Ngakchia   |    Mino   |    Nubu   |    Nunphung & Zatlang   |    Ramthar   |    Pasatorte
 
 

 
 
 
 
 
 
 
 
 
 
 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 


Indy Rolung

Indiana Chin Baptist Church, U.S.A.
Vol. 2; No. 3
2006 March 19


BAWI KRI LE KRIFABU CA AH TI IN


Krifa pitling a si cang mi cu, ‘Bawi Kri le krifabu ca ah zei zawn ah hin dah san ka tlaih khawh ve lai’ ti in khua an ngia heu. Bu i a tlinh rih lo nak zawn, rian a lawn nak zawn zei dah a um ti in khua zoh a si. Acheu hla an hruai. Hlahruai dang an um cang ah cun ngakchia hla chimh zong in an an la. Um sawhsawh an duh lo.

Acheu cu an tuah tawn lo mi rian nih a tlak hna. Mah thiam lo phun an thiah hna ah hin ngamh lo a fawi i ralchiat zong a tam. Si hmanh seh, Bawipa a anh taktak mi nih cun ngamh na lo le thiam na lo zong in an i-ot, Moses bang in. Ka zei hi dah Bawipa ca ah kan hman khawh ti in anmah le anmah an idap. An hrang ngeih cu Bawi Kri le Krifabu ca ah an hman heu.

Nai in u le pa nih khua an ruah i Indy Rolung ediha rian an ka thiah ve. Ka ngamh set lo. Cun tlangrel cauk in si seh, maivan in si seh audience ka ngei pah ko i, hi krifabu mitlawmte ca i caial le caan hman cu ka zuam setsai lo. Ka tlinh lo ding pi tluk ah ka ruah. Si hmanh seh law…

ICBC ah hin bochan awk tampi nan um. Bawi Kri le krifabu ca i santlaih aa tim mi nan um. Mah nih cun tha a ka pek. Keimah ka derthawm zong ah hawi an um ko ti in ka cohlan han. Indy Rolung hi rel awk tlak a si ah cun, Bawipa sunpar nak a langhter tu a si ah cun, ruahnak le zaang nan chuah cio nak thawng in a si lai i, zei a si lo ah cun mibawmh nan daithlan ruang ah a si lai. Bawi Kri le krifabu ca ah nan thazang, fimnak le caan ha chuah cio ding in ka’n forh hna.—Ceu Hlun

----------

DUHNUNG TUK EE

Rhoda nu

Tho law, tho law, uan hna usi
Kutsih lungrual, sining cio in,
Hmai ah kal usi, Bawipa rian ah,
Tiin hrihhawh, thanh tawn hna e,
Hruaitu hna nih.

Chuak cio hna e, panh siarmar in,
Santlai lo hna, hruainak chung ah,
Nang e kei e, entai um lo,
Ngaihthiam, hmuhthiam, zul thlaimai ding,
Khing rit bal lo, nu rual lungput,
Duh nung tuk e, lawmhnak mitthli,
Luang riahmah tawn, thinlung chung ah,
Rialti dai bang.

--------


Biachim tikah

Rual Bik


Ka khua a si ve ko tiah ruah mi khua ah biachim tikah, khua min chimh chih a hau lem lo. Ka/kan khua tiin chim usilaw a theitu nih a khua taktak ah ruah khawh a si i, biachimtu zong a biachim a dang deuh ko lai. Indian Khua ah a si ahcun Indiana ti chimh chih lem loin ka/kan khua ti ding a si ko. Ram min a si zongah kan Lairam khi ti lem loin kan Ram tiin chimh deuh ah a ha. Cun, Biaknak a si lo ah, Bu pakhat khat ah chungtel sinak in bia chimh tik zongah a Bu min chimh lem lo ah a ha. Tahchunnak ah: kan Khrihfa bu, ICBC kong chimh tikah kan ICBC tiin 'kan' timi kan telh chih zongah ICBC timi min chimh chih nakcun ka/kan bu a si lo ah, kan nih/mah bu ti deuh in chimh ah a ha deuh tiah micheu ruahnak a si. Zei he dah a lawh ti ah cun, keimah Rual Bik nih ti i chim he aa lo. ‘Keimah’ ti i min chim chih ah hin cun min ichalh he aa lo cang. Ngaite ti ah cun midang tu nih kan min an chimh phung a si deuh. A tawinak i chimh ah cun: ka/kan ram, kan/kan khua, ka/kan bu, ka/kan ta ti deuh in chim usi law mi nih a/an ta tiah an kan ruah hnga i, kan mah ta a si a fiang colh ko hnga. Cu caah, kan umnak le kan ta taktak a si ko mi cu 'ka' or 'kan' timi telh in a min kan chim theng a hau rua lo ti hi ka hmuhning a si.

---------


ICBC Thawngzamh


• Tuzarh cu kan ha lawng a lang ko. Dallas Chin Baptist Church mino an kan tlawng i “lungthli ruah lo vokke” lawmh in kan lawmh hna. An mino cu um rih hna seh, kan pa Rev. Ngun Awi mui an hmuh hrimhrim ah Nunphung le Zatlang hruaitu Pu Rual Bik zong, Pst. Lal Cung Awi le a thaisung Pi Zing Bor zong, lawngbual i an va don ah an hmur nih an ha a khup kho hrimhrim lo. Lungpi kam ngaramh nitlangto nih in an ni ko.


• Zarhte zan kan ipumh cu lung a si bak. DCBC hlaremh iang a ngeih ning le Bawipa ca i an itimhtuahning kan zoh ah ningzak ah an kan chiah sual lai ti kan phang. Pu Sang Mawng hlavaih nih zohcimlo. A phungchim i a ti mi cu: (1) Thawnngha phorh rian hi mibu rian a si (Gospel is a teamwork); (2) Krifabu zohkhenhnak ah laar le nawlngeihnak si lo in biatak nih a hruai a hau (not popularity and politics, but truth) a ti.

• ICBC min in maivan (website) ngei usi ti i khua khaan a si nak kha a sau pah cang nain rian fialmi pahnih kha nai Nilizan ceu ah meing an tuah kho i atu a chuak fangfang a si. A URL http://icbcweb.org a si. Hi maivan hi Bawi Kri sunparnak ca le kan krifabu muisam a si ding a si ca ah nan ruah khawh tawk le nan tuah khawh tawk cio i ruahnak le thazang rak chuah ding in kan in orh hna. Mino i-show pah nak zong ah a ha te men lai. Hman nan ithlak ah iralring nawn cia u.


Bia

# Khuaihliti nakin hmurka ha a thlum deuh. Hmurka ha nakin mithmai panh (smiling face) a thlum deuh chin. (RB)
# Kan mithmai cu kan thinlung inka a si bantuk in, kan lungput cu kan mithmai ah theih khawh a si ve.


Itel Cio Ding

Indy Rolung hi ICBC bupi ta a si. Mi tampi awka a phor tu ding a si. Mi tampi kan ibawmh lawng ah a nung lai. Cuca ah cabia zong thawh cio ding a si. Bawi Kri le krifabu ca i nan siaherh mi a um ah cun indyrolung@yahoo.com ah kuat ding a si. April thla ah chuah nolh ding a s ii cabia kuat awk a ngei mi nih thla thawh ah kuat ding a si.

Cabia nan ial mi ah can ah q kun, tt kun hman ding a si. T le khahter ah cun editor ca ah rian a har ngaingai.

--------

Tum a tlinh mi si izuam hlah;
man a ngei mi si izuam.
—Albert Einstein
---------


 

DCBC sin ICBC kong


DCBC u le nau hna, nan kan tlawng i kan ilawm. ICBC kong tlawmpal in kan von chim tuah lai, kan kong nan theih setsai lo sual ah:

• ICBC hi Indiana Chin Baptist Church ti a si. Bu no te, kum hnih fai te, a si. Mah bu hi bia tlaihtung (motto) a ngei rih lem lo. Ngei seh law “Idaw u” ti a si men hnga.

• ICBC a ngeitu hi Bawi Zisuh a si. A chaak tlaitu lutlai Pu Lian Cin, tawlreltu Pu Kepling Khengmual. Pasator pa thum kan ngei. Pst. Lal Cung Awi, Pst. Tluang Thang le kilhtu pasator Rev. Hre Kio an si. Hlawh phalh lo phun in, DCBC pasatorte bang, an uan. Mah na cun an izuam tuk i awlokchong lei khi an si. Zaang an ibochan sual lai ti zong kan phang deng tawn.

• Kan chung chungkhar nga ah pasator pa thum an um e ti a ial tu Salai N.C. Lian kha ICBC ah a um i amah le Pu Thlasui Tluangneh nih kan bu kong i cozah he aa pehtlai mi an kan tuahpiak.

• Baibal cawng mi hi, kan pasatorte hlei ah, Pu Than Hre (B. Th), Pu Hrang Cung Hnin (B.Th), Pi Zing Bor (B.R.E), Pu Lian Cin (B.R.E), Pi Karen Sui Cer (M.Th), Pu Thlasui Tluangneh (M. Min) an um; Baptist kuangkeuh lawngte.

• Maivan santlailo te kan ngei ve. A URL http://icbcweb.org/ a si. Bus zong kan ngei.

• Menbar cazin laak lio a si i zeizat set kan si khom kan hngal kho rih lo.

• Hla phan kho pa li/nga pi kan um. Pst Lal Cung Awi hi hal fung tamlak a phan cang mi a si. Pu Thlasui Tluangneh le Vl. Uk Hmung hi hla ha tete a kan phanpiak kho tu an si. Mahhna an imanh lo ah cun midang zong an um rih.

• Hla hruai kho pa li nga pi an um. Male quartet cu phu hnih hmanh a ngei kho ding kan si. Nu belte hi an ihuanh lo ah cun an aw an chuah ngam set lo, Sung Par ti lo cu.

• ICBC hi hla ah kan tlo. Haleluiah Hlapi (thlathumcawng) hmanh zankhat cawn nak i a remh ngam mi kan si, kan hlahruai Hrang Cung Hnin a lung a thawh cang ah zei nih dawn hlah. Cawn lo pi i hlaremh aa thawh zong kan tam. Atu lio cu nu-va duet thiah in a kan laak. Nu-va an dih in ngaknu le tlangval thiah a um kho mi a si ca ah, ngaknu tlangval cheukhat cu ‘anih he kan thiahi hna seh’ ti i saduh a that na, ‘anih he an kan thiahti sual hnga maw’ a ti na an si ko rua.

• Mino le ngakchia hi kan izohthla ngaingai hna. Mino hi zarh fa hla an cawng i dai lo in Pathian sunparnak langhter an izuam. Ngakchia zong an cutzat lai kan ingaih ngaite. An u Rhoda le an u chin Dawt ha Hlei Par nih an kutrit hna i Van Neih Cem hmanh holh a thiamka in a ule sin hlaremh ah a dir lengmang ve. Zei kan tuah ti hngal hlah.

• Tingtang tum thiam valno pei khat pi kan ngei. An kum rup ah an thiam taktak. Pumh dih i chenglawi an von huat taktak ah cun kan biakin cu aum um nak a ha lo.

• Kan biakin pawng tili ah hin beer din lo i nga siau nak nawl an kan pek i khua a pau deuh cun nu thlu lo pa thlu lo in nga siau dih dawh kan si, Bawi Tling pa i a kan siau khanh dih lo ah cun. Ngaknu le tlangval nga isiauter nak a hat lai le hat lai lo belte pa Ling nih a va zoh rih rua lo.

• Nu i hni venh hi tha kan pek bak. Lai nutling i hni te he an ipumh ah cun kan hmai a panh ruahmah. Ngakchia zong jean tawhrolh le casual dress he biakin an luh ah hin an nu le an pa tu kan zoh hna.

• ICBC a kan lawmhter tu pakhat cu Jenny a si. Laimi a si lo bu ah kan sin te ah Lai um in a um ve, Lai thuam te he aa pum lengmang ve i Laimi a rak si lo cu vanchiat ah kan ruah. Kan fanaule nih cun an ni tluk ah an ruah. Amah hmanh i hni aa venh ah zeitin dah tawhrolh he cun kan ipum ngam ti lai ti in nutung pawl cu a lau ter nawn hna.


Khuaza Thawng

1. Rungcin Biathang i a chim ning ah, Congthia i ngakah inn khuachia nih lung in an cheh an ti. Lung cu thlung in an tla i canphio a pem fawn lo. Pang in an thaw ii pang a pem fawn lo. Zarh khat chung hrawng mahti cun a s ii zan khat ah sei khat hrawng lengmang a lung cu an khon an ti. Mah bantuk thil hi Rev. Dr. Hre Kio zong nih amah hrimhrim i a hmuh bal nak kong Pu Lian Cin te inn pumh ah a kan chimh cang. Khuachia rianuan nak pei dek a si! February thla hram hrawng ah khan a si.

2. Rev. Billy Graham cu New Orleans ah an kawh i a celh lo bu in kan hnuzarh March 11 ni ah khan a va phan. A thaizing zarhpini ah New Orleans Arena ah phung a chim i minung 16,000 ringlo an ipum. Aa tlum lo mi 2000 ringlo nih aleng Super Dome in TV screen ngan taktak in zoh. Nikum June thla i New York khualipi civui i phung a chim hnu ah atu hi avoi-hnihnak mipi hmai i a chuah a si.

Katrina Hurricane thlichia i khua dihlak a hrawh mi cu a hmuh ve tik ah a khuaruah a har ngai. New Orleans fak tuk in a rawh mi cu Bible cahlun chung i Job tuanbia he khan a tahchunh. Job cu a ngaihchiat vialte le a sail a fa le viate lo dih manh seh law Pathian min a mawhchiat bal lo. Cu bantuk cun New Orleans zong hi thlarau lei thazang a thar i lak nakding ca ah a hramthawhnak tu a si, a ti.

Rev. Billy Graham cu kum 87 a ti cang i vawleicung ram 185 a phaan i minung million 210 ringlo thawngha a chimh hna. Cauk uk 25 a ial i ahmahnung bik The Jouney cu March thla chung ah a chuak.

Pension a lak hnu ah a rianuannak Billy Graham Evangelistic Association hotu rian cu a fapa Franklin Graham nih a lak.

3. Kawlram ah Bird Flu zawtnak rungrul an hmuh ve. Mandalay ah cun atu hi arsa le arti nan zuar lailo tiah khuatlang zohkhenhtu nih awder an chuah. Rangoon hrawng ah cun mipi nih an thei rih lo i, danpoh le arsa cu an ei cuahmah ko an ti.

4. Burma Human Rights Day (Hpone Maw a thih ni), Phune Maw a thih ni kum hleiriat a tilnak cu March 13, 06 ah 88' democracy buainak lio i siahngakchia hruaitu hlun pawl nih an tuah. "A tu ah cun kan thisa le kan thazaang dercang hmanh seh law, kan lungthin le kan ruahnak tu cu a zawr hlei lo. Democracy dohthlennak cu kamlo chuncha bang dir in kan uan peng ko lai," tiah hruaitui pasalha Min Ko Naing nih a ti.


AN TI

• “Khi Ramha” (3rd country) i a phaan cang mi Kawlram miphun tampi cu Kawlram dohthlennak ca i thla cam lo in an chungle visa hmuh nakding le refugee awnnak ding lawng thla an cam an ti.


CAPO

• Inka ah ihkhun aa tenh. Tarpa le tlangval an ibawm i pakhat nih a lulei in, pakhat nih a kelei in a tlaih. An hnuh zawn, an nam zawn a si. Patar pa te cu a baang tuk cang i, “Ah, um ko seh, nangmah le keimah lawng nih cun kan luh kho lai lo” a ti. Tlangvalpa nih cun, “Awh! Luh ding maw a si?” a ti.

• Pa le uico an ilawh nak cu, an tlau zong tlau lo zong i an vah hi a si an ti. ♣
 

Back to Rolung