ACAAN A CU MAW?
 

Mang Chawn

Kan Bawipa Zisuh nih Piter sin ah “Hi lung cung ah hin ka krifabu ka bunh lai i cu cu thihnak hmanh nih a tei kho lai lo (Mt 16:18)” ti le “Satan, ka sin ah um hlah. Na ruahnak hi Pathian ruahnak si lo in minung ruahnak a si caah ka caah dawn tu na si (Mt 16:23 )” ti a chim. A chim duh mi cu Piter a mipum kha si lo in a thinlung ruahnak kha a si. Cu bantuk in ICBC tuanbia kan zoh tik zong ah Bawi Zisuh nih thla a kan campiak bantuk in Laimi Krifa vialte pakhat kan si khawh i hmunkhat ah a nung mi Pathian kan biak khawh nakhnga (Jn 17:11, 21) le biakin zong a phan huaha ti lo mi Bawipa tuu cheukhat Khamhbawi tuu kawm chung ah an luh ve i Bawipa min an thangṭhat khawh ve nakhnga ti in aa rak ithawk mi a si. Cu thinlung put cu Bawipa nih thlua a chuah i ICBC cu Bawipa nih a dirh. Minung dirh mi a si lo. Hawi bantuk in pastor zong kan ngei lo, hruaitu mithiam sang zong kan um lo, nain kan pastor ah Zisuh kan sawm i kan hruaitu ah Thiangtlarau kan sawm caah nihin ni tiang kan lam a tluang. ICBC kan tlangtaar Jn 15:12 bantuk in pakhat le pakhat kan idaw, kan zawn kan iruat, kan izohkhenh, toidornak lungput he khua kan khang lai kan rel tti hna. Aw, a va nuam hringhran dah!

ICBC nih hmailei a kalnak ding zong ah cuhlan a kal cia bantuk in “ICBC a dirh tu hi kan Pathian a si i, kan pastor le ka hruaitu cu Thiangthlarau a si” ti hi kan philh lo i kan inunpi zungzal ding hi a biapi ngaingai mi a si. Israel tuanbia kan zoh tik ah Pathian nih Biacaihtu hna hmang in a rak hruai hna lio ah hawi bantuk in Siangpahrang kan duh ve tiah an rak hal i Pathian nih Samuel sin ah “Zeitintiah nangmah an inhlawt a si lo, an cung i Siangpahrang ka sinak hin keimah an ka hlawt a si” a rak ti (1 Sam 8:7). Cu bantuk in ICBC zong nih a caan a cut hlan ah “Hawi bantuk in ordained pastor theng kan herh hei ti maw, pastor tlamtling theng kan herh hei ti maw, kan ti sual lai ti hi ralrin awk ngai ah ka ruah. Kan ithawkka ah santlai lo lawngte si ko hmanh usi law, tu chun ni ah Pathian nih Amah aiawh ah honorary pastor pakhat, pastor pahnih, chairman, secretary le hruaitu ṭhaṭha tampi a kan pek tik ah hin Bawipa cung ah nan ilawm lai i nan hna zong a ngam cio ko lai dah ka ti. Kan iṭhithrui ning zong zoh tik ah lung a hmui ko. Dawtnak a leng, zawnruahnak a leng. ICBC caah “Bawipa hi a ṭha” ti leng hi chim awk kan ngei rua lo ka ti.

Kan hruaitu cheukhat nih an ti tawn mi “Kan pastor pa hnih zong hi krifabu pi nih kan hna a tlak ah cun zeitik poh ah ordination kan pek khawh ko hna. USA law zong si kun Baptist krifabu zulh phung zong si ai kun a kan kham lo” an ti ka theih tawn. Mah tluk cun nawl kan ngei ve ko nain atu cu a tuan deuh rih. Kan pastor te hi tukfawrh zawng ing ta rih hna seh law, Pathian thawng in teinak hmu ta rih hna seh, pastor rian zong cawng deuh rih hna seh law, Bawipa a hna a tlak ah cun ordination cu kan pek te ko hna lai kan ti mi hi a dawh ngai mi a si tiah ka ruah. ICBC a kan hruaitu kan pastor te le hruaitu vial te hi cathiang ah Bawi Zisuh kong kan hmuh mi “Pathian sinak kha a ngeih zungzal mi a si ko nain hramhram in Pathian tluk siawk kha a ruat lo. Amah lungtho te in cu vialte cu a hlawt dih hna i sal sinak tu kha aa laak (Fil 2: 6,7)” a ti bantuk in kan si kho ve ko, kan ti khawh ve ko tiin uanthlarnak thinlung ngeih lo te in an um i toidornak thinlung te he an kan hruai ti khi ka hun hmuh tik ah hin upat lo le ṭihzah lo in ka um kho hna lo. Bawi Zisuh lam kha an ithim ti ka hmuh tik ah hin ka hna a ngam i Pathian sin zong ah lawmhnak ka chim. Bawipa nih ICBC hruiatu vialte le krifabu pi hi ṭhawng chin in a Thiangthlarau in hruai zungzal ko hna seh!

Buu pakhatkhat chung ah bia pakhatkhat a chuah tik ah hin ruahnak hi a ṭhencheu kho ngai tawn i cu caah ICBC nih bia pakhatkhat a khiah lai tik ah Bawipa sawm bu te le thlacam nak te he cuhlan a tuah tawn bantuk in a kal zungzal khawh nakhnga thla cam cio hna usih! Kan theih cio bantuk in Kawl te nih “leh-wai-suun hneh leh-ya-suun” an ti bantuk in Kan pastor te Ordained peknak kong ah siseh, bu dang he ipehtlaihnak kong tehna ah siseh, thil dang kongkau ah siseh ICBC nih decision a tuah lai tik poh ah thiang thlarau he decision kan tuah khawhnak hnga ding hi a biapi ngai. Tuantuk ah a caan a cut hlan ah thil kan tuah sualnak hnga lo le a caan a luan hnu ah thil kan tuah sualnak hnga lo Zisuh sawm hna usih! Kana khua nupi ṭhi pa nih Zisuh a sawm i amual a pho lo leng ah mi thangṭhat a co bantuk in ICBC nih Zisuh a sawm ah cun a mual a pho lo leng ah thangṭhatnak cu a hmuh hrimhrim ko lai.

ICBC cu a derh tu kan Bawi Zisuh nih zohkheh zungzal seh law lam a hruai tawn tu thiang thlarau nih a thimmi hna a fa le hmang in lam hruai zungzal ko seh. Lianngan sunparnak le thangṭhatnak cu Amah ta a si zungzal mi kan PA Pathian nih zungzal in zungzal tiang co ko seh! Amen.

Caanngei Rian
1
Ceu Hlun

1. Midongtu
Midongtu rian hi bulletin pek lawng a si lo. Midongtu cu pumh i a ra mi a rak dongsong tu le panhte i a rak chawn tu ding an si. Cun tthut nak aa laklawh mi khual zong lai zong, ṭhutnak a chim tu ding an si.

2. Chawnghlang Rel Hruaitu
Chawnghlang rel hruaitu nih a rel ding mi cu inn ah voi hnih tal rel cia ding a si. Rel cia lo pi i ithawh cu daithlan a si. Awh-ah nak zong a si. Cathiam pipi i carel awh-ah cu ningzak a si. Cun, chawnghlang rel hruai fial mi nih azeizong a kan hruai ding a si. Kan rel ding mi ca nambar le a kong zong fiangte’n a kan chimh hmasa lai. Dir i relpi a kan duh ah cun, “Bawipa ṭihzah bu in kan zapi dir hna usi” ti tehna zong a ṭha i, chawnghlang hruaitu rian a si; chairman nih a ti khanh/piak ding a si lo. Chawnghlang hruaitu i a kan hrih hlan ah mibu zong nih dir khanh ding a si lo.

3. Pumhuktu
Pumhuktu ti biafang hi Lairam i rak hman zungzal mi a si. Baibal i a um ning zong a si. Baptist cu pumh uk hi kan phung a si. Pumh uk cu minung uk a si lo; caan uk a si. Parawkrem uk a si. Atu ah cun biakin tampi ah bulletin nih pumh a uk; nain bulletin nakin chairman nih nawl a ngeih deuh ding a si. Cu ruang ah bulletin cu chairman nawl (tel) in ṭial a si ṭheu hi a si.

Pumhuktu nih cun pumh tawisau a uk hrimhrim ding a si. Uk lo cu fel lo a si. Pumhuktu nih cun bulletin ning zong in, ning lo zong in, pumh a uk khawh. Bulletin zong a thlen khawh. Biana ah, khual phaan thar hei um seh, khual sunghar a si ah cun bulletin i aa tel manh lo zong ah chairman nih caan tawite a pek khawh ko. Biaherh thanh, hlasak, cathiang rel le tehte khaan tehna a duh mi an um zong ah caan a pek khawh ko hna. Caan sau tuk hman zong a thlauh khawh ko hna. Kan ṭhut a sau tuk ah cun zaapi dir hlasak zong a hrih khawh.

Pumhuktu i bulletin a thlen hrimhrim a herh caan zong a um. Biana ah, bulletin ah hla kan thiam lo mi nambar hei iṭial palh sual seh law, pumhuktu nih a thlen a hau. Cun pumh phun he aa tlak lo mi hla cu chairman nih a thlen ko lai. Cuca ah pumhuktu nih bulletin hi ciammam le felfaite’n a zoh hmasa a hau. Zoh nak caan zong pumh hlan ah suimilam cheu tal cu a ngeih a hau.

Pumhuktu a aw a niam le a dim ah cun ruak-humh nak a lo i pumh a tho lo. Mibupi hmai ah bia ka chim ti ruat in a awkhi a santer ding a si i, thangpi in bia a chim ding a si. Aa panh chih ding a si.

Pumhuktu cu a bia a tam tuk ding a si lo. A hmurka a tlawm tuk ding zong a si ve lo. Pumhuktu nih cun mi lung tho lakin biahmaisa a chim lai, pumh tho lakin. Pumh nuam lak in caan karlak zong ah bia a tenh ko lai. Bulletin i aa ṭial cia thanh lawng khi chairman rian ah ruah ding a si hrimhrim lo. Chairman rian cu mah nak tam deuhpi a si. ♣

THAWNG

#Rev. Billy Gramham cu US President ṭhing Pu George W. Bush (atu kan president i a pa) nih upatnak laksawng a pek. Zatlang ca i mi ṭhahnem bik (Excellence in Public Service) ti mi minṭhatnak a si. Kum 87 a ti cang mi Rev. Graham nih hin kum 60 chung ah vawleicung minung million 210 sin Pathian thawngṭha a chim.

# Doh-Au: Nai hrawng cu US khua tam nawn ah lam hrawn le doh-au a um. US ram chung i phunglo i a um mi hi suat le ṭhawl si seh tiah cozah nih an ti nawn i mah cu doh an au. USA ah hin phung lo i a um mi minung million 11 hrawng an si i Indiana ramkulh chung ah thong 65 hrawng an um an ti. Angaite ti ah cun USA minung hi cu a ra peem chom mi cio an si.

# Filipin i Good Friday an tuah ning cu, lung aa thleng pawl cu Bawi Jesuh vailam an tah ban tuk te khan an tah hna. Acheu palang kuai in an i chun i an thi tampi an luanter, hling luchin an ichinh i zalam tlang ah vailam an iput i mizapi nih an zulh hna.
       ICBC zong Good Fri Day cu Lai chang in tuah a si i, Nu Bu an chang den maw a tlawm, a thaw tuk dek; a hleimi a um bak lo.

# Kan Kawlram ah hlawh an kaiter hnu in facang man a kai lai ti an phang i, March thla 25 hlan a man ning te in kan zuar peng lai tiah Sanseh ngei le dawr ngei le faruuk ngei vialte min an thut ter hna an ti.

# Kan vawleipi hi alin chin lengmang i, Arctic i hawrha tum pipi kha an ti thluahmah ti a si. Haka khua nak khin a let in a ngan deuh mi hawrhra tum nganpipi pawl cu an mahle an mah an i su tik ah khan Greenland hrawng ah cun li zong a hnin pah lengmang ti a si. National Center for Atmospheric Research nih, rili ti hi kum 100 -150 chung ah pe 1 in pe 3 tiang a kai deuh lai i khua tampi cu ti nih a phum men lai an ti. Meikhu ruang le thingram paam ruang ah a chuak bik.