Ramthar Rian

Kannih cu Pathian kutchuak kan si i Pathian nih thil ṭha tuah dingah a rak kan tinh bantukin Khrih he kan ipehtlaihnak thawngin thil ṭha cu kan tuah khawhnak hnga a ser ṭhanmi kan si ti [Efesa 2:10] itlaih in ICBC hi Bawipa rian ṭuan lengmang ding in aa ruat. A lamthluan a tawi rih ca belte ah nehnang tam a ngei kho rih lo. Tlawmte a ngeih mi von langhter usi law:

• Bangladesh khualipi i siangin a kai mi Bawm siangngakchia pa thum an siangin kai nak ah kan bawmh hna. Ipehtlaihnak a har ca ah atu belte hi cu kan ngol rih.

• Chin Christian College cachim pa khat Hong Kong i Baibal siangin a kai nak ah kan rak bawmh.

• Lai Ram nitlaklei ramri hrawng i a um mi ngakchia an ngandam nak le siangin kai nak ah kan bawmh hna.

• Bawipa chuah cam lawmh caan i ar thah awk hmanh ngei lo tiang in a har mi sin ah laksawng tlawmte in Bawipa dawtnak kan langhter. Mah rian hi Halkha khua kiken in kan thok i a kum nolh ah Thantlang ah kan lohma kan kauh. Pasatorte isawm in laksawng hi an inn cio ah thlacamnak he an chanh hna. Lawmhnak mitthli he an rak cohlan ti kan theih mi nih ṭhatnak tuah a thawtning athar in a kan tehter.

• Matupi ah That Dun Memorial Library kan sa. Lai Ram vawlei hrimhrim i inn ṭha sak hi ramser rian a si ti le, fimthiamnak a bawm mi thilti hi miphun tunmer a si ti ruat in, mah rian kan itlaih hi a si. $25,000 ringlo kan kuat hna.

• Halkha-Hmandaw Lam cawh nak ah $7000 Lai Ram ah kan kuat. 2007 kum ah $2000, 2008 kum ah $5000.

• Rua paar kum a si i kan Lai Ram ah rawlhar le paam a um ca ah ICBC zong nih kan ti khawh tawkte in mihar bawmh nak kan tlunter ve.

• An theih lo ah zeitin dah an zumh khawh lai ti mi Bawipa bia itlaih in, krifa nun a cawm tu ah bia le hla in thawngṭha chim a hau tiah kan ruah i, Rick Warren ṭial mi The Purpose Driven Life cauk kan leh lio.

• Mah acung i kan taar mi hlei ah hin Nubu min zong in ICBC nih Bawipa rian cu a ṭuan. Nubu cawlcanghnak tang ah khin rel awk a um lai.