Indy Rolung Hmurka

                            
Indy Rolung hi Nunphung le Zatlang bu ta ah maw ruat lai u ci, a ngeitu cu ICBC dakaw a si hi. ICBC cu nang le kei kan si ko. Cucaah Nunphung le Zatlang bu lawng na rinh sual ahcun Indy Rolung a ngaih a chia sual lai. Khrihfa bu caah le khua le ram miphun caah Rolung Cazual hmang in na siaherhnak na langhter khawh tiah Indy Rolung nih an sawm. A ṭial long ṭial i, a reltu um lo ahcun  ṭial man a um hnga lo; a rel duh tung i a ṭialtu um ve lo ahcun rel ding a um ve hnga lo. Cu caah a tial a herh a bantuk in a rel zong a herh ve.

     Cazual ah Article tial khawh ding cu a tanglei bantuk hin a si lai:
1. Pathian thawngṭha bia chimhnak
2. ICBC caah siaherh bia or forhfialnak
3. Khuaram le miphun ca siaherh le fawrh fialnak
4. Thawngpang (chiat/ṭhat)
5. Bia le hla a phunphun
6. A thiang mi ruahnak. A lenglei mi zong itel khawh le ṭial khawh ding in sawm an si ve.
7. Cafang 500 hrawng ah khumh izuam ding.
Hi Cazual hi thla khat ah voi khat tal chuah ding a si lai caah thla hramthawk ah atanglei ṭuanvo ngeitu hna e-mail ah cabia pek khawh kan izuam cio hna lai.
Pu Thlasui Tluangneh hechet@yahoo.com
Pu Rual Bik pawrual@yahoo.com
Salai Christopher Bawi Kian
Pu Thawng Mang  thawngmangm@yahoo.com

Indy Rolung Cazual hi kan Khrihfa bu caah le khua le ram, Miphun caah ṭhahnem sanhtlaih a si khawh nak hnga thlacamnak he tangti cio hna usi. Cucu Khrihfa bu thazang zong a si i, Indy Rolung lawmhnak ding zong a si lai. ♣
 

Mino le Pangpar
Moses Hmung

Minung kan chan ah hin kan no lio (ngaknut/tlanval) caan hi kan i dawh bik, kan par lio caan cu a si. Pangpar pawl zong khi an par lio caan khi an i dawh bik caan cu asi ve.Minung cu abubu in um a duhmi phun kan si. Cu caah Laitlang khua te in khuapi deuh Hakha in Rangoon in USA mitam deuh deuh nak hmun ah um duh mi kan si.

Cu caah Mino si lio caan ah mi buu-umnak, Mino i cawlcangh nak poh ah kan i tel ah a ṭha ve. Mi buu sin ah a tlawngleng lomi le mah tein a tlawngmi cu kan i dang leng mang ko lai. Hawi hngalh mi le hawi theihmi kan thei lai lo. Mino kan si lio ah Church choir cawnnak zong ah a chuak lomi le mino picnic tuahnak le pumh caan ah apum lomi hna cu tlau hram kan i thawk ti hi kan i theih colh ding asi. Tlau ti mi cu hawi sin chuah lo le hawi tuahmi tuah lo khi tlau pakhat asi ve. Vawlei cung thil si ningah thil phun hnih a um mi cu a chia-a ṭha, adawh-dawh lo ti ban tuk khin an um. Mah thil pahnih lak ah hin thil ṭha tuah hi minung nih i zuam asi. Thil ṭhalo hi cu cawnpiak hau lo in mi hrut hmanh nih thiam a si.

Pangpar zong cu ban tuk in mi hmai i aparmi le ram lak ah a parmi ti in an um ve. Ram lak i aparmi cu adawhnak kha mi nih kan hmuh lo tik ah a san tlaihnak kha mi caah a um lo. Pangpar lak ah a dawhbikmi cu Biakinn chung i pulpit cung chiah mi pangpar khi a dawhbik cu a si. A ruang cu Pathian hmai le mipi hmai ah apar dawhnak le a san thlaihnak kha a hman nak ding hmun ah a hman thiam caah a si. Mi hmuh lonak i a par mi pangpar cu a dawhnak kha hmuh a si lo tik ah a san tlaihnak a um lo.

Mino kan si lio ah kan caan hi hman zia thiam ngai kan hau. Mino kan si lio ah kan i dawh bik nak hmun cu Biakinn chung i Pathian hmai le mipi hmai ah chuah in Church Choir hla kan remh lio caan te khi a si. Khi bantuk caan le hmun ah kan i tel khawh lo sual si cun mi van chia tak kan si lai. Hi ban tuk caan le hmun ah kan i hman thiam lo sual si cun ramlak ah apar sawhsawh mi, a dawhnak kha ho hmanh nih hmuh lo mi pangpar, a san thlaihnak mi caah a um lo ban tuk kan si lai khi ruah a hau ngai. Caan sau kan no ti lai lo. I ngaichih ti mi cu a caan a luan hnu lawng ah i theih a si tawn kha! ♣
 

Thluachuah Petu Pathian
Paw Rua

Thluachuah ti mi hi a tlangpi in phun hnih in ṭhen khawh a si. Cucu Van thluachuah le Vawlei thluachuah an si. Van thluachuah cu Pathian sin in a ra mi a si i, Vawlei thluachuah cu Pathian nih vawlei a rak ser ka in thlua a rak chuah cia mi a si. Pathian sin in a ra mi thluachuah cu kan nih zumhtu hna caah a si i, vawlei thluachuah tu cu a kawl huam mi poh nih tam deuh hmuh a si ko. Cucu zumh lo mi hna an rumnak cu a si. Pathian thluachuah a hmu mi hna cu an chambau bal lo i, vawlei thuachuah a hmu mi hna tu cu a donghnak ah lung retheihnak in an khat.

Thlacam ti mi hi Pathian he i-chawnbiak ti a si. Cucu Pathian sinah sual phuan, lawmhnak bia chim le hal khi a si ko.Thlacam ti mi hi ngaite ti ahcun Pathian sinah thluachuah kan hal ti nak a si kho. Pathian thluachuah cu kanmah te zong in hal khawh le hmuh khawh a si i; midang zong nih hal piak khawh a si. Pathian nih hal uhlaw kan pek hna lai (Mathai 7:7) tiah a kan ti bantukin, a mah zumh bu in kan hal ahcun hmuh khawh a si. Cucu Pathian a thluachuah kan hal a si ko lo maw. Midang nih thluachuah halpiak ti mi cu khrihfabu chungah pakhat khat nih thla an kan campiak mi le kan cam piak mi hna khi a si ve ko lo maw. Ca kan i-kuat tik zongah Pathian nih thluchuah inpe ko seh, tiah kan iti mi khi mikip nih kan hman tawn mi a si. Cucu pathian thluachuah kan i-hal piak a si ko tiin ka hmuh ning a si. Cun, hringtu an pa nih fale caah thluachuah hal piak khawh le pek khawh a si ve.

Biaknak pakhat i Pastor nih thluachuah, hal piak khawh le pek khawh a si. A sullam cu ordained a hmu rih lo mi nih thluachuah a hal piak khawh hna i, ordained a hmu cang mi nihcun thluachuah a halpiak khawh hna i, a pek khawh fawn hna tiin ka pawm ning a si. Ordained a hmu mi cu fimthiamnak zong in a tlinh i, phung zong nih a pawm mi Pastor a si hlei ah Khrihfa bu nih lungtling tein thim mi a si ve tikah, Pathian nih a mah hmang in sathau a thuh mi a si caah a tuah mi poh cu Pathian nih a cohlan ve lai tiah ka zumh ning a si. Cu caah thluachuah a pek khawh ka ti nak a si. Rev. sual tu cu an si men hnga lo ka ti. Ordained a hmu lo mi Pastor tu nih cun thluachuah a kan pek khawh tiin ka pawm ning a si. Cu ve bantukin Khrihfa bu riantuan tu upa zong mipi nih kan thim hna tikah Pathian nih thim mi hna an si tiah zumhtu a si mi nih kan zumh ning le kan pom ning an si hlei ah, Thisen thawng in zumhtu vialte Tlangbawi kan si dih ti mi bia khi kan nih zumhtu a si mi nih kan pawm khawh awk a si ka ti. Cu caah Pastor le Khrihfa bu riantuan tu upa hna nih Khirhfa bu caah le Khrihfa bu sinah thla an cam mi khi Pathian nih a cohlan ve lai tiin kan zum fawn. A sullam cu Khrihfa bu ca le thawhlawm ca, zapi ca thla an cam khi Pathian sinah thluachuah an kan hal piak ti khawh a si.

Pathian Thluachuah hi zeitindah kan hal lai i, kan hmuh khawh lai ti mi hi lung aw-tawm lo tein um hna usi. Kan nih zumhtu hna caah thluachuah hmuhnak lam a tha bik mi cu 'ngaithiam nun' hi a si. Phundang in kan chim ahcun, midang ngaihthaim cu thluachuah hmuhnak hram pi a si. A hmun zungzal mi thil pathum an um, cu hna cu zumhnak le ruahchannak le dawtnak an si i cu hna lak i a ngan bik mi cu dawtnak a si (1Korin 13:13). Na dawt bik mi kha a caah zei poh na siang kho ko hnga, na thin an hun ter sual tikah tah na ngaihthiam kho maw, na ngaihthiam khawh lo ahcun na dawtnak kha a tak a si lo tinak a si hnga. "Ka cungah zei thil poh tlung ai kun, Pathian min in ka tei dih hna lai", ti khi a sullam cu ka cungah zei bantuk hneksaknak le tukfawrhnak nih a ka tlun zongah ka ngaihthiam dih hna lai tinak a si. Pathian nih a kan dawt long si loin, kan sualnak vialte kha pei a kan ngaihthiam dih cu. Pathian he kan ipehtlaihnak cu a kan dawt ca long ah si loin, kan sualnak a kan ngaihthiam ca tu ah a si deuh.

Dawtnak le ngaihthiam nun hi a dang maw, ti ahcun a dang lo; hmun khat ah an kal ti zungzal. Midang na ngaihthiam hna khi na dawt hna caah a si. Midang kha va thangṭhat zungzal hna, an in thangṭhat ve lai. I thangthatnak nih ihuatnak a hmu lo i dawtnak a karhter. U le nau/ṭafar hna, thluachuah hmuh hi i ham u si; cucu thluachua petu Pathian duh ning zong a si fawn. Zumhtu hna kan thluachuah hrampi cu kan Biak mi Pathian a si kha zeitik hmanah i-philh hlah usi. Na keh le na awrh lei zoh pah in na zulh mi lam, Cross vailam kha zulh in, Khrih thawngṭha nih a kan duh pi mi 'ngaihthiam nun', inunpi ding in kan sawm hna.
 

Philh lo awk ah: Indy Rolung hi mah issue hlan ah hin oi hnih aa chuah cang rua. A cabia kan keng ti lo. Atu i hi midang kut i a chuak mi a si i, kut thar i a chuak mi ah a chuah hmasa bik tan a si. Editor ti awk zong um rih lo in Nunphung & Zatlang hruaitu nih Editor hmurka a ṭial hi a si. Mah hnu i aa chuah mi cu editor a um cang.

2005 kum in ipehtlai deuh i chuah a si hi a si.

(Mah hi cu a cazual i aa ṭial mi a si lo.)

KAN HRUKAIH
Ceu Hlun

Kan thilhrukaih ka zoh ah ICBC hi a nuamh lai hita ka ti. Pa ka’n zoh hna ah patung nih suit he tlaṭhepṭhup in, tlangval nih nanmah kum le muisam he aa tlak in nan ithuam. Vaal no tete zong piang hirhiar tete’n nan um. Ka zoh nan rem tuk.

Nu pawl hi, mirang biakin ah cun lenvah nak jean tawhrolh he aa pum mi zong an um, rian dahra an ṭuan hnek ti awk in. Nu no cu tawhrolh tawi tuk he ipumh zong an hmang i an pasatorte nih an caak ṭheu hna, ca le redio in. ICBC ah cun caak hau nan um rih lo. Kabah a yince sung naingan i a ra mi kan si nan philh lo ti a lang. Mi acheu nih, hika ram ah tawhrolh he ipumh zong cu zoh a dawh lo nak zei dah a um i tiah nan ti ko hnga. Mitremlo cu an si lo. Asina’n aa dang deuh. 2002 kum Battle Creek i Pi Sung Zi ruakhumh ah khan Indianapolis in mi tampi nan hong (kei Illinois in ka ra). Khual lam ah cun tawhrolh hi sia va rem kaw nu zong tawhrolh he ngawt nan chuak. Mah lak ah cun Rhoda nu cu hni te he a chuak. Ti haal riamh tluk in a ngia tu kan sia a rem. Halkha hrawng kan nule zong mitthlam ah an cuang. Mizin miphun kan si tak henkha ti zong a kan ruahter dih.

Fashion lei zong ah nu cu hni he nan itlak bik rua ka ti. Cu ruang ah a si lai, vawleicung khuaza thuam dawh langhnak an tuah zong ah hni thluang phun a tam deuh khi. USA zong ah zung sang a kai mi nu hi hni phun an iti a tam. Cuca’h kei nih cun “nu le hni” ka ti ṭheu. Taitang niam Kawlram nu hrimhrim cu hni nih a’n dawh bik ko hna.

Ruak ni tehna, miphun ni tehna bantuk phungtlai thilti nak ah nu cu hni te he nan chuah ah hin hawi nak zin le hawi nak fel le nulting khun ah khin kan in rel hna. Kan miphun sining an upat tiah kan in ti hna. Laimi sin i Mirang an itel hnihkhat i Lai thil te an iti lio i Lai nu tu i tawhrolh he an chuah khi phundang te a si. Biakin tehna i yince te i nan chuah hi mizin ram mi kan si aa hngalh nak pa khat a si. Pasator nupile i hni te he nan ipumh tik ah, krifa upa nupile i hni zungrem te he nan chuah tik ah, caantlai nu pawl i hni thawitenh te he pulpit nan kai tik ah, ngaknu i thuam ningfim te he nan ipumh tik ah, kan krifabu hi teihkha nan ngeihter i pangpar nan tonh a si ko.

Ngakchia hrukaih ka zoh belte ah an nu le an pa nih Sunday Dress an serh rua hna lo hita ka ti ṭheu. Fale hi thilpuan ṭha hngalhter tuk ding an si lai lo nain, nanmah vial Sunday Dress an iserh i nan fale vial an lentecelh nak thil hnawh te he hawi sin nan chuahter hna ah cun an video le hmanthlak an upat hnu i nan zoh tik ah nan lung a ṭha lo kho ko. Bu dang hmai i an chuah chel zong ah, casual dress he an chuah ah cun an sazamah te hmai a bi sual ko lai. Atu cu hram kan sih hlan a si rih i, hmailei tu ah cun mahle ngeih tawk ah pumh nak thil cu zalhpiak nan duh te ko hna lai. Pumhnak thilthuam kan ihruk nih hin ‘nihin cu Bawipa ni a si’, ‘atu ka um nak hi biakin a si’ ti hi a kan theihter lengmang.

Kan thilhruk nih hin kan lungput a langhter i kan kong zong athlite’n a chim. ♣
 

KRISMAS ZANVAH KHA

Bingbir Vaal

Christmas zanvah kan phan deng cang. Ka rak i ngaih zungzal mi Chrismas zanvah; chim lawlaw ko ning law, ngaknu puan ka rak i zawn hmasabik zan a rak si. 1984 kum Christmas zanvah lio ah ka lungthli tein ka rak uar leen mi ka ngaknu puanpar te ka rak i zawn i Christmas zan cu kan rak vak. Cu kum thok cun ngaknu rual he Krismas zanvah cu phundang in a nuamh ka hun theih. Tlanval lio caan a nuamh zia hi ka ti.

Kan rak ngakchiat lio i Krismas zanvah tu cu phundang a rak si ve. Phangphang puah te hna, laksawng an kan pek mi eidin phunphun ei le din te hna, hawi he i nuamh le au , hlasak te hna an rak si. Atu tu cu a phun aa dang in ka thei. Kan mawh ti lo, upat leisang kan ti cu. Zei ruang ah dah zan kan vah ti bantuk in a ruang tu hngalh kaa zuam cang. Zanvah i kaa ngaih bik nak a ruang zong ka hun ruat ṭhan. Nikum kha dahngai a nuam khun ee, zeiruang ah dah kaa lung hmuih khun hnga? Aw, a si a si. Mino hlasak pei a ṭha tuk kha. Atu tiang ka mitthlam ah a cuang rih.

Chrismas Carol a vak mi hna cu kan inn an hun phan. Kan nupa-farual nih innka on cia in kan don hna. ‘Merry Christmas’ tiah an zate nih aw-ruang in an hung au hmasa. Cu hnu ah ‘Christmas lawmhnak nan cung ah um ko seh!’ ti mi hla an hun kan remh piak. An thiam tuk, a ṭha tuk hringhran. Pakhatnak le chorus an hun sak dih ah khin kaa lawmhtuk ah ka mitthli a hung ha. Ka tak hmul zong a ling dih. Ka lu cu buk ngaw ah a chuah. Aw! tuzan cu dahngai, vancungmi pei kan chungkhar sin ah an rungṭum ko hi ti tluk in kan ruat (Bawi Jesuh a chuah zan i, vancungmi hna nih tukhal hna sin ah Messiah a chuahnak kong hla in an rak sak bantuk kha a si). An hlasak a dih in upa pakhat nih thla a hun cam i thluachuah vanluh a kan hal piak. Cu dih cun kan nu nih a kut in aa hum mi phaisa te cu aa chuah i laksawng a pek ve hna. “Kan lung aa lawm ko inn ngei tu” ti mi hla te an i sak pah i Christmas zanvak pawl cu kan inn in an chuak ṭhan. Tukum Christmas cu kan mah chung ca taktak ah pei a si ko hi kan ti. Zanvak mi hna an hlasak le an thlacam cu kan caah thawngṭha tak tak a si. Kan i lunghmuih tuk hringhran.

Mah zan cu kaa hngilh kho lo. Hi tluk in a sunglawi mi Chrismas zanvah hi maw zei hngallo in kan rak hman tawn ka ti. Lai tlang lei Khrihfabu tampi ah cun, Christmas zanvah cu fund kawl ah ruat hna kaw, Christmas hla zong cawn huahalo, hla zong ṭhiṭha in sak piak huahalo in a rannak in kan vun ti luklak tawn. Kal pah hnor kan ti lai cu. Tlangval zuri pawl cheukhat hoihna cu an zuhaw pi he, hawi thlacam lio ah mit zong i chinhlo in nungak pawl an vun tuai pah tawn hna. Nungak cheukhat nih le, an hmur ah khaini vun i benh pah in, phusup ee ‘phasep ee’ tiah biathli an rak i ruah ve ṭheu. Mah bantuk Christmas zanvah kha cu Pathian zong nih a va cohlang lai lo si kaw ... Inn ngei tu zong i lawmh cu chimhlah! serhsat ah an rel lai i an thin tu a rak hung lei men lai ti in khua zaza ka ruat.

A si hrim. Chrismas zanvah ti mi cu Khamhtu Khrih kan caah a chuak cang ti in khrihfabu innchungkhar kip sin ah thawngṭhabia va phuan kha a rak si. Cu bantuk in, Carol Singing a vak mi zong nih, vancung mi ai awh in Christmas thawngṭha a phortu kan si ti i theih bu in thlacamnak he timhtuahnak rak ngeih cu a herh hringhran ko. Merry Christmas! ♣
 

Krismas Ca’h

• Krismas hlaphel icawk i December thla pumpaluk chuah thluahmah ding. Tuan deuh i chuah poh ah Krismas sau deuh kan hmang lai.
• Laksawng ser ding. Christmas card tampin cawk i hawikom le dawtmi kuat ding. Innpa zong kuat ding. Ngakchia nih peknun an iziak nakhnga Krismas laksawng ser in nu le pa nih cawnter ding. Laksawng ser hi mah ilawmh nak a si. Bawipa lawmhnak tuah zong a si.
• Krismas thla thawh zarh hrawng ah chungkhat le hawikom he caan sung hman yi ding. Cuka peng khaka peng ti i Krismas awkkem chuan belte tuah pangpang lo ding.
• Menlo langhternak phun tuah lo ding. Than thlah lo ding. Pathian nih porhlawt a duh lo.
• Mi lawmhnak tuah ding. Bawipa lawmh nak zong tuah ding. Mah cu mah ca ah a nuam.
• Ngandam izuam ding. Cumpi iralrin ding.
• Angki thar i cawk ding, itlak mi te.
 

Mino

EC Meeting ah khrihfa upa pawl nih:
Khrihfa upa: U le nau hna, kan khrihfabu le kan khua rualremnak le tthanchonak ah hin kan mah le kan nupi, kan chung khar cio kan chimhhrin hna a hau. Nu cu mi hmur sau an si i mi kong caih hmang an si caah kan inn chungkhar cio kan mah nih kan ṭhithruai hna lo ah cun kan khrihfa bu le kan khua hi a buai tuk lai.

Khrihfa upa an chim mi khan Nubu nih an theih i an thin a hun tuk caah meeting an tuahve.

NUBU;;;Aizale!!! An va ti ve. nu thamtham cu kan innchung kan ti, kan tappi le kan lungthu kan ti, kan fa le kan ti nak ah mi kong caih le mi hmualphoh cu a caan hmanh kan ngeih ttung lo. Kan mah nak i a cei deuh mi cu khrihfa upa pei an si ko cu. Kan puh hna hlah seh, tiah nubu cu an I hrocer.

Mah lio ah cun, kan fa le, church school nih an theih ve hna I;;;

Church School;; Kei cu an i tluk ko lai, ka ti. But,
Mino bel cu an tluk hna lai lo.

Mino;;;;Shut up!!!!!!!!

Church school;;;;;;This is America!!!