Testimony

Tehte Khaan Nak le Lawmhnak Bia

from
Jeanne Cherry

"NANMAH THLACAM PIAKNAK LE DAWTNAK THAWNG IN, PATHIAN NIH A VOI-THUMNAK NUNNAK THAW A KA PEK. PATHIAN MIN CU THANGṬHAT IN UM KO SEH!"

Aa lawm mi sinah vaa lawm ve u, a ṭap mi sinah va ṭap ve u. [Rom 12:15]

Hi caan sunglawi a kan petu Pathian min cu thangṭhat in umko seh! Nan zapi kut tlaih can ah "Hello!" ti ka’n duh hna. Houston, sizung ka umlio te in, ICBC ah zeitik dah kaa pumh ṭhan khawh te hnga ti hi saduh ka that zungzal. ICBC khrihfabu a ra khomi hawidawt nan zapi cungah kaa lawm hringhran.

PATHIAN LIANNGANNAK KA SIN AH VOI HNIH TIANG A TLUNG

"Chunlailing ah ni a tla" an ti bang in, kei cu ka chanlailing ah, theihlomi zawtnak LAM [Lymphangioleiomyomatosis- Scientist nih study an tuahlio a si] timi nih a ka tlak. Khuaruahhar a simi cu, hi zawtnak hi nu sin lawng ah a tlung. Hi zawtnak ka ngeih hnu ah ka tha duhsahte in a dih i, ka thawchuah hi kaa za lo. A hnu ah, ka cuap a pahnihte in rian an ṭuan kho ti lo. Sibawi te nih "Na cuap thlen a hau lai" an ka ti. Cu lio ah Indiana lawng ah cuap thlen ding in a hngak lio mi mizaw 50 hrawng an si. Ka thi cang ko lai ka ti i lunglen in Houston, Texas ah ka hawinu Nancy ka va tlawng. Nancy cu a lung a ṭha lo ngai. A hawi sibawipa sin ah a ka kalpi. Sibawipa nih cun, "Na cuap thlen a hau ko lai. Na hmai ah minung pathum lawng an um" a ka ti.

Cuap thlen ding ah cun mincazin ah a ka telh. Zarh khat a rauh ah sizung in phone a ra. "Na cuap thlen ding ah arannak in sizung ah ra!" ti a si. Pathian rianṭuannak cu khuaruahhar a si. Ṭhate in ka cuap cu an ka thlen khawh. 2000 kum December thla ah a si. Cuap a hlutu pa hi kum 26 lawng a si. Cableman a si i tung cung in a tla sual i a thi. A taksa minung 20 ringlo nih kan hman. Pasal ṭha a si. Cuap an ka thlen hnu kum 3-4 hrawng cu ṭhate in ka dam. Exercise zong ka tuah kho.

Asinain, cuap thlen hnu ah hin kum 5 hrawng lawng an nung tawn ti a si. An chim bantukte cun, kum 5 hnu ah ka thawchuah a hman setsai ti lo. Sizung ah atu le atu ka kal. Acheukhat, hi LAM zawtnak a ngei mi hna le cuap an thlen mi hna ka hawi le pawl cu pakhat hnu pakhat an thi thluahmah. Kei zong ka caan aa naih cang tiah ka ruah i, ka ngaih a chia ngaingai. "Bawipa, hi vawleicung ka nun hi a za cang ko na ti ah cun nangmah nawl a si. Asinain, hi vawlei kaltak lai cu ka siang rih lo" ti in thla ka cam tawn.

Ka thawchuah cu a zualchin lengmang i, 2008 November ah Houston lei ah cun ka kal than. Dr. Seethanraju [a ka zoh tawnmi] nih "Hika hin na um a hau lai. Cuap thlen ṭhan ding ah micazin kan in khumh lai" a ka ti. Voi hnih tiang cuap thlen ti cu ka ruah tikah ka ṭih taktak. "Pathian, nunnak rak ka zaangfah rih ko" tiah mitthli he thla ka cam. Khrihfabu, nubu le hawidawt vialte nan thlacamnak Pathian nih a theih. Mincazin ah 13 nak ka sinain, thla 3 a rauh hlan ah, cuap thar cu ka hmuh ṭhan. 2009 March thla ah a si. An ka thlenlai ni hi, sizung chung ah a rannak in an ka kalpi tikah ka nu zong ka kup manh lo, a ka hnam manh lo, goodbye ti hmanh a ka ti manh lo. A ṭahbu te he khan dang ah kan kal tak.

An ka thlen dih hnu ah sibawipa nih "Bia hal ding na ngei maw?" a ka ti. Ka lungchung in "Ngeih lo cu, azaza in ta ka ngeih" ka ti. "A pum a hlutupa hi nu maw a si, pa?" ka ti. "Pa a si" a ti. "Kum zeizat?" ka hei ti ṭhan. "Kum 16" a ka ti. Mah ah cun ngui-ngui thla in ka ṭap. Mi fapate an dawt cikcek mi nih tuante thihnak tuar in, a theih bal lo mi kei sinah a pum tiang a hlut mi ka ruah tikah ṭah lo in ka um kho lo. Hi kong ka ruahfatin ka mitthli a tla. Pathian rianṭuannak cu khuaruahhar a si.

KAA LAWM TUK MUU! THLACAMPIAK BELTE KA HERH RIH KO EE

Sizung ka umchung vialte, thla a ka campiak tu ICBC Krifabu le pasator vialte, Nubu, Pastor Ellery, hawi dawt nan zapi pumpak cio nan sinah lunglawmhnak holh in ka chim kholo. Dam in nan sin (Indiana) ka rak kir nain, ka dam fiang rih lo. Ka khuh lengmang cuh! A rauh hlan ah, Houston lei zong ka kal ṭhan lai. Zeitik tiang ka nunlai cu Pathian nawl a si. Hawi dawt hna he kutsih in, caan sau lenṭi ka duh rih ko ee. Fakpi in nan thlacampiaknak ka herhrih muu. Ka nu ca zong a herh ve. A thimi kum 16 pate a chungkhar ca zong ah thlacam hal ka duh. Vancung ummi kan pa Pathian tu nih nan kan dawtnak cungah a let in thlachuah in peko hna seh muu!

LUNGLAWMHNAK RELCAWKLO HE...J

ICBC ah minung kan karhchin lengmang. Pumh zong a nuam chinchin. Pathian lamhruainak a si. A hlan ah cun, America ram in Siangbawi te nan sinah an ra. Atu cu, Pathian nih nanmah an ratter cang hna. Nan nunphung le Pathian nan biakning nih nan pawngkam caah zohchunh awk a siter lai. Mah cu, thawngṭha nan chim bantuk a si.

Lai nunphung i a mal a dang (unique) ngai tiah ka hmuh mi pakhat tein ka chim hmanh lai. Nau nan pom tik hna ah pakhat nih a pom, pakhat nih a pom ve, aho poh nih an pom cio. Aho hmanh nih "Ka fa a si, tawng hlah!" an ti bal lo. An thin zong a phang fawn lo. Pakhat le pakhat tlaihchannak 'kinship' a langhter cu muu. Mah ka hmuh tikah ka uar tuk! Ha ha..

ICBC nih Burmese service zong an tuah cang tiah ka theih. Mission field lei zong a kau chin. ICBC ah holh idang cio hmanh usi law Khrih ah pumkhat kan si mi a lang. Lamkaltu 2:1-7 chung ah Pentecost ni i, Khrih a zultu pawl nih bia an chimmi kha khuazakip in a rami Jews vialte nih anmah le holh cio in an theih cio ti a si cumu. Thlarau i a kan umpi ah cun, holh idannak nih Pathian thangṭhatnak ah a kan ṭhen kho lai lo. Nan zapi sinah Pathian dawtnak zungzal in umko seh!

Lunglawmhnak relcawklo he,



Nan Dawtmi Nan Ni Jeanne

Aug 16, 2009 (Zarhpi)