cung ah lugnlawmh nak chim cawk lo ka ngei. Tha a chuah lio mi le a tim lio mi hna caan a dih hlan ah na bank zoh law ra baibai; ka’n hngalh ko. Nang tel lo cun ka dir kho lai lo. 2006 kum dongh inka cu December thla nih a khar cang la ii aho hmanh luh khawh a si ti lai lo. 2007 kum tu nih thluachuah thar he a’n donh ko hna.

2006 kum zong hi donghnak cazin phi hi 2007 kum sinah cazin pek ding ah a buai lio pi a si lai. Rian a lim lo (leiba a ngei) timi cazin in 2007 kum inka chung ah na luh nakhnga lo a ti a dongh nak caan ṭha sersiam caan a si.

Ka ca i thazaang a chuah mi nan dihlak cung ah Pathian nih thluachuah in pe ko hna seh. Amen.

Lunglawmhnak tampi he,

ICBC Biakin

-----------------


Advice for kids

1. Always remember that you're unique, just like everyone else.
2. Never test the depth of the water with both feet.
3. If at first you don't succeed, skydiving is not for you.
4. Never miss a good chance to shut up.
5. If you tell the truth, you don't have to remember anything.
 

------------
Rolung Baibal Caang Thim

Isiah 40:3-5 Bawipa ca ah ramlak ah lam sial u. Ram caar lak khaan kan Pathian ca ah lam ding le lam mar sial u. Horkuang kha chilh hna u law tlangbo kha chim hna u. Lamkawi kha dinter hna u; lam bingbo kha thlam hna u. Mah cun Bawipa sunparnak cu a lang lai i mi vialte nih an hmuh dih lai. Bawipa nih a ti.

--------

Saza Tin Cung chimmi:

Biak Lian Thang te inn pumh ah saza Tin Cung phung a chim. Mikah 6:6-8 chung bia a si. Pathian i a kan hauh mi thil pa thum a chim:
(1) Dingte i thilti
(2) Mi cung i zaangfahnak ngeih
(3) Pathian hmai i itoidor.

---------

Ruat Hnik Hmanh

Rual Bik

Matthai 26 : 14, 16 chungah ngun tangka 30 in Zisuh an zuar bang…,
Kawl phungthluk ah “pangia-shwe-oo lu makhu” ti a si. Fir khawh mi thil cu hmuh khawh an si. Cun, “Fimnak hi cawk khawh a si lo” ti a si fawn.

Nihin Kawlram dirhmun zoh tikah phungthluk bang thil a si ti lo. Zeitindah a si, kan zoh hmanh lai: Tlangcung mi pawl hi sianginn ah ca ṭha tein cawnpiak lo in le sianginn ah mahle ca cawnnak nawl an kan phih piak. Cu karlakah, anmah fale cu sianginn ṭhaṭha ah chiah in, Tlangcung mi cu cacawn huaha loin awnnak lampi an kan kawl piak ve. Cucu ca fir hi a si.

Lah-pay lah-you ti a si hoi. Cuticun lah-pay lah-you le fir in an kan mawlh ter i, zeithei loin, a nuam kan ti lio ah anmah pawkhim nak tu a si diam. “Dawtnak lakah ṭih a nung bik cu Tisaltlam mitthli” a si. Cuticun, camipuai tehna awn kan vun duh, rian hna hmuh kan duh tikah Tisaltlanm nih a herh mi cu tangka a rak si diam. Cucu kan theih ko na buin kan iziak cang i lah-pay lah-you le ca fir cu thil ṭha hmuhnak ah ruah a si cang. Hlan i Israel mi Izipt sal ah kum 40 ringlo an taang i, “Nan Luat Cang” tiah, ti hnu zongah micheu cu an chuak duh ti lo an ti bang.
Nihin kan Lai Ram kan zoh ah, mi zeidah biakinn ahle pumhnak ah an panh deuh cang ti hi ruat hnik usi. Hi zawn ah hin thil pathum in chim ahcun 1. Phaisa, 2. Inn le Lo, 3. Hni/puan. Phaisa nih hmai ah lam a sial i, inn le lo, hni/puan nih hnu an zulh. Cutikah nuhmei nu thawhlawm muci nak khan mirum pa le Farasi mi hna pekchannak kha nihin kan ram ah khua saa cang.

Marka 10:17-31; Luka 18:18-30, Matthai 19:13-15 chung kan zoh tikah, Farasi pawl hi ipek lei ah siseh, ngeichia zong in mirum an si hi Baibal in theih khawh a si. Cucaah, ngeichia le tuahserhnak in Pathian lungtawn hna a si hnga maw tiin Parhian lung tawng an izuam. Cucaah Luka 18: 24,25 chuangah 24 Bawi Zisuh nih mirum mi caah cun Pathian pennak chung i luh hi a va har hringham dah. 25 Kalauk ṭhim kaa chung i luh nak in mirum mi Pathian Pennak chung luh cu a har deuh saumau,” tiah a ti. Cu bia cu kan lakah khua a sa cang.

Zeicatiah, misifak nih thawhlawm Ks. 10 a chiah lio ah, mirum pa nih Ks.10000 a chiah cang tikah le misifak nih hnipuan he a chuahlan lio ah mirum nih Suit he chuah a si tikah a lulu in sifak cu hnu an tawlh thluahmah cang i, vancung pennak cu mirum pa covo a si caan a um te lai. Cu Vancung pennak Ticket cu Phaisa nih a cawk khawh caan a um te hnga maw tiin. Cutin vasi sual sehlaw Laimi misifak cheukhat cu vanram Ticket caw kholo kan va tam lai dah!

"Vawlei cung Uktu hi Phaisa a si"


 

Baptist

Tipil krifa cu Tipil krifabu chungtel, asiloah, tipil iin tik i pumpaluk hnem a duh mi khi a si. Theology lei cun Tipil krifa cu, Zisuh hi kan Bawipa le ka Khamhtu a si ti i a zumh nak a thanh cang mi lungfim cia, zumh hnu tipil iing, ahnem i hnem mi a si. Tipil krifabu cu evangelical protestant bu, England ram Puritan pawl cawlcanghnak thawng i a chuak mi, a si.

Baptist sullam:
B: Biblical authority
A: Autonomy of local church
P: Priesthood of all believers
T: Two ordinances
I: Individual soul liberty
S: Separation of church and state
T: Two offices of the church
(Mah chung hin hmasa bik pa thum kong cu Rolung vol. 2, No. 10 ah a um cang. 4-nak in kan peh lai).

4. Phungthiang pa hnih (Two Ordinances)
(Lam 2:41-47; 1 Kor 11:23-32)
Baptist cu ordinance pa hnih kan ngei: tipil le bawipa zanriah. Ordinance cu, Pathian nawl a ngai mi zumtu hna i Pathian nawl ngaih langhter nak ca i tuah mi tuahsernak a si.

5. Pumpak duhthim zalonnak (Individual soul liberty) (Rom 14:5-12)
Hi i a chim duh mi cu: aho poh zumhnak le biaknak kong ah amah nawl a si ti a si bik. Amah i a ṭha, a hmaan a ti mi zumhning le biaknak poh zalongte’n aa thim khawh. Baptist si zong, si lo zong, krifa si zong, si lo zong, aa thim khawh. Krifabu nih si seh, cozah nih si seh, a chungkhat le hawikom nih si seh, an khiahpiak kho lo i a duh na lo in an hneek kho pek lo, amah nawl bak a si tinak a si.

6. Uknak adang in, biaknak adang in (Separation of church and state) (Mt. 22:15-22)
Ram uknak le biaknak kan cawh lai lo; an dang veve in kan ruah hna lai tinak a si. Pathian chaw cu Pathian kan pek lai i cozah ngunkhuai zong cozah kan pek ko lai. Krifabu cu politics ah aa thelhmoih lai lo. Cozah zong biaknak ah ithlak hlah seh. Biana ah, Kawlram i U Nu cozah nih khan, Budhist bianak cu rampi bianak si seh tiah an rak ti. Mah bantuk, cozah i biaknak kong caih kha Baptist nih kan duh lo. Cun, krifabu nih political party ṭanh mi kan ngeih ding zong a si lo.

Uknak a dang, biaknak a dang i zohkhenh ning a nunter tu le a ṭhawnter tu ah Baptist hi hrangtlai ngaingai kan rak si tawn.

7. Bu Pupa Phun Hnih (Two Offices)
(I Timothy 3:1-13; Titus 1-2)
Bu chung ah pupa khan i ruah mi hi Baptist ah cun pasator le krifa upa an si. Bawi Zisuh le a zultu hna bantuk i ruah mi an si ca ah, bu pupa cu nu an si kho lo tiah ruah a si tawn. Atu belte ah cun nu pasator le nu krifa upa an um khawh ve cang ca ah pupa ah relchih ding maw relchih lo ding ti in bia aa tuai ṭheu. Cun, nupi he aa ṭhen mi tah pupa ah cohlan ding an si lai maw ti zong ruah a um ṭheu.

Tipil krifabu ah cun pasator i a zawn bik cu phungchim hi a si ko. Bu hme ah cun mi inn leen le mizaw zoh tehna zong a si. Baptist bu cheukhat ah cun thla hlawh phalh mi fulltime minister lawng Pastor tiah an ti hna. Part-time cu Elder an ti chung hna.

Krifa upa cu pasator a bawmtu an si bik. Pasator cu thlarau lei rian a ṭuan tu ding ah ruah a si i, bu chung khuakhaan awk cu krifa upa kut ah chiah a si. Krifa upate cu anmah zohkhenh awk chungkhar tukpiak hna. Cu chungkhar i herhpang le poipang an ngeih zawn ah mah krifa upa lengmang cu chimh a si, pasator chimh a si lo.

----------

Nuam Sup!

Tukum Kharisamat cu nuam bak seh. Rak itim cio u. Inuamh ning zong rak iruat cia cio u.

AN TI

• Dallas i gospel team a kal mi ngaknu cheukhat cu, nan iruah ning tluk nan si maw ti an hal hna ah an holh setsai lo an ti.
• Mihar le sifak tuk mi bawmh nak ah an tangka sunghar an bur cio i atu tan kan birthday cu voidang nakin kaa lawm bik e tiah aho mang ah dek Bawi Zisuh nih a ti an ti.
• Halkha-Hmandaw lam pemh nak ah ICBC u le pa nih $2000 hei kuat chung ding in khua an khaan. Mah cu Lai Ram mi nih an rak theih hruphrap i mah hmanh ah cun an malhma nawn cang an ti. Thil ṭha tuah a nuamh ning!

CAPO

#Mah pate cu sianginkhar ah a u he a putar an va tlawng. Zan ih lai ah an putar pawng ah cun thla a cam. “Baisakel ka duh i ka zaangfah ko; VCR ka duh i ka zaangfah ko, Video game thar ka duh i ka zaangfah ko” tiah thangpi’n a cam. A u nih a hei naih i a kiu in a suk i, “Aziah a au cun na au, Pathian cu a hna a chet rua tiah maw na ruah?” a ti. A nau nih cun, “Ka au lo ah cun ka pu nih a theih lai lo hencu” a ti an ti.

#Taang 6 pate siangin in a ra ṭin i, a nu nih a grade a zohpiak.
Nu: “Ka fa, ziah C lawngte na ngah ṭung?!”
Fa: “Health ah cun A+ ka ngah ko, ka nu.”


Indy Rolung hi

Chuah cu a chuak pang lengmang ko. Asinain Rolung nih hin mi tampi a’n hlam hna. Na awka a duh. Nan ruahnak hngalh a duh. Nan caṭial a duh. Rel a duh. Caih a duh. Zei rel lo a duh lo. Aa ziak lo. Ruahnak cheuh zong a duh. Soi zong a duh. Zei ti nak khom si ai kun indyrolung@yahoo.com ah ca kuat ding a si.

Nutung pawl ca’h:

1. USA ah cun pumhnawh (towel) hi tampi (10-15 hmanh) ngeih phung a si. Khual le mileng an rat ah hlanh awk tampi umter ding a si. Khual nih towel iken a si lo. Tlun-inn nih rin dih phung a si.
2. Ha-hnawhnak zong.
3. Zunput ah towel hme a thiang i a ro mi chiah hrimhrim ding. Zunput hman tik poh ah kut iyawl phung a si ca ah kuthnawh nak a um hrimhrim ding a si.
4. Khual ngeih tik ah catphiat thar chuahpiak ding. Mah chungkhar catphiat hrawmter lo ding.
5. Zunput caku dihter cu fello a pih nak.
 

Lawmh Na Duh Ah Cun

*Ṭelifawn in “Merry Christmas!” ti dih hna.
*Laksawng kua hna.
*Mi biafaak ruat ti hlah. Phiat dih.
*Kaa nuam bak tiah ruat.
*Music ṭha icawk law ngai.
*Na room, na mawṭaw, na thilpuan thianh.
*Muika ah ichok law mi inn ṭamh mi zoh
*Zan ah van arfi le thlapa hon cuan
*Hla sa