Krifabu nih
SEMREL A HAU

Ceu Hlun

Semrel cu hnem a si lo. A herh nak zawn i a herh zat hman khi a si. Pamh le hman an idan bantuk khin hnem le semrel an idang. Zunput luh pah i mei vaan khi hman a si. Vaan lo cu hnem a si. Chuah lei i mei hmih khi semrel a si. Hmih lo cu pamh a si.

ICBC hi kan hnem lai lo. Nikum ngakchia cawnpiaknak kan tuah lai ah an chuncaw kong caih kan philh. A ni a chuah ah ngakchia an rawl a ṭam. Church chairman an va chimh. Kan fa hniangle rilmal dahmu rawlṭam in kan umter hna ti a theih in, “Arannak in va caw u” a ti hna. Mah cu hnem lo a si.

 Asina’n sem kan rel. Tla tluktlak in khua kan sa lo. Thil ka caw thluahmah lem lo. Herh ti cun kan krifabu ca ah hin computer a herh bak. Bulletin ṭial nak ah, website ser nak ah, cauk leh nak ah, Indy Rolung chuah nak ah—computer lo in a si kho lo. Asina’n kan caw lo. Apathum tuah nak ah Mang Chawn computer kan hman thluahmah ko, ICCF lio in. Scanner le printer zong. Atu ah, Lian Ceu Hnin ta, Lian Ceu ta, Maate ta kan von hman hna. Chaw tampi aa daw. A herh pat ti in computer cu rak caw usi law, pa thum li cawk a hau hnga. Sem a rel lo mi cawkter ah cun manfaak an cawk hnga i tangka thong thumli a dih hnga.

Software ah kan dih deuh rih hnga. Kan herh mi software hi atu te ah caw dih usi law: Office XP ah $400, Front Page lawng ah $200, Sound Editor ah $800 tal, Photoshop ah $630, Page Maker ah $500 ti in tampi kan dih hnga. Asinain kanmah chung i a ngei mi nih an ta an kan sianh. Lukiak deng i tangka an liam i siangin an kai nak theipar an kan hrawm. Cawk lo in kan chang ko. Mah hi u le pa khuakhaan an thiam bia a si.

Hman a tam ah pei thluachuah cu aa luh deuh ve lai cu ti hi chim cio mi a si. Kan al lo. Asinain, semrel le rel lo cu cozah ca hmanh ah aa dang. Sem kan rel lo ah cun a lut a tam leen zong ah um zut ti than bantuk a si ko lai. Cozahpi hmanh sem a rel.

Atu tiang ICBC kan zoh ah, department pa khat cio nih bu tangka hman nak nawl an ngeih mi hi an hmang theng lo. Kan vuncuar a pan ti hngal in semsi khakte’n an um. Bus le gas zong bu ca lo ah an hmang lai lo. Krifabu rian herh a ṭuan mi zong nih anmah tangka te in chuncaw an ei. Bu tangka a heu lo. Mah ding hi a si. Bupi zong semrel cu a hau.

Semrel a biapit nak bik cu meeting hall ah a si. Thilcawk kong caih tik ah, bawmhhal mi kong caih tik ah, mithmai ṭha ton duh cio ko bu ah, semrel bu te i bia chim le ruahnak thawh cu krifa bu zawnruah a si lai. §

-----------

THATHU BIA KAA RUK

A tuan tuk rih
A hnu tuk cang
Ka khim tuk rih
Ka rawl a ṭaam
Khua a lin tuk
Khua a sik tuk

-------------

Lai Phungthluk:

*Seihnam ṭhinh ṭha nun ṭhinh ṭha.*

A sullam: sei kan phorh nak a hnam khi a chin tuk ah si seh, a fual tuk ah si seh, kan ṭhinh ah cun ṭhinh hlan nakin a ṭha deuh. Kan nuncan zong kan Ṭhinh ah cun ṭhinh hlan nakin a ṭha deuh tinak a si.

--------

AN ṬHA DIH KO

Na duhning i thil a kal lo tik ah vanṭhat a si kho. Lung rawh nak tehna, ngaihchiat nak tehna hi thilṭha lei i a kan hruai tu an si kho. Thil pa khat a si khawh lo ah hin thil dang si khawh nak lam a awng.
Mahti thengtheng in thil um seh, mahti thengtheng cun cang te seh ti in na thinlung kha fekṭhup in umter hlah. Na ruahning leng pi khan thil ṭha a cang kho ko.

Achel ah sang tuk naa tinh lai i achel ah niam tuk naa ruah ko lai. Naa tinh mi a tlin lo tik ah na lung a rawk ko lai. Sihmanhsehlaw, cu na lungrawhnak nih cun na kal duh nak lei ah a’n hruai men ko lai.

Naite ah kai zong na kai in tlak zong na tla men ko lai. Mah lak te ah khan inka dang a rak ihong men ko lai. Azei dah kaa thim lai ti hi hmuahchih i zoh in tuante ah ithim.

A cang cang mi poh kha a ṭha bik ah ruat hna. Ka ca i a ṭha bik ding lawngte an rak cang tiah ruat. Mah nih cun ṭhat lam cu a’n zawhpi taktak ko lai.--Ralph Marston

-------

Pathian nih hin, amah a dawmi hna caah le amah nih aa tinhmi ningin a kawhmi hna caah cun, zeizong vialte hi a ṭha lei ah a serpiak ko hna ti kha kan hngalh.-- Rom 8:28

--------

Thluachuah

Biakin sak nak tangka kan herh kan lio te ah KYB le Best Buy pawl an hlawh a kai i hmai thla cun thawhlawm rel zong mi tam deuh thiah an hau cang men lai. KYB cheukhat hawihna cu kai khat ah fang li li, fang nga nga an kai rua i, tingtang a kan cawkpiak na, keyboard a thawh na, thil dang a chuahpi na, si te dawh an si. Krismas le inn thar caw pawl nih don dawh an si cang fawn. J
 

---------

Happiness is when what you think, what you say, and what you do are in harmony.

Lawmhnak cu, na ruah mi le na chim mi le na tuah mi an ikiap tik ah khin a um.
--Mahatma Gandhi
-----------

Semrel Ning

USA kan um tikah overtime le a ti kho nih rian pahnih dah an kemh ti dah lo ah cun, siipuazii tuah awk a um lo caah, kan ngeihchun te tal hi a hman zia thiam le semrel thiam i zuam hna usi. "Semrel thiam cu rumnak a si". (Indy Rolung)
1. Rawl na chuan tikah Ti so zokzok seh ti na duh ahcun high ah chiah law, a so hnu ah metre 7 nak a cung chiah a hau ti lo. Rawl a hmin tertu cu ti a satnak khi a si. Ti a sat hnu ah meter 7 cung na chiah kha cu ti lehlam a ro i, electric or gas a dih men men. Mehkio lebang cu a sat hnu in meter 3 cung chiah a hau lo.
2. Inn chung na um lonak khaan mei hmit ta lengmang.
3. Thil na suk tikah, vawi khat sukah chaphiat hang a chin, chin khat lawng hmang. Zeicatiah, vawi khat suk ah chin khat aa zaa in an ser mi a si; dur hme le dur ngan an chin a ngaw.
4. Gas hi zarhdongh (weekend) ah a man a fak deuh caah ni sawhsawh ah rawn ding a si.
 

‘Hnga Maw’ Ti Bia

Bawipa Thlacamnak hi hramthok hla sak dih i chim lo in chawnghlang rel dih ah chim usi law aa tlak deuh hnga maw tiah. Hlasak dih i thlacam nak cun Baibal rel rih i thlacam aa tlak deuh hnga maw ti bia. Worship committee nih zeitin dek an ruah hnga.
 

Pahrang, Huam le Ipek
Rual Bik

Pahrang cu hawi nakin thiam-hlei ti a si. Pathian nih minung hi mahle pahrang a kan pek cio. Pahrang aa lomi cu mi hnih/khat long an si. Micheu nih mahle pahrang a thei lomi le siicannak nih tlinh lo ruang ah pahrang a tuah/tlinh lomi an um ve. Cucu a bikin sifah ruang ah a si.

Kan Laimi lakah hei zoh hnik usi, Falam pa Zoram Thang (Boxer) hi kan ram in Boxing thiam cia in India (Mizoram) ah a kal i leh-tamaa rian a ṭuan. Cu a rian ṭuan pah cun Boxing aa celh pah. Cuticun India ram pumpi ai-awh khotu dirhmun tiang a phan. 1997 kum ah Mizo TV channel ah biaruahnak an tuah lio ka zoh ve. Hi an tuah lio ah hin Mizoram ai-awh in voi 8 aa celh lio ah India ram ai-awh in voi 9 a rak icelh cang. A teimi hna chungah Europe No.1 a teinak kong zong an hal len. Hi pa hi kan Lairam ah um sehlaw hi tluk minthang aa chuah hnga lo.

Cun, Kawlram pumpi hlasak thiam ah aa tel vemi Leeng Sung Tin Par hi Laitlang ah um sehlaw Leeng Dawt Hlei Hniang bantuk a si kho ve. Cuve bantuk in, Leeng Dawt Hlei Hniang hi Kawlram um si ve sehlaw Leeng Sung Tin Par tluk a si lai lo ti khawh a si lo. Cucaah, Pathian nih pahrang a kan pek ciami hi kan siicannak nih tlinh le tlinhlo a um ti hi kan Laimi sin in theih khawh a si.

Pahrang a silomi “ipek” ti hi hei zoh hnik usi. Patung cheu khat hi hla thiam zong an silo nain chiat/ṭhatni le hla remhnak kip ah a tlolh lomi an um. Cun, nutung solfa thiam le awṭha zong an si lo nain, hoi chuahvahnak pohah aa tel peng mi an um ve. Tlangval acheu hi hlacawn le pumh an huam setsai lo nain cheuhra-cheukhat (1/10) hi hman tein a pekmi an um ve. Hi hna hi an pahrang kan ti kho hnga maw.

Micheu nih kan ipalh tawnmi cu: pahrang le ipek hi kan cawh hna i “anih cu a huam phun a si” ti hi kan hmang ṭheo. Hi bantuk ruahnak hi Khrihfa nih le fim chan ahcun hlawt ding kan si cang. Pathian caah le mahle miphun ṭanh duhnak nih hin zei thil/rian poh a tlolh bal lo i, a tlinhlo nabuin aa hnek peng. Hihi pahrang le huam a si lo; a herh caah ipek/ihnek a si ti theih a hau. Pahrang cu ihnek len zongah mikip nih tlinh khawh a si lo kan ti cang kha.

Pahrang a silomi pawl cu: pumh, hla cawn, chiat/that ni, thawhlawm le 1/10 pek le Buupi caah rianṭuan heiti pawl an si. Zei he dah aa lawh ti ahcun, kan pum caah kawlhawl, rawl ei le ih he a khat. Cucaah Pahrang le Huam le ti hi Ipek he hin thleihdan thiam kan hau.

Kan ram, kan khua, kan biaknak, kan Bu, kan chungkhar caah tiin ṭangṭi cio in Pathian caah ipek hna usi. “Midang na rinh hna ahcun, an inrinh ve lai" --Rual Bik

----------

Rolung Baibal Caang thim

1 Korin 4:6b.

Aho hmanh thangṭhat hlei hna hlah u, aho hmanh namh hlei hna hlah u.

---------------

Pathian Sunparnak A Lang

Thla khat ah voikhat tuah tawnmi, Zarhte zan thlacam pumh lakah minung kan tam bik zan cu kan Pastor Tluang Thangte inn a si, August 5 zan. Aa pumhmi dihlak 68 kan si. Mah hmanh cu Chan Za Lian kha pathum ltuk a si nain pakhat ah kan rel. Cun, cu zan i choir a cawngmi zong kan tam bik. Choir hruaitu Pu Thlasui Tluangneh.

Thlacaamnak kan ngeih hi Bawipa nih thlua a kan chuah chin lengmang ti a lang. Pathian min kan thangṭhat. Rolung zong aa lawm ngaingai.

A thaizing Zarhpi ni kan ipumh zong voidang nakin a nuam khun an ti cio. Kan hlahruai Pu Ceu Hlun hrim hla a hruai pah, khatlei ah solo kiṭhar a hei tum piak pah hna. Kan Khrihfa bu hi a herh ahcun mizeipoh hi a herhning in lam a kan hruaitu Pathian min thangṭhat in um ko seh.

Nai Hrawng Hi

1. Pumh lio ah aleng lei fano a ngei lomi nau-um an tam ko.
2. Pumh dih ah ṭhutdan fimtawltu mino kan tlawm chin lengmang. Zeitin dek kan si dih.
3. Pumh dih ah ṭhutdan fimtawlmi hna an dih hlan chung cu hngak cio usi law a ṭha hnga.
4. Kan Church Chairman nih hnawmbawm a hlawnh lengmang i a hmu tu ning a zak nawn tawn.
5. Pumh caan belte kan upat chin lengmang.
6. Cheuhra/cheukhat pek hi patung nakin mino an fel deuh bantuk in a um hnek.
7. 1/10 hi cu Pathian taa a si bantukin a Ngeitu sinah pek ṭhan a hau.
 

Milu Zat

Kawlram milu sing 540 ah Laimi sing 9 kan um. Miphun dang 98.3%, Laimi 1.7% kan si.
Kan ram pawngkam khuaram pawl milu:
1. China: 1300 million
2. India: 1000 million
3. Bangladesh: 130 million
4. Thailand: 75 million
(Muko mekazin chung ta laak mi a si)

Laimi milu karh le zorh tuaktannak:
-Laimi hi fa pakhat long kan ngeih ahcun milu pakhat kan zor tinak a si.
-Fa pahnih hrin cu karh lo, zor lo a si.
-Fa pathum hrin cu pakhat karh a si.
-Fa pali hrin longah milu pa 2 karh a si.
*Indy Rolung zong nih fa pali tiang tal hrin cu a thohkhan ve.

An Ti

• Ṭhal chuah cang hnu zong i bawngbi a sau le angki bansau peng a hruk mi ngaknu cu tabawah ahlah ṭayaa phungkuai hmuh in dantat ding an si an ti.

• Ngaknu le nutung no pawl nih angki tet, bawngbi tet le hniphor tawi an ihruk ruangah vanram kai ruah ah biakinn a panh mi tlangval pawl cu hell ram lei tu ah kan panh thluahmah tiah, zarhpi ni zanlei ah tlangval no pawl an icaih an ti e tiah midang nih an ti ve.

• Mi bu iton nak zong i rian kong caih a hmang mi cu pension pek an si lai lo an ti.

• Kan pumh caan hi zarhpi zanlei 2:00 ah a si i, vancung khua kai caan hi zarhpi zanlei 2:00 si ve sehlaw khrihfa upa pa khat/hnih hrawng lawng an kai men hnga an ti.

Capo

#Khua pa khat ah, ngakchia nih biakin pawng ah an ek an ek lengmang i, church chaiman a thin a hong tuk cang i, ngakchia pawl cu a sik hna i, “Hihnu nan ek rih ah cun upa zong nih kan ek ve cang lai” a ti hna.

#Biakin ah ngaknu pakhat a jean tawhrolh aa tet tuk i, a voih lanh nak a ṭha ti lo i inn ah a kirh ṭhan an ti.